Փաստ ինֆո

ՀՀ կառավարության նախաձեռնությամբ կեսօրին մեկնարկեց ՀՀ Ազգային ժողովի արտահերթ նստաշրջանը: 

Օրակարգում երկու տասնյակ օրինագծեր ու օրենսդրական փաթեթներ են և 3 միջազգային պայմանագրեր: Վերջինների թվում է 2015 թվականի դեկտեմբերի 23-ին Մոսկվայում ստորագրված «Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը:

Օրակարգային հարցերի թվում է այս տարվա հունիսի 1-ից ուժի մեջ Ընտրական օրենսգրքում փոփոխությունների ու լրացումների փաթեթն է:

Հիշեցնենք, որ «4+4+4» բանակցային ձևաչափի մասնակից քաղաքական ուժերը հունիսի 16-ին ստորագրել են նոր Ընտրական օրենսգրքում ընտրական գործընթացի օրինականության վերահսկման կազմակերպական-տեխնիկական մեխանիզմների սահմանման շուրջ փոխհամաձայնության մասին համատեղ հայտարարություն:

Հայտարարությունն ստորագրած՝ ԱԺ բոլոր խմբակցությունների ներկայայցուցիչները, բացառությամբ «Ժառանգության», որն ի սկզբանե «4+4+4» բանակցային ձևաչափի մաս չի կազմել, մասնավորապես արձանագրում են, «համաձայնությունը չի նշանակում փոխհամաձայնություն (կոնսենսուս) ողջ Ընտրական օրենսգրքի շուրջ, մասնավորապես, համամասնական ընտրակարգի` տարածքային ու վարկանիշային ցուցակների մասով»:

Նշվում է նաև, որ համաձայնվող կողմերը կձգտեն Ընտրական օրենսգրքի հետագա քննարկումների ընթացքում հասնել համաձայնության նաև այլ դրույթների վերաբերյալ: Իսկ համաձայնեցված փոփոխությունների արդյունքում ներդրվող մեխանիզմները պայմանավորված են լինելու ֆինասավորմամբ և դիտարկվում են որպես մեկ ամբողջություն (փաթեթ) և դրանցից որևէ մեկից հրաժարումը կամ անհրաժեշտ ֆինանսավորման առկայության դեպքում չկիրառելը հանգեցնում է ամբողջ փաթեթի նկատմամբ համաձայնության վերացմանը:

«Փոխհամաձայնությունը մտնում է ուժի մեջ դոնոր կազմակերպությունների կողմից ամբողջ փաթեթի նկատմամբ համապատասխան ֆինանսավորման (ներառյալ նոր նմուշի նույնականցման քարտ տրամադրելու համար տվյալների հավաքագրման, տվյալների էլեկտրոնային պահոցի տեխնիկական եւ ծրագրային ապահովման եւ նույնականացման քարտերի արտադրության աշխատանքները) հաստատումը ապահովվելու դեպքում: Միաժամանակ կողմերը գիտակացում են, որ հնարավոր է ներդրման փուլային եղանակ՝ կախված ֆինանսավորման ժամանակցույցից և հասանելի ռեսուրսներից»,-մասնավորապես նշված է քաղաքական ուժերի հայտարարության մեջ:

Աղբյուր` Փաստինֆո