Փաստ ինֆո

Գյումրիում մոր և որդու սպանության գործով «Փաստինֆո»-ին նոր մանրամասներ են հայտնի դարձել:

Մեր տեղեկություններով՝ դաժանաբար սպանված Հակոբյանները ճանաչել են իրենց նկատմամբ բռնություն գործադրած անձին, ավելին՝ նրան պարբերաբար ապաստան տվել իրենց տանը, իսկ դեպքը օրն էլ հյուրասիրել ու միասին խմել։

Նախկինում դատված Գոռ Խաչատրյանը հաճախակի է այցելել Սարգիս և Սիրիկ Հակոբյաններին, անգամ բնակվել է նրանց տանը, իսկ դեպքի օրը հունիսի 17-ին նրանց մոտ հյուրընկալվել է ընկերուհու հետ միասին եւ  չորսով  խմել են։  Գտնվելով ալկոհոլի ազդեցության տակ Խաչատրյանի և Սարգիսի միջև վիճաբանություն է ծագել, ինչն ուղղակիորեն առնչվել է Խաչատրյանի մտերմուհուն,  հնչել են նաև հայհոյանքներ:

Տղամարդկանց միջև վիճաբանությանը միջամտել են կանայք, որի ժամանակ կասկածյալը մոր և որդու նկատմամբ բռնություն է գործադրել:

Այս ամենից հետո, կրքերը հանդարտվել են և Գոռ Խաչատրյանը իր մտերմուհու հետ պառկել է քնելու հենց իր զոհերի տանը:

Դեպքի հաջորդը օրը նրանք լքել են Հակոբյանների տունը:

Ավելի վաղ տեղեկացրել էինք, որ հունիսի 20-ին՝ հաղորդում էր ստացվել, որ մայրը և որդի չեն արձագանքում և նրանց տնից տհաճ հոտ է գալիս: Պարզվել է, որ նրանց տնակում հայտնաբերել է 1936 թ. ծնված Սիրիկ Հակոբյանի և 1960 թ. ծնված Սարգիս Հակոբյանի դիակները:

Մայիսի 21-ին ստացված դատաբժշկական եզրակացության համաձայն՝ նրանց մահը վրա էր հասել «փակ գանգուղեղային վնասվածքի» հետևանքով:

Փաստի առթիվ հարուցվել է քրեական գործ` ՀՀ քրեական օրենսգրքի 104-րդ հոդվածի 2-րդ մասի 1-ին կետի հատկանիշներով:

Գոռ Խաչատրյանը ձերբակալված է:

Աղբյուր` Փաստինֆո