Փաստ ինֆո

Վերին Լարսի անցակետում տիրող իրավիճակը կառավարության ուշադրության կենտրոնում է: Կառավարության նիստի մեկնարկին այդ մասին հայտարարեց Փոխվարչապետ, տնտեսական ինտեգրման և միջազգային բարեփոխումների նախարար Վաչե Գաբրիլելյանը՝ վարչապետ Հովիկ Աբրահամյանի հորդորով ներկայացնելով անցակետում տիրող իրավիճակը: Մինչ այդ, ՀՀ վարչապետը տեղեկացրեց, որ Արտակարգ իրավիճակների ու տրանսպորտի ու կապի նախարարները ինտենսիվ աշխատում են իրենց գործընկերների հետ, ամենօրյա շփումների մեջ
են:

Վաչե Գաբրիելյանի տեղեկացմամբ, Մցխեթա-Ստեփանծմինդա-Լարս ճանապարհի 134-ից 135 կմ հատվածը հունիսի 23-ից հորդառատ անձրևների ու հունից դուրս եկած Թերեք գետը հեղեղել է:

«Ցամաքային ճանապարհով բեռնափոխադրումների իրականացումը դարձել է անհնար, բեռնատարները երթևեկում են Բաթումի-Փոթի-Նովոռոսիյսկ նավահանգիստների ուղղությամբ ավտոմոբիլային լաստանավերի միջոցով: Խնդիրը գտնվում է անձամբ վարչապետի ու կառավարության ուշադրության կենտրոնում: Եվ ինչպես նշվեց, Արտակարգ իրավիճակների ու տրանսպորտի ու կապի նախարարները ինտենսիվ շփման մեջ են թե Վրաստանի, և թե ՌԴ իրենց գործընկերների հետ: Վարչապետի նամակով ՌԴ կառավարությունն ինքնաթիռ է հատկացրել՝ սահմանին կուտակված քաղաքացիների տեղափոխման համար: ՌԴ ԱԻՆ-ը Վլադիկավկազ-Երևան ուղղությամբ իրականացրելէ արդեն իսկ 96 ուղևորի փոխադրում, ևս 120 ուղևոր այսօր կփոխադրվեն»,- «Արմենպրես»-ի հաղորդմամբ՝ ասաց Գաբրիելյանը:

Նրա խոսքով՝ հունիսի 27-ին Վառնա-Բաթումի-Նովոռոսիյսկ կանոնավոր լաստանավի միջոցով 72 բեռնատար ավտոմեքենաները հասել են Նովոռոսիյսկ և այժմ բեռնափաթվում են: Նովոռոսիյսկ-Վառնա-Բաթումի ուղղությամբ Հայաստան եկող բեռները հուլիսի երեքին կհասնեն Բաթումի: Ըստ փոխվարչապետի՝ հուլիսի չորսին Բաթումի-Նովոռոսիյսկ ուղղությամբ լաստանավի տոմսերն արդեն իսկ վաճառվում են:

«Սպայկա» ընկերության կողմից վարձակալված Փոթի-Նովոռոսիյսկ ուղղությամբ առաջին լաստանավը 55 բեռնատարներով գտնվում է Նովոռոսիյսկում և սպասում է նավամատույցին մոտենալու թույլտվությանը: Իսկ հունիսի 30-ի դրությամբ Նովոռոսիյսկում «Սպայկա» ընկերությունը վարձակալել է երկրորդ լաստանավը, և ևս 50 բեռնատար մեքենաներով՝ դեպի Փոթի: Առկա տեղեկատվության համաձայն, բեռնատարների կուտակումը Վրաստանի տարածքում հասնում են 15-20 մեքենայի՝ չհաշված այն մեքենաների, որոնք դեռ Հայաստանի տարածքից դուրս չեն եկել, կամ գտնվում են Հայաստան-Վրաստան սահմանամերձ գոտում: Ռուսական կողմում կուտակումները կազմում են 40-ից 50 մեքենա, սակայն Վլադիկավկազի մոտ ճանապարհի երկայնքով կան բազմաթիվ բեռնատարներ: Խոսքը չի վերաբերում միայն ՀՀ մեքենաներին: Կուտակումներ կան նաև Կրասնոդար և Ռոստով քաղաքների մերձակայքում»,- ասաց Վաչե Գաբրիելյանը:

Ըստ նրա՝ Գյուղատնտեսության նախարարության տվյալներով արդեն իսկ արտահանվել է շուրջ տասը հազար տոննա ծիրան, ևս հինգ հազար տոննա դեռ արտահանվելու է: Բոլոր բեռնափոխադրողներին փոխվարչապետը հորդորեց կուտակումներից խուսափելու նպատակով Հայաստանից դուրս գալուց առաջ անպայման լաստանավի վրա տեղ ամրագրել, որպեսզի կուտակումներ չստեղծվեն: Համաձայն Վրաստանի տարածքային զարգացման և ենթակառուցվածքների ճանապարհային վարչության և ոստիկանության տեղեկատվության՝ հունիսի 30-ի դրությամբ գետի հոսքը մոտ հիսուն տոկոսով տեղափոխվել է դեպի իր նախկին ուղղություն, որի մաքրման աշխատանքերը դեռ շարունակվում են: Դրանից հետո կանցկացվի վնասների ուսումնասիրություն, որի ընթացքում արդեն շատ հստակ պարզ կլինի ճանապարհների վերականգման համար անհրաժեշտ ժամանակը:

Վաչե Գաբրիելյանը նշեց, որ նախնական գնահատակներով, աշխատանքները կարող են տևել երկուսից երեք շաբաթ:

«Այդ ընթացքում մեր տրանսպորտի ու կապի նախարարությունը և ԱԻն-ն աշխատելու են բանկչության ու իրենց գործընկերների հետ անընդհատ: Հորդորում ենք մեր բոլոր քաղաքացիներին պլանավորել իրենց գործողությունները՝ հետևելով դեպքերի զարգացման ընթացքին, և ըստ անհրաժշետության՝ դիմել մեր ծառայություններին: Կառավարությունն ամեն ինչ անելու է՝ սատարելու մեր քաղաքացիներին, թե ՀՀ գալու ,թե բեռնափոխադրումներ իրականացնելու համար»,- ասաց փոխվարչապետը:

Աղբյուր` Փաստինֆո