Փաստ ինֆո

Ժիրայր Սեֆիլյանի նկատմամբ քրեական գործ հարուցելու նպատակը նրան ամեն գնով  ազատությունից և հետևապես՝ քաղաքական գործունեություն իրականացնելու հնարավորությունից զրկելն է: Այս մասին լրագրողների հետ հանդիպմանը հայտարարել Ժ.Սեֆիլյանի պաշտպան, փաստաբան Արա Զաքարյանը:

Ավելին, ըստ նրա, քրեական գործը քաղաքական պատվեր է, մասնավորապես, ապրիլի սկզբին տեղի ունեցած մարտական գործողությունների ժամանակ տարածքային կորուստների իրական չափերի մասին Ժիրայր Սեֆիլյանի արած հայտարարությունների հետ կապված:

Պաշտպանը մեջբերել  է Քննչական կոմիտեի հայտարարությունն առ այն, որ գործով ձեռք բերված նյութերով հիմնավորվել է՝ Ժիրայր Սեֆիլյանը մի խումբ անձանց հետ ձեռք է բերել, պահել, փոխադրել զենք և ռազմամթերք, նպատակը՝ շենքեր, շինություններ, հեռուստաաշտարակը, Նուբարաշենի զորամասը գրավելը:

«Առնվազն ծիծաղ է առաջացնում ենթադրելը, որ երկու ինքնաձիգով, որպես այդպիսին, պետք է իշխանության յուրացում իրականացվեր: Սա ուղղակի զավեշտալի է»,- հայտարարել է Ա. Զաքարյանը:

Պաշտպանը լրագրողներին հայտնել է նաև, որ քննության ընթացքում բազմաթիվ խախտումներ են տեղի ունեցել, մասնավորապես, Ժիրայր Սեֆիլյանը ցանկություն է հայտնել, որպեսզի Վարուժան Ավետիսյանը ևս պաշտպանի իր շահերը: Սակայն քննչական մարմինը որոշել է, որ  Վ. Ավետիսյանին՝ որպես պաշտպան, չպետք է ներգրավել, քանի որ նրան որպես վկա հարցաքննելու կարիք կա:

Արա Զաքարյանը նշել է, որ  երեկ Ժիրայր Սեֆիլյանի հետ առերեսված  մեկ այլ անձի պահվածքից կարելի էր ենթադրել, որ նրա նկատմամբ ճնշումներ են կիրառվել, չի բացառվում, որ ճնշումները նաև ֆիզիկական են եղել: Պաշտպանը չի բացառում նաև, որ քննչական մարմինը նման խորթ մեթոդներով գործով անցնող այլ անձանց վրա ևս ճնշումներ է գործադրել: «Մեծ հավանականությամբ կարող եմ ասել, որ նրանց առջև դրել են նաև Քրեական օրենսգիրքը, ցույց տվել Քրեական օրենսգրքի 300-րդ հոդվածը՝ իշխանության յուրացում, և ներկայացրել, որ՝ եթե դուք հանկարծ ցուցմունքներ չտաք այն մասին, որ Ժիրայր Սեֆիլյանի կողմից նախապատրաստական քայլեր են կատարվել իշխանությունը յուրացնելու ուղղությամբ, ապա մենք ձեզ այս հոդվածով մեղադրանքներ կառաջադրենք: Իսկ եթե դուք այդպիսի ցուցմունքներ տաք, ապա Քրեական օրենսգրքի 300-րդ հոդվածի 3-րդ մասի համաձայն՝ կազատվեք քրեական պատասխանատվությունից: Հոդվածի սանկցիան բավական խիստ է՝ 10-15 տարի: Նման պարագայում ոչ բոլորը կարող էին դիմանալ այդ հոգեբանական, ինչո՞ւ չէ, նաև ֆիզիկական ճնշումներին»,- նշել է  Ա.Զաքարյանը:

Ասուլիսում նշվել է, որ Ժիրայր Սեֆիլյանին կալանավորելու առաջին ատյանի դատարանի որոշման դեմ արդեն իսկ բողոք է ներկայացվել Վերաքննիչ քրեական դատարան:

Աղբյուր` Փաստինֆո