Փաստ ինֆո

Ճիշտ կլիներ, որպեսզի Ռուսաստանը բարոյական վնասի փոխհատուցման հետ կապված չսպասեր Գյումրիում Ավետիսյանների ընտանիքի դաժան սպանության գործով դատական ակտի կայացմանը, ինքն ինչ-որ քայլեր ձեռնարկեր՝ հաշվի առնելով գործի հանգամանքները: Այս մասին «Փաստինֆո»-ի լրագրողի հետ զրույցում նշեց փաստաբան Արամազդ Կիվիրյանը՝  ընդգծելով, որ քաղաքացիական հայցի մասով աշխատել են ինքը, փաստաբաններ Լուսինե Սահակյանը, Երվանդ Վարոսյանը, սակայն գործում ներգրավված բոլոր փաստաբաններն էլ ունեն իրենց ներդրումը:  

Եթե այս առումով տուժող կողմի ակնկալիքները չարդարանան, ապա տուժողների իրավահաջորդների ներկայացուցիչները կսպասեն դատական ակտի կայացմանը:  «Եվ  արդեն կտեսնենք, թե ինչպիսի արդարադատություն է կայացնում մեր դատարանը, արդյո՞ք մեր դատարանը կունենա այդ առումով արդարադատություն իրականացնելու կամք և ցանկություն, որովհետև իրավական  մեխանիզմներն առկա են, և դատարանը կարող է դա անել»,- ասաց Ա.Կիվիրյանը:

Ավետիսյանների սպանության գործով հաջորդ նիստը նշանակվել է հունիսի երեսունին, մինչ այդ տուժող կողմի ներկայացրած քաղաքացիական հայցը պետք է թարգմանվեր ու ուղարկվեր ՌԴ, դեռևս այդ մասով տուժող կողմի ներկայացուցիչները նորություն չունեն: 

Քաղհայցը ներկայացվել է Հայաստանի օրենսդրությունում բարոյական վնասի փոխհատուցման ինստիտուտի ներդրմանն ուղղված  նոր իրավակարգավորումների լույսի ներքո:

Տուժող կողմը Ռուսաստանի Դաշնության դեմ ներկայացրել է քաղհայց՝ 450 հազար եվրոյի չափով բարոյական վնասի հատուցման պահանջով:

Տուժող կողմի ներկայացված քաղհայցով ընտանիքի ամեն չափահաս անդամի կյանքի իրավունքի խախտման համար ներկայացվել է բարոյական վնասի հատուցման պահանջ՝ 50 հազարական եվրոյի, իսկ երկու մանկահասակ երեխայի կյանքի իրավունքի խախտման համար՝ 100 հազարական եվրոյի չափով:

Լուսանկարը՝ «Ա1+»-ի 

Աղբյուր` Փաստինֆո