Փաստ ինֆո

2015թ. հունվարի 29-ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով այսօր Ավան և Նոր-Նորք վարչական շրջանների ընդհանուր իրավասության դատարանում հարցաքննվեց երկրոդ տուժողը, ում ցուցմունքները նախորդ տուժողի ցուցմունքներից գրեթե չէին տարբերվում:

Տուժող Կարեն Բաղրամյանը այս գործով 6 տուժողներից մեկն է, սակայն նա նաև ամբաստանվում է Հ. Բարսեղյանի սպանության գործի շրջանակներում բացահայտված մեկ այլ գործով:

Տուժողը վստահաբար նշեց, որ Հայկազ Բարսեղյանը սպանվել է, սակայն պատճառներին տեղյակ չէր:

Միևնույն ժամանակ խնդրեց դատարանին, որ Հայկազ Բարսեղյանի նկատմամբ այս հանցագործությունը կատարողները պատժվեն:

Նկարագրելով դեպքի օրվա իրադարձությունները` տուժողն ասաց, որ արթնացել է ձայներից, լսել է Հայկազ Բարսեղյանի «ախ» բացականչությունը, ապա տեսել, որ Գնել Թևոսյանը ձեռքի կտրուկ շարժում է կատարել՝ վերևից իջեցնելով ներքև, որից հետո Հայկազ Բարսեղյանը փսխել է, ապա լսել խոսակցություններ՝ «ադիալը քաշի»:

Տուժողի խոսքով՝ այդ ընթացքում Նորիկ Սահակյանը բաճկոնների միջից քուղերն է հանել:

Վկան պատմելով լսել է, որ Մովսես Ազարյանը ցանկացել է  նամակ գրել, սակայն սենյակը լավ լուսավորված չի եղել, իսկ մինչ այդ խոսակցություններ են գնացել Հայկազի դին պատշգամբից նետելու մասին, «սակայն նրանք հասկացան, որ դա ինքնասպանության փորձ կարող է չդիտվեր»,- ասաց տուժողը:

Ըստ նրա՝  «ինքնասպանություն» բառից հասկացել է, որ Հայկազի վրա ուժ են գործադրել:

Տուժողը նաև  լսել է, որ թղթի վրա գրել են «ոչ ոքի բան չասեք, ոչ ոք մեղավոր չէ, ուղղակի հոգնել եմ»: Տուժողը նաև նշեց, որ այդ գրությանը ինքը նախաքննության փուլում տեսել է, իսկ ամբաստանյալ Մովսես Ազարյանի պաշտպան Անահիտ Հովհաննիսյանի հարցին, թե ինչպես է գրված եղել «ուղղակի» բառը նա պատասխանեց, որ 2 ղ-ով:

Մինչդեռ, նշենք, որ այդ գրության մեջ ուղղակի բառը գրված է «ուղակի»:

Ըստ տուժողի ինքը ծածկոցի տակ թաքնված է եղել, սակայն մի քանի անգամ ծածկոցը ետ է քաշել որպեսզի ամբաստանյալների գործողություններն ավելի ստույգ տեսնի: Տեսել է, որ Մովսես Ազարյանը և Նորիկ Սահակյանը դուրս են եկել ննջարանից, ապա նաև լսել է, որ Մովսես Ազարյանն ասել է` «Վարոն»  ներքևում սպասում է»:

Նշենք, որ «Վարո» ասելով տուժողը նկատի ուներ  գործով ամբաստանյալ Վարազդատ Սաֆարյանին:

Ըստ տուժողի` ինքը տեսել է, թե ինչպես են ննջարանից դուրս գալով Գնել Թևոսյանը և Նորիկ Սահակյանը իրենց հետ տարել  Հայկազ Բարսեղյանին. Հայկազի գլխին եղել է զինվորական գլխարկ, իսկ բաճկոնը գցած է եղել նրա ուսերին:

Քիչ անց Գնել Թևոսյանը վերադարձել է ննջարան, վառել  լույսն ու սպառնացել` ասելով.  «կատարվածի մասին, ով ինչ որ մեկին ինչ որ բան ասի, որտեղ որ լինի կգտնի … » և հայհոյել է:

Ինքն էլ փորձում է մոռանալ այդ ամենը և քանի որ չի կարողանում ընկնում է  մտածմունքների մեջ  հետո քնում:

