Փաստ ինֆո

Բանդիտիզմի վերաբերյալ գործից անջատված՝ «Հայբիզնեսբանկ»-ից առանձնապես խոշոր չափերի գումարի հափշտակության գործով այսօր  Վերաքննիչ քրեական դատարանը հրապարակել է իր որոշումը մեղադրողի ու պաշտպանական կողմի բողոքների վերաբերյալ:

Այսպես, մասնավորապես, Վերաքննիչ դատարանը փոփոխել է ամբաստանյալ Մնացական Սարգսյանի մասով առաջին ատյանի դատարանի դատավճիռը: Նա մեղավոր է ճանաչվել ՀՀ քրեական օրենսգրքի 38-181-րդ հոդվածի 3-րդ մասի 1-ին կետով՝ համակարգչային տեխնիկայի օգտագործմամբ առանձնապես խոշոր չափերի հափշտակությանն օժանդակելը, և 235-րդ հոդվածի 1-ին մասով՝ ապօրինի կերպով զենք զենք ձեռք բերելը, պահելը, և դատապարտվել հինգ տարվա ազատազրկման: Միաժամանակ համաներման որոշման կիրառմամբ Վերաքննիչ դատարանը Մ.Սարգսյանին ազատել է  նշանակված պատժից ու անհապարաղ ազատել կալանքից դատական նիստերի դահլիճում, բնակարանի նրա բաժնեմասի վրա դրված արգելանքը վերացվել է:

Առաջին ատյանի դատարանի դատավճռով Մ. Սարգսյանը դատապարտվել էր 5  տարվա ազատազրկման:

Դատավճիռը փոփոխվել է նաև համակարգչային տեխնիկայի օգտագործմամբ առանձնապես խոշոր չափերի հափշտակությանն օժանդակելու մեջ մեղադրվող Վահե Ստեփանյանի մասով՝ նա Վերաքննիչ դատարանի որոշմամբ մեղավոր է ճանաչվել հիշյալ մեղադրանքում և դատապարտվել չորս տարվա պայմանական ազատազրկման՝  երեք տարվա փորձաշրջանով: Առաջին ատյանի դատարանի դատավճռով Վահե Ստեփանյանը դատապարտվել էր 4  տարվա ազատազրկման, նրա նկատմամբ որպես խափանման միջոց ընտրված չհեռանալու վերաբերյալ ստորագրությունը թողնվել էր անփոփոխ՝ մինչև դատավճռի օրինական ուժի մեջ մտնելը, պատժի կրման սկիզբը պետք է հաշվվեր նրան փաստացի արգելանքի վերցնելու պահից: 

Դատավճիռը բեկանվել ու փոփոխվել է ամբաստանյալ Էդիտա Ալիխանյանի մասով՝ նա, Վերաքննիչ դատարանի որոշմամբ  մեղավոր է ճանաչվել ՀՀ քրեական օրենսգրքի 214-րդ հոդվածի  2-րդ մասով՝ առևտրային ծառայողի կողմի լիազորությունները չարաշահելը, որն ծանր հետևանքներ է առաջացրել, և 181-րդ հոդվածի 3-րդ մասի 1-ին կետով՝ համակարգչային տեխնիկայի օգտագործմամբ առանձնապես խոշոր չափերի հափշտակություն,  նրա նկատմամբ նշանակվել է ազատազրկում հինգ տարի ժամկետով, որից նրան մնացել է կրել երկու տարի երկու ամիս 13 օրը: Նրա նկատմամբ ընտրվել է չհեռանալու ստորագրություն խափանման միջոցը՝ մինչև  դատական ակտի օրինական ուժի մեջ մտնելը:

Առաջին ատյանի դատարանի դատավճռով Է. Ալիխանյանի մասով որոշվել էր պայմանականորեն չկիրառել նույն այդ պատիժը և սահմանվել էր փորձաշրջան 3 տարի ժամկետով, նրա նկատմամբ որպես խափանման միջոց ընտրված կալանքը վերացվել էր,  և նա ազատ էր արձակվել դատական նիստերի դահլիճում:

Համակարգչային տեխնիկայի օգտագործմամբ առանձնապես խոշոր չափերով հափշտակությանն օժանդակելու մեջ մեղադրվող Գոհար Գաբրիելյանի նկատմամբ առաջին ատյանի դատարանի դատավճիռը թողնվել է օրինական ուժի մեջ, այդ մասով մեղադրողի բողոքը մերժվել է:

Առաջին ատյանի դատարանի դատավճռով Գոհար Գաբրիելյանը դատապարտվել էր 4  տարվա պայմանական ազատազրկման՝ երեք տարվա փորձաշրջանով, միաժամանակ համաներման որոշման կիրառմամբ նա ազատվել էր պատժի կրումից։

Ամբաստանյալ Մնացական Սարգսյանի պաշտպան Լիանա Գրիգորյանն իր վերաքննիչ բողոքում միջնորդել էր ամբողջությամբ բեկանել առաջին ատյանի դատարանի դատավճիռը՝ Մնացական Սարգսյանի մասով, հռչակել նրա անմեղությունը առաջադրված մեղադրանքում և արդարացնել, իսկ առաջադրված մեղադրանքները հիմնավոր գտնելու դեպքում պաշտպանը միջնորդել էր պատիժը պայմանականորեն չկիրառել և նշանակել փորձաշրջան, միաժամանակ  համաներման որոշման կիրառմամբ նրան ազատել պատժից:

Ամբաստանյալ Վահե Ստեփանյանի պաշտպան Ռևիկ Գաբրիելյանը վերաքննիչ բողոքում միջնորդում էր բեկանել հիշյալ դատավճիռը, կայացնել նոր դատական ակտ` ամբաստանյալ Վահե Ստեփանյանի նկատմամբ նշանակված պատիժը պայմանականորեն չկիրառելու մասին:

Մեղադրող Հ.Հակոբյանը միջնորդել էր բեկանել և փոփոխել դատավճիռը Էդիտա Ալիխանյանի և Գոհար Գաբրիելյանի նկատմամբ նշանակված պատիժների մասով՝  Էդիտա Ալիխանյանի և Գոհար Գաբրիելյանի նկատմամբ պատիժ սահմանել ազատազրկում 5 տարի ժամկետով:

Աղբյուր` Փաստինֆո