Փաստ ինֆո

Երրորդմասցի Լյովիկի ու նրա ընկերների սպանության գործով այսօր Էրեբունի և Նուբարաշեն վարչական շրջանների ընդհանուր իրավասության դատարանում հարցաքննվեց ևս 4 վկա:
Վկաներից մեկը գործով ամբաստանյալ, Ծգլ մականվամբ Սարգիս Գրիգորյանի մորաքրոջ որդին էր, ով աշխատում է ԱԱԾ-ում:

Վկա Արթուր Հակոբյանը ճանաչում էր նաև Տլե մականվամբ ամբաստանյալ Սարգիս Հախանումյանին. վերջինիս տեսել էր մորաքրոջ որդու՝ Սարգիս Գրիգորյանի տանը:

Վկայի խոսքով, երբ իրեն հրավիրել են ԱԱԾ հարցաքննելու, տեսանյութեր են ցուցադրել, և քննիչը նրան հարցրել է, թե արդյոք տեսանյութում երևացող անձանց մեջ կա՞ մորաքրոջ որդին: Դատարանում վկան հայտնեց, որ այդ տեսանյութերում ոչինչ չէր երևում և ոչ ոքի չի ճանաչել, սակայն մեղադրող դատախազների միջնորդությամբ հրապարակված նախաքննական ցուցմունքներից պարզվեց, որ վկան նախաքննության ընթացքում հայտնել է, որ տեսանյութերից մեկում երևում է իր մորաքրոջ որդին՝ գործով ամբաստանյալ Սարգիս Գրիգորյանը:

ԱԱԾ համակարգում 15 տարվա աշխատանքային փորձով վկան նախ պնդում էր, որ նախաքննության ընթացքում ցուցմունքը ինքը չի գրել, ապա նաև նշեց, որ ԱԱԾ քննիչը գրած տվել է ինքն էլ՝ արտագրել: Իր իսկ կողմից ստեղծ խառնաշփոթից դուրս գալու համար էլ հայտնեց, որ ինքը մի ուրիշ բան է ցանկացել ասել, բայց ուրիշ բան է ստացվել: 

Նիստը նախագահող դատավոր Արտուշ Գաբրիելյանի հարցին, թե վկան նախաքննության ընթացքում սուտ ցուցմու՞նք է տվել, վկան բացասական պատասխան տվեց, սակայն պնդեց որ այդ տեսանյութերում ոչինչ չէր երևում, և որ ինքը չի ասել, թե մորաքրոջ տղային է տեսել: Ի վերջո վկան ընդունեց նաև, որ նախաքննական ցուցմունքը գրել է իր ձեռքով:

Հաջորդիվ հարցաքննվեց վկա Ռուդիկ Խլոյանը, ով ամբաստանյալներին չի ճանաչում, իսկ դեպքի օրը գնացել էր «Նուբարաշեն» ՔԿՀ՝ ընկերոջը տեսակցելու, լսելով ձայներ՝ մտածել է հրավառություն է, ապա նաև հավելեց, որ «ժողովրդի ձայներ էր գալիս, ամենքը մի կողմ էին վազում»:

Այս դեպքում էլ հրապարակվեց վկայի նախաքննական ցուցմունքը, ըստ որոնց՝ նա ինտենսիվ կրակոցների ձայներ է լսել, տեսել է ատրճանակով կրակող անձի: Վերջին դրվագի վերաբերյալ վկան նշեց, որ այն որ հայտնել է, թե իբր ատրճանակով կրակող անձի է տեսել, դա տարածքում հավաքված անձանց խոսակցությունից է պատմել, ինքն անձամբ չի տեսել:

Այսօր հարցաքննված երրորդ վկան էլ տաքսու վարորդ էր, նա այդ օրը ուղևոր է տարել քրեակատարողական հիմնարկ և ինքը մեքենայի մեջ նստած սպասել: Վկա Գրիգոր Իսրայելյանը հայտնեց, որ ուղևորին սպասելու ընթացքում քնել է, իսկ արթնացել է կրակոցների ձայներից, ապա գլուխը մտցրել է «շիտոկ պրիբորի տակ»:

Ըստ վկայի՝ այդ կրակոցները տևել են մոտ 5 րոպե, կրակոցների հետևանքով վնասվել է նաև իր ավտոմեքենան, այլ գործողություններ որևէ անձի կողմից վկան չէր տեսել: Սակայն հայտնեց, որ կրակոցները հնչել են ավտոմատից և արձակվել է շուրջ 15 կրակոց:

Վկայի ցուցմունքներում առկա էական հակասությունների պատճառով հրապարկվեց նրա նախաքննական ցուցմունքը, ըստ որի՝ վկան իր ավտոմեքենայում ննջել է, սակայն լսելով բարձրաձայն հնչող հայհոյանքներ՝ վեր է կացել պառկած դիրքից և նկատել, որ իր մեքենայի ձախակողմյան հատվածում կայանված ավտոմեքենան վարորդի կողքի նստատեղի բաց դռան մոտ սև դիմակով կանգնած տղամարդ է եղել՝ ավտոմատը ձեռքին, վերջինս բարձր հայհոյելով առաջացել է ու կրակահերթ արձակել:

Վկան նաև նկատել է մեկ այլ դիմակավորված անձի ևս, ով կրկին այդ մեքենայից է իջել, «բայց քանի որ իրավիճակից սարսափած է եղել կրկին պառկել է մեքենայի մեջ, այդ ժամանակ լսել է նաև մենահատ կրակոցներ, որոնք ըստ իրեն ատրճանակից են կրակվել:

Նախաքննական մարմին վկան հայտնել է, որ կրակոցները տևել են 2-3 րոպե, իսկ երբ դադարել են, ինքը մեքենայից դուրս եկել ու գնացել դեպի ՔԿՀ, այդ ժամանակ նկատել է ինչ որ մեկին արնաշաղախ գետնին ընկած:

Վկան, լսելով իր նախաքննական ցուցմունքը, պնդեց այն:

Հաջորդիվ հարցաքննված վկան, ինչպես պարզվեց, հոգեկան առողջության հետ կապված խնդիրներ ունի և նախաքննության փուլում էլ հարցաքննվել էր այլ անձի ներկայությամբ:

Վկաների հարցաքննությունը կշարունակվի հունիսի 28-ին:

Աղբյուր` Փաստինֆո