Փաստ ինֆո

Ընտրական օրենսգրքի շուրջ 4+4+4 ձևաչափով քննարկման արդյունքներով ընդունված համատեղ հայտարարությունը և ձեռք բերված կոնսենսուսն արժեքավոր և կարևոր իրադարձություն է: Ազգային ժողովում լրագրողների հետ զրույցում նման կարծիք հայտնեց ԱԺ փոխնախագահ Էդուարդ Շարմազանովը:

«Ես չեմ ցանկանում դա պատմական որակել, բայց այն, որ արժեքավոր իրադարձություն է, սա փաստ է: Միշտ չէ, որ ընդդիմությունն ու իշխանությունը կարողանում են նման տարաբնույթ կարծիքների պայմաններում աշխատել մինչև վերջ և հասնել համաձայնության»,- «Արմենպրես»-ի հաղորդմամբ՝ նշեց Շարմազանովը:

Ազգային ժողովի փոխնախագահը գնահատելի է համարում և՛ ընդդիմության, և՛ իշխանության կոռուցողական մոտեցումը, իսկ քաղհասարակության մոտեցման համար ափսոսում է: «Հայաստանում քաղաքական մշակույթը գնում է կայացման ճանապարհով: Քաղաքական դեբատները, քաղաքական երկխոսությունը շատ կարևոր են, և այսօր ես համամիտ եմ իմ այն գործընկերների հետ, ովքեր գտնում են, որ ժողովրդավարությունը նախևառաջ երկխոսություն է, և երկխոսության արդյունքում կարելի է հասնել ընդհանուր համաձայնության: Այս իմաստով ես դրական եմ գնահատում:

Սա նաև դրական է առհասարակ Հայաստանի քաղաքական դաշտի համար: Սա լավ օրինակ կլինի ապագայում նաև պառլամենտարիզﬕ համար»,- ասաց Շարմազանովը: Անդրադառնալով այն լուրերին, որ կոսնենսուսն իշխանությանը պետք էր, քանի որ ԵՄ-ն գումարներ է տալու ՀՀ իշխանություններին՝ Շարմազանովն ասաց, որ ԵՄ-ի փողերի հետ ինքը գործ չունի: 

Հունիսի 16-ին Ազգային ժողովի պետաիրավական հանձնաժողովում 4+4+4 ձևաչափով ընտրական օրենսգրքի քննարկումներին մասնակից քաղաքական ուժերը ստորագրել են հայտարարություն, որով փաստել են օրենսգրքի շուրջ ձևավորված կոնսենսուսի մասին: Հայտարարության տակ ստորագրել են ՀԱԿ-ը, ԲՀԿ-ն, ՕԵԿ-ը, ՀՀԿ-ն, ՀՅԴ-ն:

«Ժառանգություն»-ն ի սկզբանե քննարկումներին չի մասնակցել, իսկ քաղաքացիական հասարակության ներկայացուցիչները նամակ էին ուղարկել, որով հայտարարել էին, որ դրական տեղաշարժ են համարում օրենսգրքում կատարվող փոփոխությունները, սակայն հայտարարության տակ չեն ստորագրում: Ստորագրված հայտարարությամբ նախատեսված փոփոխությունների համաձայն` կուսակցությունների համար հասանելի կլինեն անգամ այն տեղամասերում ընտրությանը մասնակցած անձանց ցուցակները, որտեղ նրանք չեն ունեցել հանձնաժողովի անդամներ կամ վստահված անձինք։

Ընտրողները քվեարկությանը կմասնակցեն միայն նույնականացման քարտերով, որոնք պետությունը մինչև ընտրությունները կտրամադրի անվճար։ Քվեարկությունից առաջ կստուգվեն նաև ընտրողների մատնահետքերը։ Բոլոր 2000 տեղամասերում կտեղադրվեն տեսախցիկներ, ընտրական գործընթացը կհեռարձակվի նաև ուղիղ եթերով։ Նշված փոփոխությունները իրականացնելու համար հայտարարությունը ստորագրած քաղաքական ուժերը կդիմեն միջազգային դոնոր կազմակերպություններին` համապատասխան ֆինանսավորում ստանալու հարցով:

Լուսանկարը՝ ֆոտոլուրի

Աղբյուր` Փաստինֆո