Փաստ ինֆո

Մենք սովորել ենք «4+4+4» ձևաչափերի, ՀՕՊ համաձայնագրի քննարկման ձևաչաձը հետաքրքիր է՝ «4+4+114»: Այս մասին Ազգային ժողովի այսօրվա արտահերթ նիստում՝ 2015 թվականի դեկտեմբերի 23-ին Մոսկվայում ստորագրված «Հայաստանի Հանրապետության եւ Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագրի քննարկման ժամանակ, ասաց ՀՀԿ խմբակցության ղեկավար Վահրամ Բաղդասարյանը՝ ակնարկելով նոր Ընտրական օրենսգրքի քննարման «4+4+4» ձևաչափը:

Նրա պարզաբանմամբ՝ «4+4+114» ձևաչափ ասելով, ինքը նկատի ունի ՀՕՊ համաձայնագրին ընդդիմացող՝ ԱԺ մուտքի մոտ ցույց իրականացնող քաղաքացիական հասարակության 4 ներկայացուցչի, խորհրդարանական ընդդիմության 4 ներկայացուցչի և համաձայնագրի կողմնակից՝ 114 պատգամավորի:

«Մարդիկ ունեն իրենց դիրքորոշումն ու կողմնորոշումը, սակայն մենք մեր երկրի ճակատագիրը չենք կարող տալ որոշ մարդկային խմբերի»,-հայտարարեց քաղաքական մեծամասնության ներկայացուցիչը՝ ընդգծելով, որ նկատի ունի այն մարդկային խմբերին, որոնք կատեգորիկ դեմ, երբ խոսքը գնում է Եվրասիական տնտեսական միության, ՀԱՊԿ-ի, ՀՕՊ համաձայնագրի մասին, նաև նկատի ունի մեկ այլ մարկային խմբի, որն ընդհանրապես դեմ է, երբ խոսքը գնում է ԵՄ-ի, ԵԽԽՎ-ի, ՆԱՏՕ-ի հետ համագործակցության մասին: «Ձեզ խնդրում եմ, հորդորում եմ և ասում եմ՝ ռուսներին սիրում ես, թե չես սիրում, աղջիկ ջան, ում ո՞նց ես սիրում, ի՞նչ ես սիրում, Ձեր քաղաքական սեքսուալ հնարավորությունները մի տեղափոխեք Ազգային ժողով: Սա պատկառելի ամբիոն է: Ես չէի ցանկանա, որ նման համաձայնագրի քննարկումը նման մակարդակ կրեր խորհրդարանում և այն էլ՝ այս կարևորագույն ամբիոնից»,-հայտարարեց Վ.Բաղդասարյանը՝ ակնարկելով «Ժառանգություն» խմբակցության ներկայացուցիչ Զարուհի Փոստանջյանին, ով մինչ այդ բավականին խիստ քննադատական ելույթ էր ունեցել՝ ՀՕՊ համաձայնագրի վավերացման հարցով:

Աղբյուր` Փաստինֆո