Ի տարբերություն գործով մյուս տուժող Տիգրան Դեմիրճյանի` Կարեն Բաղրամյանը նշեց, որ երբ գործով 4 ամբաստանյալը գտնվել են իրենց ննջարանում ինքն օղու հոտ  է զգացել, ըստ տուժողի՝ նրանք գտնվել են ալկոհոլի ազդեցության տակ:

Ամբաստանյալ Վաչե Սահակյանի պաշտպան Արմեն Նադիրյանի հետեւյալ հարցին ի պատասխան` թե արդյոք դեպքից հետո 6 տուժողներով զրուցել են այդ մասին տուժողը փորձեց սրամտել՝ այո, բայց չի կարող ասել, քանի որ տուժողներն այդ մասին գրել են իրենց ցուցմունքներում, ինչը դեռևս դատարանում չի հետազոտվել: Սակայն մի քանի բառով  ներկայացրեց, թե ինչ են խոսել միասին դեպքից հետո:

Հիշեցնենք, որ գործով հարցաքննված մյուս տուժող Դեմիրճյանը դատարանում ցուցմունքն տալիս, պնդում էր որ դեպքի մասին միմյանց հետ չեն խոսել:

Տուժող Կարեն Բաղրամյանի գնահատմամբ իրենք բոլորը եղել են շփոթված, վախի ազդեցության տակ, այդ պատճառով էլ չեն կարողացել միջամտել:

Պաշտպան Անահիտ Հովհաննիսյանի հարցին՝ ինչու չեն միջամտել, հո թուրք չէին, ինչից են վախեցել, տուժողը պատասխանեց՝ «թուրք չէին, բայց նրանց արածը թուրքի արած է»:

Գնել Թևոսյանի պաշտպան Արա Զաքարյանի հարցին էլ թե դեպքի հանգամանքների վերաբերյալ  խոսե՞լ են միմյանց հետ, տուժողը ծանո՞թ է մյուս տուժողների ցուցմունքների բովանդակությանը` տուժողը պատասխանեց՝ «կա մի պարզ բովանդակություն, որի մասին դուք ինձանից լավ գիտեք, չորսով Հայկազ Բարսեղյանին սպանել են»:

Նշենք, որ տուժող Կարեն Բաղրամյանը իր ցուցմունքում հայտնեց նաև, որ սպանված Հայկազ Բարսեղյանի հետ կոնֆլիկտային հարաբերությունների մեջ է գտնվել, հաճախակի վիճել են, վեճերի պատճառ են հանդիսացել ինչպես կենցաղային խնդիրները, այնպես էլ` ուսման հետ կապված հարցերը:

Երբեմն նաև նրանց վիճաբանությունն ուղեկցվել է փոխադարձ հայհոյանքներով, անգամ Բաղրամյանը մի անգամ ինքնասպան լինելու մասին հայտարարություն է արել՝ «ինչ ես ուզում ինձանից, պատշգամբից գցեմ ինձ պրծնեմ քեզանից»: Այս մասին տեղեկացել է գործով ամբաստանվող Վաչե Սահակյանը, ով Կարեն Բաղրամյանին մեկ անգամ ապտակել է:

Տուժողի այս խոսքերը հաստատեց նաև ամբաստանյալ Վաչե Սահակյանը, վերջինս հայտարարեց, որ հարվածել է Բաղրամյանին` ուշքի բերելու համար:

Ինչ վերաբերում է Վաչե Սահակյանի գործողությունից տուժելուն, ապա Բաղրամյանը հայտարարեց, որ բողոք, պահանջ չունի նրանից:

Ըստ տուժողի՝ դեպքի ժամանակ ինքը եղել է վախի ազդեցության տակ, չի հասկացել, թե ինչ է կատարվում և եթե հասկանար, թե ինչ է կատարվում  կկանգնեցներ նրանց, բայց քանի որ ինքը չի կարողացել` մինչ  հիմա մեղքի զգացողություն ունի:

Տուժողի ցուցմունքներում առկա էական հակասություններով պայմանավորված ամբաստանյալ Վաչե Սահակյանի պաշտպան Արմեն Նադիրյանը միջնորդեց հրապարակել նրա նախաքննական ցուցմունքները, ինչին միացավ նաև մեղադրանքի կողմը:

Հաջորդ՝ հուլիսի 4-ին կայանալիք նիստում կհրապարակվեն նրա նախաքննական ցուցմունքները: 

Աղբյուր` Փաստինֆո