Փաստ ինֆո

Երրորդմասցի Լյովիկի ու նրա ընկերների սպանության գործով դատակոչված վկաների հարցաքննությունը շարունակվում է: Ընդհանուր առմամբ գործում դատակոչվել է 55 վկա, այս պահի դրությամբ դատարանը լսել է 12 վկայի:

Այսօր Էրեբունի և Նուբարաշեն վարչական շրջանների ընդհանուր իրավասության դատարանում հարցաքննվեց 3 վկա: Հարցաքննված 3 վկաները ամբաստանյալներին չէին ճանաչում: Վկա Հարություն Մուշեղյանը, ով ըստ էության գտում է, որ ինքը տուժող պետք է ճանաչվեր և ոչ թե՝ վկա, դատարանում հայտնեց, որ 2014թ. մայիս 10-ին Րաֆֆու փողոցի 51 շենքի բակից իր «Վազ 21 07» մակնիշի ավտոմեքենան առևանգել են:

Վկան սկզբում կարծել է չար կատակ է, սակայն որոշ ժամանակ փնտրելուց հետո չգտնելով՝ հաղորդում է տվել: Վկայի խոսքով՝ 2015թ. մարտի իրեն հրավիրել են ԱԱԾ և հայտնել, որ ավտոմեքենան հայտնաբերվել է, սակայն մինչ օրս ոչ մի տեղեկություն չունի՝ որտեղ է ավտոմեքենան:

ԱԱԾ-ում նրան մխիթարել են՝ ասելով, որ բախտը բերել է, որ նրա ավտոմեքենան հայտնաբերվել է, քանի որ գողացված ավտոմեքենաները միշտ չէ, որ հայտնաբերվում են:

Հաջորդիվ հարցաքննված վկան անշարժ գույքի գործակալության սեփականատեր էր: Վկա Գոռ Պողոսյանը նշեց, որ մի քաղաքացի զանգահարել է իրենց գործակալություն, ասել, որ առանձնատուն է հարկավոր, և Նորքի այգիներում գտնվող առանձնատներից մեկն անշարժ գույքի գործակալության կողմից առաջարկվել է նրան: Վկայի խոսքով՝ ինքը մի տղամարդու հետ գնացել է, տունը տեսել են և պայմանագիր կնքել: Վկան գործարքի մանրամասները չէր հիշում, սակայն նշեց, որ սովորաբար տունը վարձակալելուց առաջ երկու ամսվա գումար են վճարում, այդկերպ էլ եղել է տվյալ դեպքում, իսկ թե քանի՞ ամիս են վարձակալները բնակվել այդ առանձնատանը՝ վկան դժվարացավ հստակ նշել: Վկայի ցուցմունքում առկա էական հակասությունների պատճառով մեղադրողի միջնորդությամբ հրապարկվեց նրա նախաքննական ցուցմունքը:

Վկայի նախաքննական ցուցմունքից պարզ դարձավ, որ Նորքի այգիներում գտնվող առանձնատունը վարձակալական հիմունքով վերցնող անձը ցանկացել է 2 ամսով տունը վարձակալել և անշարժ գույքի գործակալության տնօրենին հայտնել է, որ տունը հարկավոր է եղբոր համար, ով ժամանելու է ԱՄՆ-ից՝ կնոջ և երեխայի հետ:

Որպես ամսական վարձ՝ պայմանավորվել են, որ վարձակալները յուրաքանչյուր ամիս պետք է վճարեն 1200 ԱՄՆ դոլար, որից 200 ԱՄՆ դոլարը պետք է վճարվեր գործակալությանը: Վկան նաև նշել է, որ 2014թ. հոկտեմբերին իրենց գրասենյակում կնքվել է պայմանագիր՝ այդ առանձնատունը վարձով վերցնողի՝ վարձակալ Սարգիս Հախանումյանի և այդ գործարքը միջնորդողի միջև:

Վկան նախաքննության ընթացքում հայտնել էր նաև, որ գործով ամբաստանյալին՝ Սարգիս Հախանումյանին, նա տեսել է այդ օրը, շատ կարճ ժամանակով և չի կարող նրան նկարագրել կամ ճանաչել, իսկ նրա եղբորը, ով զբաղվում էր գործարքով, հստակ հիշում է, և կարող է ճանաչել:

Պայմանագիրը կնքելուց 1 ամիս անց առանձնատունը վարձակալական հիմունքներով տալու միջնորդ հանդիսացած անձը զանգահարել է գործակալություն և հայտնել, որ վարձակալներն ազատել են առանձնատունը:

Վկայի լրացուցիչ հարցաքննության՝ անձի ճանաչման ներկայացնելու ժամանակ վկան առանձնատան վարձակալ 4 անձանցից ճանաչել է միայն մեկին՝ Գուրգեն Հովհաննիսյանին, սակայն վկան նշել է, որ 2 անգամ է նրան տեսել և նրա դեմքը լավ չի տպավորվել:

Վկան, լսելով իր նախաքննական ցուցմունքը, պնդեց այն:

Նշենք նաև, որ այսօր դատարանը բերման ենթարկելու որոշում կայացրեց ծանուցված այն վկաների նկատմամբ, ովքեր ծանուցվել, սակայն չէին ներկայացել:

Աղբյուր` Փաստինֆո