Փաստ ինֆո

Ազգային ժողովի արտահերթ նստաշրջանի այսօրվա երեկոյան նիստում  պատգամավոր Նիկոլ Փաշինյանը կրկին խոսել է ԱԺ պատգամավոր Սամվել Ալեքսանյանի կողմից իր նախկին աշխատակցի առեւանգման և ունեզրկման մասին այսօրվա հրապարակմանը մամուլում:

Armtimes.com-ի հաղոդմամբ՝ նա, օգտվելով այն հանգամանքից, որ հիմնական զեկուցող էր հրավիրված Ոստիկանության պետի տեղակալ Վարդան Եղիազարյանը, վարման կարգով  կրկին բարձրացրեց այն հարցը, որի մասին խոսել էր առավոտյան:

«Պարոն Եղիազարյան, Ձեր ներկայության պատեհությունը չեմ կարող չօգտագործել՝ Ձեր ուշադրությունը մի խնդրի վրա հրավիրելու համար. այսօր առավոտյան ես ասացի, որ մամուլում շատ լուրջ վկայություններ կան(նկատի ունի Armtimes.com-ի հրապարակումը) ԱԺ պատգամավոր Սամվել Ալեքսանյանի կողմից առեւանգումներ ու ահաբեկումներ իրականացնելու մասին»,-ասաց նա՝ կոչ անելով հատուկ քննության առարկա դառնա Ոստիկանությանն Մալաթիայի բաժանմունքի աշխատանքը:

«Որովհետեւ այդ վկայությունները հիմք են տալիս ենթադրելու, որ ոչ թե ունենք Ոստիկանության Մալաթիայի բաժին, այլ Սամվել Ալեքսանյանին կից գործող Մալաթիայի բաժանմունք»,-նկատեց Փաշինյանը՝ ընդգծելով, որ, իր կարծիքով, այս խնդրով պետք է զբաղվի ոչ միայն Ոստիկանությունը, այլ ՀՔԾ-ը:

«Իմիջայլոց քննարկման հարցին երբեք մոտիկ չէր, Դուք առավոտը հնչեցրեցիք, հիմա էլ հնչեցրեցիք, էս պահին մարդը չի կարող Ձեզ պատասխանել, մինչեւ գործը չտեսնի»,-արձագանքեց ԱԺ նախագահը:

Փաշինյանն ամեն դեպքում պահանջեց իր հարցի պատասխանը.

«Բայց ի՞նչ պատասխանի»,-հարցրեց Սահակյանը:

«Քրեական օրենսգիրքը չգիտի՞»,-անջատված խոսափողով տեղից ասում էր Նիկոլ Փաշինյանը:

«Հասկացա, բայց Քրեական օրենսգիրքը մոտը չի»,-պատասխանեց Գալուստ Սահակյանը:

Նիկոլ Փաշինյանը, սակայն չէր նահանջում, նա շարունակում էր տեղից խոսել՝ նկատելով, որ այդ խնդիրը պետք է նաեւ ԱԺ նախագահին հետաքրքեր:

«Խոսքը ոչ թե Ոստիկանության կամ ՀՔԾ-ի մասին է, այլ նաեւ անձամբ Ձեր մասին, որովհետեւ եթե ԱԺ պատգամավորը առեւանգումներ է իրականացնում...»,-Փաշինյանի խոսքն այլեւս լսելի չէր, Էդուարդ Շարմազանովն ու Գալուստ Սահակյանը  նրան հորդորում էին չշարունակել, բայց Փաշինյանը շարունակում էր խոսել:

Մանրամսները՝ Armtimes.com-ի տեսանյութում

Աղբյուր` Փաստինֆո