Փաստ ինֆո

Սանկտ Պետերբուրգում Ռուսաստանյան Դաշնության նախագահ Վլադիմիր Պուտինի՝ Հայաստանի Հանրապետության նախագահ Սերժ Սարգսյանի հանդիպմանը քննարկվել են երկկողմ հարաբերությունների զարգացման հեռանկարները, ինչպես նաև իրադրությունը Լեռնային Ղարաբաղում: Ռուսաստանի նախագահի պաշտոնական կայքէջի փոխանցմամբ, ՌԴ նախագահն իր խոսքում նշել է, որ երկու նախագահները որոշ հարցերի շուրջ բավականին հիմնավոր խոսել են: Զրույցի սկզբում ավելի ընդլայնված կազմով՝ չնայած «համաշխարհային ու մեր տնտեսության բոլոր բարդություններին», արձանագրվել է ապրանքաշրջանառության աճ:

Մասնավորապես, ըստ Վ.Պուտինի, հայկական կողմից զգալիորեն աճել են գյուղատնտեսական ապրանքների մատակարարումները ռուսաստանյան շուկա, ինչը «մեզ շատ ուրախացնում է»: ՌԴ ղեկավարը հույս է հայտնել, որ այդ միտումը կամրապնդվի ընդհանրապես ապրանքաշրջանառության զարգացման և «մեր համար զգայուն ապրանքների խմբերի առումով»:

Կարելի է նշել, որ ինտեգրացիոն գործընթացի շրջանակում երկկողմ հարաբերություններն ավելի ինտենսիվ են զարգանում, քան դա եղել է ավելի վաղ երկկողմ հիմքի վրա, ինչը «նույնպես մեզ շատ է ուրախացնում», նշել է Վ.Պուտինը:

«Կա հնարավորություն ու անհրաժեշտություն խոսել այն մասին, թե ինչպես ենք գործելու հետագայում: Հայաստանն այժմ գլխավորում է ՀԱՊԿ-ն և աշնանը տեղի կունենա հանդիպում բարձր մակարդակով: Ե՞րբ եք նախատեսում»,- ՀՀ նախագահին հարց է ուղղել Վ.Պուտինը և ստանալով պատասխան՝ հոկտեմբերին, դիմելով ՀՀ նախագահին՝ հավելել է. «Այնպես որ այդ առումով էլ կխոսենք: Մենք շատ ուրախ ենք Ձեզ տեսնել: Շնորհակալություն, որ ընդունեցիք մեր հրավերը»:

Աղբյուր` Փաստինֆո