Փաստ ինֆո

Եվրոպայի առաջնության 1/8 եզրափակիչը մեկնարկեց Սենտ Էտիենում, որտեղ կայացավ Շվեյցարիա – Լեհաստան հանդիպումը:

Armsport.am-ի  հաղորդմամբ՝ խաղի հիմնական ու լրացուցիչ ժամանակն ավարտվեց 1:1 հաշվով և քառորդ եզրափակչի ուղեգիրը որոշվեց 11 մետրանոց հարվածաշարում, որում ավելի դիպուկ էին լեհերը (5:4):

Թիմերը խաղը սկսեցին հետևյալ կազմերով.

Շվեյցարիա. Զոմեր, Լիխշտայներ, Ռոդրիգես, Ջուրու, Շառ, Ջակա, Բեհրամի, Մեհմեդի, Ջեմաիլի, Շաքիրի, Սեֆերովիչ

Լեհաստան. Ֆաբիանսկի, Պազդան, Յենջեյչիկ, Մոնչիսկի, Պիշչեկ, Գլիկ, Կրիխովյակ, Գրոսիցկի, Բլաշիկովսկի, Միլիկ, Լևանդովսկի

Առաջին կեսն անցավ հավասար պայքարում, սակայն խաղավարտում (39-րդ րոպե) աչքի ընկան լեհերը: Արագ հակագրոհի արդյունքում Կամիլ Գրոսիցկին գնդակն ուղարկեց Յակուբ Բլաշիկովսկուն, ով դարպասապահի ոտքերի արանքով այն ուղարկեց դարպասը:

Երկրորդ կեսի սկզբում լեհերը մրցակցին չէին թողնում լրջորեն սպառնալ իրենց դարպասին, սակայն Վլադիմիր Պետկովիչի թիմն այնուամենայնիվ ուժեղացրեց ճնշումը և 82-րդ րոպեին Ջերդան Շաքիրիի շրջադարձ հարվածով խփած արտակարգ գոլի շնորհիվ հավասարեցրեց հաշիվը:

Լրացուցիչ ժամանակում գոլ խփելուն ավելի մոտ էին շվեյցարացիները, սակայն չօգտվեցին ընձեռնված պահերից: Արդյունքում, նշանակվեց հետխաղյա 11 մետրանոց հարվածաշար, որում 5:4 հաշվով հաղթեց Լեհաստանը: Որոշիչ դարձավ շվեյցարացիների 2-րդ հարվածը, որի ժամանակ Գրանիտ Ջական շեղ հարվածեց:

Քառորդ եզրափակչում Ադամ Նավալկայի թիմը կմրցի Խորվաթիա – Պորտուգալիա զույգի հաղթողի հետ:

Եվրոպայի առաջնություն. 1/8 եզրափակիչ
Սենտ Էտիեն, «Ժեֆրուա Գիշար» մարզադաշտ
Շվեյցարիա - Լեհաստան` 1:1 (հետխաղյա 11 մետրանոցներով` 4:5)
գոլերը. Բլաշիկովսկի (39) - Շաքիրի (82).

Աղբյուր` Փաստինֆո