Փաստ ինֆո

Շիրակի մարզի ընդհանուր իրավասության դատարանը՝ դատավոր Հարություն Մովսեսյանի նախագահությամբ, Գյումրիում Ավետիսյանների ընտանիքի անդամների դաժան սպանության գործով քաղհայցի վերաբերյալ անակնկալ և նախորդ որոշմանը տրամագծորեն հակառակ որոշում է կայացրել:

Ինչպես «Փաստինֆո»-ի թղթակցին հայտնեց տուժողի իրավահաջորդի ներկայացուցիչ, փաստաբան Երեմ Սարգսյանը, դատարանն այսօր հայտարարել է, որ հրաժարվում է վարույթ ընդունել ՌԴ-ի դեմ բարոյական վնասի հատուցման պահանջով քաղհայցը, այն քննարկման ենթակա չէ:

Թեև նախորդ դատական նիստին դատարանն այն ընդունել էր վարույթ՝ տուժողների իրավահաջորդներին ճանաչելով քաղհայցվորներ, իսկ Ռուսաստանի Դաշնությանը՝ քաղպատասխանող:

Ավելին, դատարանը տևական ժամանակով ընդմիջելով դատավարությունը՝ նախատեսել էր ապահովել, որպեսզի քաղհայցը թարգմանվի ռուսերեն և ուղարկվի Ռուսաստան: Ակնկալվում էր, որ ՌԴ-ն այսօր կհայտնի իր դիրքորոշումը քաղհայցի առնչությամբ:

Ընդ որում, ինչպես նշեց Երեմ Սարգսյանը, որոշումը կայացվել է ոչ թե այսօր, այլ, իբր, նախորդ դատական նիստին՝ թեև դատարանը չի հեռացել խորհրդակցական սենյակ՝ որոշում կայացնելու:
«Աբսուրդային որոշում է, որն այս պահին կայացնելու դատարանն իրավունք չուներ: Այն քրեական դատավարության ընթացակարգի հետ ոչ մի առնչություն չունի: Ակնհայտ է, որ եղել է անհապաղ պահանջ վարույթ չընդունել ու չքննարկել»,- ասաց Երեմ Սարգսյանը՝ հավելելով, որ տուժող կողմին այդպես էլ պարզ չդարձավ, թե արդյոք քաղհայցը թարգմանվե՞լ է ու ուղարկվել ՌԴ, թե՞ ոչ:

Տուժող կողմը միջնորդել է դատարանին հետաձգել դատական նիստը՝ հաջորդ դատական նիստին դատարանին ինքնաբացարկի միջնորդություն ներկայացնելու համար:

Հիշեցնենք, որ տուժող կողմը Ավետիսյանների ընտանիքի անդամների կյանքի իրավունքի խախտման հիմքով ներկայացրել էր բարոյական վնասի հատուցման պահանջ՝ ընդհանուր առմամբ 450 հազար եվրոյի չափով:

Հաշվարկը կատարվել էր հետևյալ սկզբունքով՝ ընտանիքի ամեն չափահաս անդամի կյանքի իրավունքի խախտման համար ներկայացվել է բարոյական վնասի հատուցման պահանջ՝ 50 հազարական եվրոյի, իսկ երկու մանկահասակ երեխայի կյանքի իրավունքի խախտման համար՝ 100 հազարական եվրոյի չափով:

Աղբյուր` Փաստինֆո