Փաստ ինֆո

Բնակարանի դուռն ուշ ժամի ծեծելու և անհանգստացնելու կապակցությամբ ծագած վիճաբանության ու սպանության գործով այսօր շարունակվեց վկաների հարցաքննությունը:

Վկաներից մեկն ամբաստանյալի հարևանուհին էր, երկուսը՝ տուժողի մերձավոր ազգականները:

Տուժողի զարմուհին հայտնեց, որ տուժողը ճարտարապետ էր, աշխատանք ուներ, ֆինանսական խնդիրներ էլ չուներ, ոգելից խմիչքի նկատմամբ սեր չուներ, շատ հանգիստ, պարզ, հավասարակշռված անձնավորություն էր: Դեպքի օրը՝ գիշերը, տուժողը գյուղից եկած ազգականի հետ դուրս են եկել օդափոխվելու, սակայն հետո մտքափոխվել են և տուժողի առաջարկով գնացել են մի շենք՝ տեսնելու տուժողի հավանած աղջիկն այնտե՞ղ է բնակվում, թե՝ ոչ: Երկու անգամ նույն դուռը ծեծելուց հետո «Վազգենի վրա հարձակվել, խփել են դանակով»:

Ըստ տուժողի զարմուհու, իր հարազատը կոնֆլիկտային մարդ չի եղել, չի մասնակցել կոնֆլիկտների, որևիցե հոգական խնդիրներ չի ունեցել: «Ես նրանից որևէ ագրեսիա, բորբոքված վիճակ չեմ տեսել», - ասաց վկան:

Տուժողի ազգականը նշեց, որ ինքը չի արդարացնում իր զարմիկին, պետք է գիշերը ուշ ժամի չգնար ու ծեծեր ուրիշի դուռը, դա իր կյանքում առաջին դեպքն էր: Ըստ վկայի, տուժողը տուն էլ ժամը 23-ից ուշ չէր վերադառնում:

Վկան, ով դեպքի հանգամանքների մասին տեղեկացել էր ականատես վկա ազգականից, նշեց, որ վերջինս ասել է իրեն՝ «սխալ ենք արել, այդպես ստացվեց»: Վկան էլ իր հերթին նշեց՝ սխալ են արել, որ երկրորդ անգամ դուռը ծեծել են:

Տուժողի հորաքույր վկան էլ նշեց, որ տուժողը շատ փակ, ամաչկոտ մարդ էր: Այս վկան էլ դեպքի ականատես չի եղել և գործի հանգամանքներից տեղեկացել է պատմածներից: Նա հայտնեց, որ լսել է, որ եղբորորդին ազգականի հետ ուշ ժամի անհանգստացրել են բնակչին և նրան ոչ թե սպանել են, այլ՝ մորթել:

Երրորդ վկան, ով շենքում ընդամենը երկու ամիս բնակված ամբաստանյալի հարևանուհին էր, շատ դրական բնորոշեց ամբաստանյալին՝ Գագիկ Աբրահամյանին՝ «բարեհամբույր, լավ տղա է»:

Ըստ վկայի, ինքը լսել է աղմուկ, հրմշտոց, թրխկոց, լսել է ամբաստանյալի կնոջ բարձրաձայն գոռոցները՝ «դո՛ւրս եկեք իմ տնից» և մտածել է, որ ամբաստանյալը կնոջն է ծեծում, ցանկացել է բարձրանալ մեկ հարկ վերև ու սաստել Գագիկին, ասել՝ կնոջդ հանգիստ թող, սակայն չի գնացել: Հետո լսել է տղամարդկանց ձայներ, ընդ որում, ոչ թե մուտքում, այլ ավելի շուտ միջանցքում: Լսել է նաև, թե ինչպես մի տղամարդ բարբառով գոռում էր՝ շտապօգնություն կանչեք, մեռնում է:

Ինչո՞ւ ամբաստանյալի կնոջ բացականչությունը՝ «դուրս եկեք իմ տնից», հարցաքննված այլ հարևաններ չեն լսել, դատարանի հարցին ի պատասխան վկան հայտնեց, որ իր բնակարանը ամբաստանյալի բնակարանից մեկ հարկ ներքև է՝ նույն ուղղությամբ, և ցանկացած աղմուկ լսվում է:

Հաջորդ դատական նիստում նախաքննական ու դատաքննական ցուցմունքների միջև առկա հակասությունների պատճառով կհրապարակվեն վկայի նախաքննական և առաջին դատաքննության ընթացքում տված ցուցմունքները և հակասությունների շուրջ վկան կհարցաքննվի:

Հիշեցնենք, որ ըստ մեղադրանքի, Գագիկ Աբրահամյանը 2015թ. հունվարի 18-ին իր իսկ բնակարանի դռան դիմացի աստիճանահարթակում, իր բնակարանի դուռը ուշ ժամի ծեծելու և իրենց անհանգստացնելու կապակցությամբ ծագած վիճաբանության ընթացքում ապօրինաբար կյանքից զրկելու դիտավորությամբ դանակով հարվածներ է հասցրել Վազգեն Դալլաքյանի կենսական կարևոր օրգաններ հանդիսացող դեմքի, կրծքավանդակի առաջնային, հետին մակերեսների և որովայնի շրջանում՝ սպանելով նրան:

Գործը նախկինում քննվել է դատավոր Մարինե Մելքոնյանի նախագահությամբ, ապա նրա այլ դատարան աշխատանքի անցնելու կապակցությամբ տեղի է ունեցել դատարանի կազմի փոփոխություն, և գործը մակագրվել է այլ դատավորի՝ Արմեն Խաչատրյանին: Ներկայումս գործով ընթանում է արդեն երկրորդ դատաքննությունը:

Աղբյուր` Փաստինֆո