Փաստ ինֆո

Եվրոպայի ժողովրդական կուսակցության նախագահ Ժոզեֆ Դոլը և ԵԽ խորհրդարանական վեհաժողովի ԵԺԿ քաղաքական խմբի ղեկավար Ալեքս Ֆիշերը դատապարտել են Թուրքիայի
իշխանությունների պահվածքը և պատգամավորներին ուղղված սպառնալիքները Բունդեսթագի կողմից Հայոց ցեղասպանության դատապարտումից հետո: Ինչպես հաղորդում է «Արմենպրես»-ը, այս մասին «Ֆեյսբուք»-ի իր էջում գրել է ԱԺ ՀՀԿ խմբակցության պատգամավոր, ԵԽԽՎ հայաստանյան պատվիրակության անդամ Սամվել Ֆարմանյանը, ով մասնակցել է ԵԽԽՎ-ի ԵԺԿ քաղաքական խմբի նիստին:

«ԵԽ խորհրդարանական վեհաժողովի ԵԺԿ քաղաքական խմբի նիստի մեկնարկին, ԵԺԿ նախագահ Յոզեֆ Դոլը և խմբի ղեկավար Աքսել Ֆիշերը, ի պատասխան իմ կողﬕց բարձրացված մտահոգության` Բունդեսթագի պատմական որոշման և դրան հաջորդված թուրքական սպառնալիքների առնչությամբ, միանշանակ դատապարտեցին Թուրքիայի իշխանությունների պահվածքը և պատգամավորներին ուղղված սպառնալիքները: Թեման իր շարունակությունը կստանա լիագումար նիստում, երբ քննարկման առանցքում կլինի Թուրքիան»,- գրել է պատգամավորը:

Գերմանիայի Բունդեսթագը հունիսի 2-ին ընդունեց Հայոց ցեղասպանության ճանաչման բանաձևը, որն ունի «1915 և 1916 թվականներին հայերի և մյուս քրիստոնյափոքրամասնությունների ցեղասպանության հիշատակի և ոգեկոչման մասին» անվանումը: Բանաձևն ընդունվեց՝ ստանալով ընդամենը մեկ դեմ, մեկ ձեռնպահ ձայն: Ելույթ ունեցողները միաձայն ընդգծում էին անցյալի հետ առերեսման անհրաժեշտությունը, նաև` Հայաստանի և Թուրքիայի հաշտեցման գործընթացին նպաստելու մղումները:

Բունդեսթագում բարձրաձայնվել է Օսմանյան Թուրքիայի ոճրագործության մասին` նշելով, որ Գերմանիայի քայլը ոչ թե հայց է և մեղադրանք, այլ խոնարհում զոհերի հիշատակի առջև: Թուրքիան առաջին քայլով հետ կանչեց Գերմանիայում իր արտակարգ եւ լիազոր դեսպանին, ապա մեղադրանքներ հնչեցրեց Բունդեսթագի թուրքական արմատներ ունեցող պատգամավորների նկատմամբ, ինչը բողոքի լայն ալիք բարձրացրեց Բունդեսթագի ներսում ընդդեմ Թուրքիայի, ընդհուպ մինչեւ Բունդեսթագի նախագահ Նորբերթ Լաﬔրթի՝ Էրդողանին ուղղված հայտարարությունը. «Առանձին պատգամավորների վրա սպառնալիքների միջոցով ճնշում գործադրել նշանակում է հարձակվել ողջ խորհրդարանի վրա»:

Աղբյուր` Փաստինֆո