Փաստ ինֆո

«Փաստինֆո»-ի տեղեկություններով՝ մոտ մեկ տարի առաջ անչափահասն իր խորթ հորը մեղադրել էր իր հետ սեռական հարաբերություն ունենալու մեջ: Ավելի վաղ տեղեկացրել էինք, որ անչափահասի սպանության մեջ կասկածվում է Ադրբեջանում գերության մեջ գտնված և հայրենադարձված Վերին Կարմիրաղբյուր գյուղի բնակիչ Արսեն Խոջայանը, վերջինս և անչափահասը գտնվել են մտերմիկ հարաբերությունների մեջ:

Մեր տեղեկություններով՝ անչափահաս աղջիկը նախկինում դատապարտված է եղել՝ սուտ մատնության համար:

Նա ՀՀ ոստիկանության Երևան քաղաքի վարչության Մաշտոցի բաժնում հաղորդում է տվել այն մասին, որ 2014թ. հունիս ամսից մինչև դեկտեմբեր ամիսն ընկած ժամանակահատվածում խորթ հայրը սեռական հարաբերություն է ունեցել իր հետ, որի արդյունքում, իբր, հղիացել է եւ երեխա ունեցել:

Տավուշի մարզային քննչական վարչությունում հարուցվել էր քրեական գործ, որի նախաքննությամբ, սակայն, չէին հիմնավորվել աղջկա ասածները, եւ քրեական գործ էր հարուցվել անչափահասի նկատմամբ՝ ՀՀ քրեական օրենսգրքի 333-րդ հոդվածի 2-րդ մասի 1-ին կետով, առաջադրվել մեղադրանք։

2015 թվականի նոյեմբերին քրեական գործն ուղարկվել է դատարան եւ Տավուշի մարզի ընդհանուր իրավասության դատարանի դատավճռով աղջիկը դատապարտել էր 3 ամիս ժամկետով ազատազրկման, միևնույն ժամանակ դատարանը որոշել էր դատավճիռը պայմանականորեն չկիրառել՝ սահմանելով փորձաշրջան 1 տարի ժամկետով: Այս դատավճիռը դեռեւս օրինական ուժի մեջ չի մտել, քանի որ Տավուշի մարզի նոր դատախազ Արմեն Մարուխյանը գտել է, որ հսկողություն իրականացնող դատախազի կողմից խախտվել է ընդդատության սկզբունքը, եւ դատախազը քրեական գործը պետք է ուղարկեր ոչ թե Տավուշի մարզի, այլ՝ Աջափնյակ եւ Դավթաշեն վարչական շրջանների ընդհանուր իրավասության դատարան։

Դատախազի վերաքննիչ բողոքը բավարարվել է, եւ գործն ուղարկվել ըստ ընդդատության Աջափնյակ եւ Դավթաշեն վարչական շրջանների դատարան՝ նոր կազմով: Հավանաբար ամբաստանյալի մահվան հիմքով գործի քննությունը կկարճվի:

Ի՞նչն է եղել Արսեն Խոջայանի և անչափահասի միջև վիճաբանության պատճառը

Անչափահասի սպանության համար Ա.Խոջայանին մեղադրանք է առաջադրվել ՀՀ քրեական օրենսգրքի 104-րդ հոդվածի առաջին մասով։ «Փաստինֆո»-ի տեղեկություններով՝ հունիսի 24-ին Տավուշի մարզում սպանված 17-ամյա աղջկան հասցվել է դանակի շուրջ 20 հարված:

Ինչ վերաբերում է Արսեն Խոջայանի և անչափահասի միջև դեպքի օրը ծագած վիճաբանությանը, ապա մեր տեղեկություններով՝ նրանց միջև թշնամություն չի եղել, սակայն տունդարձի ճանապարհին անչափահասը վիրավորել է Խոջայանի մորը, ինչն էլ առաջացրել է վերջինս զայրույթը և նրանց միջև տեղի ունեցածը հանգուցալուծվել է դանակահարությամբ:

Ավելի վաղ տեղեկացրել էինք, որ Խոջայանը այդ օրը գտնվել է ալկոհոլի ազդեցության տակ, իսկ ավելի վաղ երկար ժամանակ բուժվել է, քանի որ ադրբեջանական գերությունից վերադառնալուց հետո նրա մոտ ախտորոշվել էին տարբեր հիվանդություններ, անգամ՝ հոգեկան անհավասարակշիռ վիճակ։ Ըստ ամենայնի՝ նրա նկատմամբ կնշանակվի դատահոգեբուժական փորձաքննություն։

Մեզ հայտնի է դարձել նաև, որ նախորդ տարի Տավուշի մարզում մի քանի երիտասարդ դատապարտվել են անչափահաս տուժածի հետ սեռական հարաբերություն ունենալու համար։

Աղբյուր` Փաստինֆո