Փաստ ինֆո

Ազգային ժողովի արտահերթ նիստում քիչ առաջ ավարտվեց Ընտրական օրենսգրքում փոփոխությունների և լրացումների փաթեթի քննարկումն առաջին ընթերցմամբ: 

Ինչպես և ակնկալվում էր, «4+4+4» բանակցային ձևաչափի մասնակից քաղաքական ուժերը, որոնք հունիսի 16-ին ստորագրել էին նոր Ընտրական օրենսգրքում ընտրական գործընթացի օրինականության վերահսկման կազմակերպական-տեխնիկական մեխանիզմների սահմանման շուրջ փոխհամաձայնության մասին համատեղ հայտարարությունը, պաշտպանեցին այդ հայտարարության մեջ ամրագրված դրույթների հիման վրա ԸՕ-ում առաջարկվող փոփոխությունների նախագիծը:

Հիշեցնենք, որ հայտարարության տակ, բացառությամբ «Ժառանգության», որը չի մասնակցել վերոհիշյալ ձևաչափով քննարկումներին, ստորագրել են ԱԺ բոլոր խմբակցությունները:
«Ժառանգության» ներկայացուցիչ Զարուհի Փոստանջյանն այսօր իր ելույթում հայտարարեց, թե «կարող ենք ասել, որ այս պահին քննարկվում է ՀՀ ներքին թշնամու կողմից ՀՀ քաղաքացիների նկատմամբ հարձակման օրը և հարձակման ձևերը», քանի որ այս նախագիծն այլ կերպ անվանել հնարավոր չէ: «Դա նախատեսվում է ներքին թշնամու կողմից իրականացնել 2017թ.-ի գարնանը, բայց ես կարծում եմ, որ այս ծրագիրը տապալելու համար մենք ինքներս պետք է լինենք նախահարձակ, ոչ թե սպասենք հերթական ընտրություններին»,-մասնավորապես հայտարարեց Զ.Փոստանջյանը:

Այս հայտարարությունը զայրացրեց ոչ միայն իշխող, այլև մյուս ընդդիմադիր ուժերին:

«Օրինաց երկիր» խմբակցության ղեկավար Հեղինե Բիշարյանը, մասնավորապես, հայտարարեց, թե «այստեղ նստած որոշ ճղճղաններ, որոնք իրենց հռչակում են ինչ-որ ընդդիմություն, չգիտես էլ՝ ինչ ճանապարհ են անցել և ինչ ճանապարհ դեռ պետք է անցնեն, ներողություն արտահայտությանս, և իշխանության ջաղացին ջուր լցնելով՝ հարձակվում են ընդդիմադիր քաղաքական ուժերի վրա»: Նա, «որպես քաղաքական դաշտում մշտապես պայքարող 20 տարվա քաղաքական ուժի ներկայացուցիչ», խոսքն ուղղելով իրենց ընդդիմադիր հռչակածներին, հորդորեց, թե «չի կարելի այս ամբիոնից խոսել ընդդիմադիր գործընկերների դեմ»: «Այսինքն՝ ի՞նչ, պատվեր ե՞ք կատարում իշխանության»,-վրդովված հարց ուղղեց Հ.Բիշարյանը:

«Բարգավաճ Հայաստան» խմբակցության ղեկավար Նաիրա Զոհրաբյանն էլ հայտարարեց, թե իշխանափոխության միակ ճանապարհն ընտրություններն են, այլ ճանապարհ, ցավոք սրտի, փորձը ցույց է տվել, որ չի աշխատում: «Այլ ճանապարհն արյունահեղությունն է, որը մենք իրավունք չունենք մեր երկրում թույլ տալու: Բոլոր նրանք, ովքեր դեմ են, որ այս լրջագույն դրույթները, որի շուրջ շատ դժվարությամբ եկել ենք համաձայնության, ամրագրվեն, ուրեմն մեկ բան պետք է մտածել, որ այդ քաղաքական ուժերի կոդերը, այդ քաղաքական ուժերի սեկտանտների մեսիջները բացարձակապես ազնիվ չեն: Նրանց նպատակը բացարձակ լավ Ընտրական օրենսգիրք ունենալը չէ, նրանց նպատակը բացարձակ նորմալ ընտրություն ունենալը չէ, նրանց նպատակը, իրենց հիմնական կոդը «ինչքան վատ՝ այնքան լավ» կարգախոսի իրականացումն է, որը բոլոր այն քաղաքական ուժերը, ովքեր սեկտանտ չեն, ովքեր առաջնորդվում են քաղաքական օրակարգով, ոչ թե սեկտայի կանոններով, պիտի մենք բոլորս միասին կարողանանք կանխել»,-մասնավորապես հայտարարեց ԲՀԿ ղեկավարը:

Հիմնական զեկուցող՝ ՀՀ կառավարության աշխատակազմի ղեկավար-նախարար Դավիթ Հարությունյանն իր եզրափակիչ ելույթում վստահեցրեց, որ առաջիկա երկու օրերին՝ առաջին ընթերցմամբ ընդունվելուց հետո երկրորդ ընթերցմամբ ներկայացվելիք նախագիծը, քննարկման ժամանակ հնչած առաջարկությունների հիման վրա, որոշակի փոփոխություններ կկրի:

Աղբյուր` Փաստինֆո