Փաստ ինֆո

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը՝ նախագահությամբ Արմեն Բեկթաշյանի, խուլիգանության մեջ մեղադրվող Արմեն Ասատրյանին այսօր անպարտ ճանաչվեց և արդարացվեց՝ հանցակազմի բացակայության հիմքով:

«Փաստինֆո»-ի թղթակցի հետ զրույցում այդ մասին ասաց Արմեն Ասատրյանի պաշտպան Լիպարիտ Սիմոնյանը:

Դատախազը հիմնավորված համարելով Ասատրյանին առաջադրված մեղադրանքը միջնորդել էր նրան դատապարտել 1 տարի ժամկետով ազատազրկման:

Նշենք նաև, որ ի սկզբանե Ասատրյանի նկատմամբ որպես խափանման միջոց է ընտրված եղել չհեռանալու մասին ստորագրությունը՝ սակայն վերջին կողմից նիստերին չներկայանալու հիմքով դատավոր Բեկթաշյանը նրա խափանման միջոցը փոփոխել է և կալանավորումն ընտրել:

Ասատրյանը 6 ամսի գտնվում էր կալանքի տակ և այսօր դատավճռի հրապարակումից հետո ազատ արձակվեց դատական նիստերի դահլիճից:

Ըստ մեղադրանքի՝ Արմեն Ասատրյանը 2012թ. Երևանի Բաղրամյան պող. 1/1 հասցեում գտնվող «Կայոտ» ակումբում ինքնությունները չպարզված անձանց հետ մոտ 20 րոպե տևողությամբ դիտավորությամբ հասարակական կարգը կոպիտ կերպով խախտելով և բացահայտ անհարգալից վերաբերմունք դրսևորելով վիճաբանել է Աղասի Ստամբոլթյանի հետ, բարձրաձայն տվել է սեռական բնույթի հայհոյանքներ, որի ընթացքում ձեռքերով մի քանի անգամ հարվածել է վերջինիս դեմքին, դիտավորությամբ վերջինիս առողջությանը պատճառել միջին ծանրության վնաս:

Արմեն Ասատրյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1, 4 կետերով:

Աղբյուր` Փաստինֆո