Փաստ ինֆո

Ազգային ժողովը 104 «կողմ», 5 «դեմ» և 2 «ձեռնպահ» ձայներով երկրորդ ընթերցմամբ և ամբողջությամբ ընդունեց Ընտրական օրենսգրքում փոփոխությունների և լրացումների փաթեթը:

Դեմ էին «Ժառանգություն» խմբակցության 4 անդամներից 3-ը՝ Զարուհի Փոստանջյանը, Թևան Պողոսյանը և Ռուբիկ Հակոբյանը, «ՀԱԿ» խմբակցությունից Նիկոլ Փաշինյանը և Հրանտ Բագրատյանը:

Ինչպես ավելի վաղ հայտնել ենք, օրենսդրական փաթեթում ընդգրկված ԸՕ-ում փոփոխությունների և լրացումների առաջին նախագիծը որևէ լրացուցիչ ֆինանսավորում չի պահանջում և բխում է հստակեցումներ կատարելու անհրաժեշտությունից՝ կապված, մասնավորապես, տեղական դիտորդների ուսուցման և վարքագծի կանոնների ընդունման, քվեարկության արդյունքների վերահաշվարկի և կանանց քվոտայի ուժի մեջ մտնելու ժամկետների վերանայման հետ: Այս նախագիծն ուժի մեջ կմտնի պաշտոնական հրապարակմանը հաջորդող 10-րդ օրվանից:

Երկրորդ նախագիծը պայմանավորված է «4+4+4» բանակցային ձևաչափի մասնակից քաղաքական ուժերի հունիսի 16-ին ստորագրած նոր Ընտրական օրենսգրքում ընտրական գործընթացի օրինականության վերահսկման կազմակերպական-տեխնիկական մեխանիզմների սահմանման շուրջ փոխհամաձայնության մասին համատեղ հայտարարության մեջ ամրագրված դրույթների հիման վրա ԸՕ-ում փոփոխություններ կատարելու անհրաժեշտությամբ: Այս երկրորդ օրինագիծը, եթե մինչև սեպտեմբերի 1-ն անհրաժեշտ ֆինանսավորումը չապահովվի, ուժի մեջ չի մտնի և չեղյալ կճանաչվի:

Խոսքը, մասնավորապես, ընտրողների նախագրանցման համար բոլոր ընտրողներին նոր նմուշի նույնականացման քարտեր անվճար տրամադրելու մասին է: Ըստ Դ.Հարությունյանի՝ սեպտեմբերի 1-ը որպես որոշում կայացնելու վերջնաժամկետ նշելը պայմանավորված է նրանով, որ մինչև այդ ժամկետը «պետք է գնվեն բոլոր սարքավորումները, որոնք առնվազն անհրաժեշտ են 10 մատնահետքով մարդկանց նախնական տվյալները հավաքագրելու համար»:

Նա հայտնեց, որ առաջարկվող փոփոխությունները կյանքի կոչելու համար անհրաժեշտ է 16 մլն եվրո, որից ՀՀ կառավարությունը պատրաստ է տրամադրել միայն 3 մլն-ը, մնացած գումարն ակնկալվում է ստանալ դոնոր կազմակերպություններից: Ի դեպ՝ առաջարկվող մեկ այլ փոփոխության՝ ընտրատեղամասերի տեսանկարահանման, համար անհրաժեշտ գումարն այս 16 մլն-ում ներառված չէ:

Աղբյուր` Փաստինֆո