Փաստ ինֆո

ՀՕՊ համաձայնագրի վավերացումն մենք անում ենք՝ ելնելով բացառապես ՀՀ-ի շահերից: ԱԺ այսօրվա արտահերթ նիստում՝ 2015 թվականի դեկտեմբերի 23-ին Մոսկվայում ստորագրված «Հայաստանի Հանրապետության եւ Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագրի քննարկման ժամանակ, ասաց ԱԺ փոխնախագահ Էդուարդ Շարմազանովը՝ արձագանքելով «Ժառանգություն» խմբակցության ներկայացուցիչ Զարուհի Փոստանջյանի խիստ քննադատական ելույթին:

ԱԺ փոխնախագահն ընդգծեց, թե այս փաստաթղթի վավերացումն անհրաժեշտ է մեզ: Երկրորդ՝ մեր նման երկիրը պետք է դաշնակցի այն պետությունների կամ նրանցից մեկի հետ, ում բանակները գտնվում են մեր տարածաշրջանում:

Նա նշեց, որ մեր տարածաշրջանում գտնվում են թուրքական ու ռուսական բանակները՝ ապա հայտարարեց. «Մեկ անգամ մենք այդ սխալը կատարել ենք, և մենք պետք է դաշնակցենք Ռուսաստանի հետ, ռուսական և հայկական բանակների դաշնակցությունը ռազմավարական է, ստրատեգիական է ու երկարաժամկետ»:

Ինչ վերաբերում է Ռուսաստանի և Թուրքիայի հարաբերություններին և մասնավորապես ընդդիմադիր պատգամավորի կողմից ռուս-թուրքական 1921թ.-ի մարտի 16-ի պայմանագրի մասին հիշատակմանը, ապա, ըստ Է.Շարմաղանովի, պետք չէ նույնացնել «բոլշևիկ» և «Ռուսաստան» եզրույթները.

«Այնքան վնաս, որ հասցրել են բոլշևիկները Ռուսական կայսրությանն ու ռուսական պետությանը, որևէ այլ պետության չեն հասցրել»:

«Թուրքիայի ու ՌԴ-ի շահերն ինչքան էլ համընկնեն, նրանք կովկասյան տարածաշրջանում երկարաժամկետ առումով ոչ միայն մրցակիցներ են, այլեւ՝ հակառակորդներ, բայց դա չի նշանակում, որ գլոբալացված աշխարհում պետք է անեն ինչ լինի սև ու սպիտակ»,-վստահեցրեց Է.Շարմազանովը:

ՀԱՊԿ-ի հետ համագործակցության քննադատությանն ի պատասխան նա նշեց, թե ՀԱՊԿ-ը մեզ շատ բան է տվել, մասնավորապես՝ «այսօր այն սպառազինությունը, որ մենք ստանում ենք, ստանում ենք այդ պայմանագրի շրջանակներում»:

Նշենք, որ Զարուհի Փոստանջյանն իր ելույթում հայտարարեց, թե ապրիլյան դեպքերից հետո նման համաձայնագրի քննարկումը խոսում է այն մասին, ՀՀ-ն անկախ պետության քաղաքականություն չի վարում.

«Եթե վարեինք, կունենայինք 200 միլիոն արժողութամբ վարկային համաձայնագրի սպառազինություն, որը պետք է տրամադրվեր»,-ասաց Փոստանջյանը՝ հավելելով, թե այստեղ որևիցե մեկը չասաց, թե դա երբ է լինելու:

Անդրադառնալով Ադրբեջանի և ՌԴ-ի հարաբերություններին, Զ. Փոստանջյանը նշեց, որ ՀՀ-ն չի խանդում, սակայն խնդիրն այն է, որ ռուսական արտադրության «սմերչներ»-ը Ադրբեջանը կիրառում է մեր դեմ:

«Դարձել ենք ՌԴ-ի արբանյակը, ՌԴ-ն ունի իր շահերը, իսկ ՌԴ-ի եւ Թուրքիայի եղբայրության 1921 թվականի պայմանագրի դրույթները գործում են»,-հայտարարեց նա:

Ընդդիմադիր պատգամավորը նաև ընդգծեց, որ «մենք մի միության մեջ ենք, որտեղ անդամները մեր թշնամիներն են, թշնամիների լավագույն բարեկամներն են, և հիմա էլ հակաօդային համաձայնագիր եք ուզում վավերացնել»:

Աղբյուր` Փաստինֆո