Փաստ ինֆո

Առանձնապես խոշոր չափերի շորթում կատարելու մեջ մեղադրվող Արտակ Գալստյանի պաշտպան, փաստաբան Սուսաննա Սարգսյանը դիմում է ներկայացրել ՀՀ Ազգային ժողովի էթիկայի հանձնաժողով: Փաստաբանը խնդրում է կարգապահական վարույթ հարուցել ՀՀ ԱԺ պատգամավոր Տիգրան Ուրիխանյանի վարքագիծը «Ազգային ժողովի կանոնակարգ» ՀՀ օրենքի 6–րդ հոդվածով սահմանված էթիկայի կանոններին համապատասխանության հարցը պարզելու և կարգապահական պատասխանատվության ենթարկելու համար:

Հիշյալ հոդվածի համաձայն, պատգամավորը պարտավոր է պահպանել պատգամավորի էթիկայի կանոնները, այն է՝ հարգել օրենքը և ենթարկվել օրենքին, հարգել հանրության բարոյական նորմերը, պահպանել Ազգային ժողովի և նրա հանձնաժողովների նիստերի անցկացման կարգը, իր լիազորություններն իրականացնելիս չառաջնորդվել իր կամ իր հետ փոխկապակցված անձանց անձնական շահերով, չօգտագործել պատգամավորի պաշտոնի հեղինակությունը ի շահ իրեն կամ այլ անձի, իր գործունեությամբ նպաստել Ազգային ժողովի նկատմամբ վստահության եւ հարգանքի ձևավորմանը, ամենուր և ցանկացած գործունեությամբ զբաղվելիս դրսևորել պատգամավորին վայել վարքագիծ, հարգալից վերաբերմունք ցուցաբերել քաղաքական ընդդիմախոսների, Ազգային ժողովում հարցերի քննարկման մասնակիցների, ինչպես նաև բոլոր այն անձանց նկատմամբ, որոնց հետ պատգամավորը շփվում է իր լիազորություններն իրականացնելիս:

Ըստ փաստաբանի, ՀՀ ԱԺ պատգամավոր Տիգրան Ուրիխանյանը իր հայտարարություններով ոտնահարել է ՀՀ Սահմանադրության 3-րդ, 23-րդ, 31-րդ, 39-րդ, 61-րդ, 64-րդ, 66-րդ, 67-րդ, 71-րդ, 162-րդ հոդվածները, ՀՀ քրեական դատավարության օրենսգրքի 18-րդ հոդվածները, ՀՀ Փաստաբանության մասին օրենքի 21 –րդ հոդվածը, Մարդու իրավունքների համընդհանուր հռչակագրով սահմանված նորմերը:

Դա դրսևորվում է նրանով, որ Տիգրան Ուրիխանյանի կողմից 17.05.2016թ. արված հայտարարություններում արտահայտված «… Պարզվեց, որ սրանց թիկունքում կենդանաբանական օրգանիզմներ կան…», «… բացահայտ տականքություններով, ապազգային մակարդակի անբարոյական ստով ու այլանդակությամբ են դրսևորվում, շորթողին զոհ են սարքել ու սեփական փտախտի հոտն են տարածում ինտերնետով մեկ…: Այդ կայքերի հետ կապված փաստաբան կոչվողների խունտան, որը թաթախված է բազմաթիվ պատմությունների մեջ ու փողի դիմաց մարդ վարկաբեկելու բիզնեսով է զբաղված… Իսկ օրենքի թակարդն ընկած հանցագործին փրկելու խնդիր ունեն նրանք ովքեր վառվում են հասկանալով, որ նրանց օրերը հաշված են…»:

22.06.2016թ. արված հայտարարություններում արտահայտված «…Երբ ձերբակալվեց Անիի հանցակից ու հովանավոր ՀՀ Ոստիկանության կարգապահական խորհրդի արդեն նախկին անդամ, «Արմքրայմնյուզ» կայքի սեփականատեր Արտակ Գալստյանը…» արտահայտությունները ակնհայտորեն խախտում են ՀՀ Սահմանադրության վերոնշյալ հոդվածները, մասնավորապես, պատգամավորի կողմից հասցվում են վիրավորանքներ, անձանց անբարոյական, տականք, այլանդակ, շորթող, հանցագործ անվանելով և ակնհայտ անձնական հակակրանք արտահայտելով:
Անձի պաշտպան ունենալու և պաշտպանության իրավունքից օգտվելը գնահատվում է որպես հանցագործության կոծկում, բազմաթիվ պատմությունների մեջ թաթախված լինելու մեղադրանք է հնչեցվում:

Սուսաննա Սարգսյանը հիշեցնում է ՀՀ Սահմանադրությամբ և ՀՀ քրեական դատավարության օրենսգրքով ամրագրված անմեղության կանխավարկածի սկզբունքի մասին. «Ինչո՞ւ է հրապարակայնորեն «հանցագործ», «շորթող» անվանում և դրանով հանդերձ պիտակավորում դեռևս նախաքննության փուլում գտնվող քրեական գործով մեղադրյալներին, որոնց մեղքը դեռևս ապացուցված չէ օրենքով սահմանված ընթացակարգերով, օրինական ուժի մեջ մտած դատավճիռներով»:

Փաստաբանը եզրահանգում է, որ պատգամավորը, ոտնահարելով ՀՀ սահմանադրությամբ և ՀՀ քրեական դատավարության օրենսգրքով անձին տրված անօտարելի իրավունքները, անձի պաշտպանությունն իրականացնող փաստաբանին մեղադրել է հանցագործությունների կոծկման մեջ, փաստաբանին փաստացի նույնացնելով իր պաշտպանյալի հետ և ինչո՞ւ չէ դրանով իսկ փաստաբանին դարձնելով հետապնդման թիրախ:

Սուսաննա Սարգսյանը «Փաստինֆո»-ի թղթակցին հայտնեց, որ Տ.Ուրիխանյանի հրապարակումների առնչությամբ մի շարք հանգամանքներ պարզելու համար վերջինիս հարցաքննելու միջնորդություն է ներկայացրել նաև նախաքննության մարմնին:

Աղբյուր` Փաստինֆո