Փաստ ինֆո

Նախկին կնոջ սպանության մեջ մեղադրվող Արտակ Առաքելյանի գործով այսօրվա դատական նիստում մեղադրողը հայտարարեց, որ հնարավոր է, որ ինքը սպանության շարժառիթի մասով հանդես գա մեղադրանքը փոփոխելու ու նոր մեղադրանք առաջադրելու միջնորդությամբ: Ըստ մեղադրանքի, սպանության շարժառիթը խանդն է՝ ամուսնական անհավատարմության պատճառով:

Միաժամանակ մեղադրողը նշեց, որ միջնորդության վերաբերյալ ինքը վերջնական որոշում կկայացնի հաջորդ դատական նիստում լրացուցիչ վկային հարցաքննելուց հետո:

Իսկ այսօրվա դատական նիստում դատարանը բավարարեց որպես լրացուցիչ վկա տուժողի եղբոր կնոջը դատարան հրավիրելու ու հարցաքննելու մասին տուժողի իրավահաջորդի ներկայացուցիչ, փաստաբան Սեդա Սաֆարյանի միջնորդությունը: Կինը վերջինն է, ով հեռախոսով խոսել է րոպեներ անց սպանված տուժողի հետ:

Դատական նիստում մեղադրողի միջնորդությամբ ամբաստանյալի դատաքննական ու նախաքննական ցուցմունքների միջև առկա էական հակասությունների պատճառով հրապարակվեցին ամբաստանյալի՝ նախաքննության ընթացքում տված ցուցմունքները:

Դատարանում ամբաստանյալը հայտարարել էր, որ սպանությունը նախօրոք ծրագրված չի եղել: Մինչդեռ, մասնավորապես, որպես կասկածյալ տված ցուցմունքում Ա.Առաքելյանը հայտնել էր, որ երբ ինքը հասկացել է, որ կինն իրեն դավաճանել է բիզնեսում իրենց թուրք գործընկերոջ հետ, որոշել է՝ կա՛մ ինքը, կա՛մ նախկին կինը պետք է ապրի: Դանակները դրել է գրպանը, մտադրվելով սպանել կնոջը, եթե նա ներողություն չխնդրի: Կինն ի պատասխան իր հարցի՝ դավաճանե՞լ ես, պատասխանել է՝ դավաճանել եմ, լավ եմ արել, բաշարել եմ, արել եմ: Այդ խոսքերից հետո ինքը դանակով հարվածել է նրան, նախ հարվածել է կնոջ կրծքի շրջանին, երեք անգամ դանակով խորը հարվածներ է հասցրել կնոջ թիկունքին, ապա համոզվելով, որ կինը մահացել է, դուրս է եկել առևտրի տաղավարից:

Ամբաստանյալը դատարանում պնդեց իր դատաքննական ցուցմունքը՝ հայտարարելով, որ նախաքննության ընթացքում ինքը լարված վիճակում է եղել:

Դատարանն այսօր քննության առավ տուժող կողմի ներկայացրած՝ վնասների հատուցման պահանջով քաղհայցը, տուժողի իրավահաջորդը ճանաչվեց որպես քաղհայցվոր, իսկ ամբաստանյալը՝ քաղպատասխանող:

Տուժողի իրավահաջորդի ներկայացուցիչ Սեդա Սաֆարյանը դատարանին ներկայացրեց ծախսերի, այդ թվում՝ հուղարկավորության, հատուցման պահանջ՝ 2 մլն դրամի չափով: Ամբաստանյալն ու նրա պաշտպան Արշակ Թովմասյանը առարկեցին հայցի դեմ՝ մասամբ ընդունելով քաղհայցը՝ 800 հազար ՀՀ դրամի չափով:

Լրագրողների հետ զրույցում Սեդա Սաֆարյանը նշեց, որ սպանության գործերով դատական պրակտիկայում մեկուկես մլն-ի չափով պահանջը համարվում է ողջամիտ:

«Այդ գումարը լրացվել է գերեզմանի ծախսերի ներառմամբ: Այս տեսանկյունից գտնում եմ, որ պաշտպանի ներկայացրած առարկությունները հիմնավոր չեն և չեն բխում թե՛ օրենսդրությունից և թե՛ նախադեպային որոշումներով սահմանված վնասի հատուցման չափերից»,- ասաց Ս.Սաֆարյանը՝ հավելելով, որ պաշտպանական կողմը 800 հազար դրամը որպես հոգեհացի արարողության համար նախատեսված ծախս համարում է ողջամիտ գումար: Այդ գումարի մեջ պաշտպանական կողմը չի ներառել թաղման հետ կապված պարագաների, փաստաթղթային ձևակերպումների, գերեզմանում կատարված աշխատանքների և այլ ծախսեր:

Ս.Սաֆարյանը նշեց նաև, որ ամուսնական անհավատարմության մասին մեղադրական եզրակացությունում նշված շարժառիթը չունի լուրջ փաստական, իրավական հիմնավորումներ: Առավել մոտ է շարժառիթին այն փաստական տվյալն, ըստ որի ամբաստանյալը չի համակերպվել իրենից բաժանվելու կնոջ մտքի հետ, անհանդուրժողականություն է դրսևորել, ինչը հանգեցրել է սպանության:

Սեդա Սաֆարյանն ասաց, որ ինքը չի խոսել մեղադրողի հետ, չի կարող ասել, թե մեղադրանքում ի՞նչ փոփոխության մասին է խոսքը: Սակայն, հնարավոր է, որ ամուսնական անհավատարմության վերաբերյալ նաև դատաքննությամբ ապացույցներ ձեռք չբերելը մեղադրողին ևս բերել է համոզման, որ մեղադրանքում ինչ-որ փոփոխություն պետք է կատարվի:

Աղբյուր` Փաստինֆո