Փաստ ինֆո

Եվրոպայի 2016թ. առաջնության D խմբի վերջին տուրում Չեխիայի ընտրանին «Ֆելիքս Բոլար» մարզադաշտում ընդունեց Թուրքիայի հավաքականին: 

Armsport.am-ի հաղորդմամբ՝ խաղը մեկնարկեց նոմինալ հյուրերի առավելությամբ: Խաղի հենց մեկնարկից թուրքերը հասկացրեցին չեխերին, որ չեն պատրաստվում մրցաշարում կրել երրորդ անընդմեջ պարտությունը:

Հանդիպման հաշիվը բացվեց 10-րդ րոպեին: Էմրե Մորի փոխանցումից հետո գոլի հեղինակ դարձավ Բուրաք Յիլմազը: Սեփական դարպասը գնդակ ընդունելուց հետո չեխերը շարժվեցին առաջ, սակայն չկարողացան վշտացնել թուրք երկրպագուներին:

Խաղի հաշիվը կրկնապատկվեց երկրորդ խաղակեսի միջնամասում: 65-րդ րոպեին Մեհմեդ Թոփալի փայլուն փոխանցումից հետո Պետեր Չեխի պաշտպանած դարպասը գրավեց Օզան Թուֆանը:

Այսպիսով, Թուրքիայի ընտրանին կարողացավ երկու անպատասխան գնդակ ուղարկել Չեխիայի հավաքականի դարպասը եւ պահպանել հաջորդ փուլ դուրս գալու հնարավորությունները:

Հավելենք, որ 1/8 եզրափակիչում արդեն հայտնի են Իտալիա–Իսպանիա եւ Շվեյցարիա–Լեհաստան զույգերը:

Թիմերը խաղադաշտ դուրս եկան հետեւյալ մեկնարկային կազմերով.

Չեխիա - Չեխ, Կադերժաբեկ, Գուբնիկ, Սիվոկ, Նեցիդ, Դոչկալ, Պուդիլ, Պլաշիլ, Պավելկա, Կրեյչի, Դարիդա

Թուրքիա - Բաբաջան, Բալթա, Գյոնուլ, Ինան, Թուրան, Կեյբաշի, Թոփալ, Թուֆան, Յիլմազ, Շեն, Մոր

 Չեխիա-Թուրքիա՝ 0:2

Գոլերը՝ Յիլմազ (10), Թուֆան (65)

Աղբյուր` Փաստինֆո