Փաստ ինֆո

ՀՀ կառավարության նախաձեռնությամբ այսօր գումարված ՀՀ Ազգային ժողովի արտահերթ նստաշրջանում ՀՀ կառավարության աշխատակազմի ղեկավար-նախարար Դավիթ Հարությունյանը, ներկայացնելով հունիսի 1-ից ուժի մեջ մտած Ընտրական օրենսգրքում փոփոխությունների ու լրացումների փաթեթը, պարզաբանեց, թե ինչով է պայմանավորված փաթեթում միաժամանակ ԸՕ-ի փոփոխությունների երկու օրինագծերի ընդգրկումը:

Ըստ նրա՝ առաջին նախագիծը որևէ լրացուցիչ ֆինանսավորում չի պահանջում և բխում է հստակեցումներ կատարելու անհրաժեշտությունից՝ կապված, մասնավորապես, տեղական դիտորդների ուսուցման և վարքագծի կանոնների ընդունման, քվեարկության արդյունքների վերահաշվարկի և կանանց քվոտայի ուժի մեջ մտնելու ժամկետների վերանայման հետ: Այս նախագիծն ընդունվելու դեպքում ուժի մեջ կմտնի պաշտոնական հրապարակմանը հաջորդող 10-րդ օրվանից:

Երկրորդ նախագիծը պայմանավորված է «4+4+4» բանակցային ձևաչափի մասնակից քաղաքական ուժերի հունիսի 16-ին ստորագրած նոր Ընտրական օրենսգրքում ընտրական գործընթացի օրինականության վերահսկման կազմակերպական-տեխնիկական մեխանիզմների սահմանման շուրջ փոխհամաձայնության մասին համատեղ հայտարարության մեջ ամրագրված դրույթների հիման վրա ԸՕ-ում փոփոխություններ կատարելու անհրաժեշտությամբ: Այս երկրորդ օրինագիծն ընդունվելու դեպքում, սակայն, եթե մինչև սեպտեմբերի 1-ն անհրաժեշտ ֆինանսավորումը չապահովվի, այն ուժի մեջ չի մտնի և չեղյալ կճանաչվի:

Խոսքը, մասնավորապես, ընտրողների նախագրանցման համար բոլոր ընտրողներին նոր նմուշի նույնականացման քարտեր անվճար տրամադրելու մասին է: Ըստ Դ.Հարությունյանի՝ սեպտեմբերի 1-ը որպես որոշում կայացնելու վերջնաժամկետ նշելը պայմանավորված է նրանով, որ մինչև այդ ժամկետը «պետք է գնվեն բոլոր սարքավորումները, որոնք առնվազն անհրաժեշտ են 10 մատնահետքով մարդկանց նախնական տվյալները հավաքագրելու համար»:

Նա հայտնեց, որ առաջարկվող փոփոխությունները կյանքի կոչելու համար անհրաժեշտ է 16 մլն եվրո, որից ՀՀ կառավարությունը պատրաստ է տրամադրել միայն 3 մլն-ը, մնացած գումարն ակնկալվում է ստանալ դոնոր կազմակերպություններից: Ի դեպ՝ առաջարկվող մեկ այլ փոփոխության՝ ընտրատեղամասերի տեսանկարահանման, համար անհրաժեշտ գումարն այս 16 մլն-ում ներառված չէ:

Այս կապակցությամբ «Ժառանգություն» խմբակցության անդամներ՝ Ռուբիկ Հակոբյանը և նախկին արտգործնախարար Ալեքսանդր Արզումանյանը տարակուսանք հայտնեցին առ այն, թե արդյոք աշխարհում կա որևէ պետություն, որն «եթե»-ներով օրենքներ է ընդունում և դրանք կյանքի կոչելը պայմանավորում արտաքին աղբյուրների ֆինանսավորման առկայությամբ:

Ըստ Ա.Արզումանյանի՝ դա նման է նրան, որ «հարկային օրենսդրություն ընդունես, մեջը գրես, որ եկամտային հարկն իքս տոկոս է, բայց եթե մուտքերը, հանկարծ, դոնորներից կամ վարկային միջոցներից քիչ լինեն, կդառնա իքս պլյուս 5 տոկոս, սա աբսուրդ է»:

Աղբյուր` Փաստինֆո