Փաստ ինֆո

Ազգային ժողովը 58 «կողմ», 23 «դեմ», 0 «ձեռնպահ» ձայներով առաջին ընթերցմամբ ընդունեց «ՀՀ վարչատարածքային բաժանման մասին» եւ «Տեղական ինքնակառավարման մասին» օրենքներում փոփոխությունների օրենսդրական փաթեթը: Դեմ էր խորհրդարանական ընդդիմությունը:

Ըստ այդմ՝ կառավարությունն առաջարկում է երկրում վարչատարածքային բարեփոխումների շարունակականությունն ապահովելու նպատակով իրականացնել համայնքների խոշորացման ևս 15 պիլոտային ծրագիր՝ Արարատի մարզի Ուրցաձոր, ՀՀ Շիրակի մարզի Ամասիա, Աշոցք, Սարապատ, Արփի, Սյունիքի մարզի Գորիս, Մեղրի, Տեղ, Գորայք, Վայոց ձորի մարզի Վայք, Ջերմուկ, Զառիթափ, Տավուշի մարզի Նոյեմբերյան, Այրում, Կողբ համայնքային փնջերում: Հիշյալ 15 փունջ համայնքներում նախատեսված է ներառել 4 մարզերի ընդհանուր առմամբ 118 համայնքներ:

Քվեարկությունից առաջ մի շարք պատգամավորներ առաջարկեցին հետաձգել այս տեքսով օրենսդրական փաթեթի քվեարկությունը՝ նաև հաշվի առնելով խորորացման ծրագրում ընդգրկված որոշ համայնքերի անհամաձայնությունը: ՀԱԿ խմբակցության քարտուղար Արամ Մանուկյանն էլ կրկին հիշեցրեց համայնքերի կարծիքը լսելու Սահմանադրության իմպերատիվ դրույթը:
ԱԺ փոխնախագահ Էդուարդ Շարմազանովն էլ հայտարարեց, թե առնվազն Կողբի և Բերդավանի միացման հարցում կառավարությունը վերանայել է իր առաջարկը, և «գոնե այս 2 համայնքները չեմ միացվի»: Ապա տեղեկացրեց, որ Բերդավանը կմիացվի Նոյեմբերյանին:

ՀԱԿ խմբակցության անդամ, նախկին վարչապետ Հրանտ Բագրատյանն էլ հայտարարեց, թե «նման օրենքը հայտնվում է ընդհանրապես պատմությունը չիմանալուց, Հայաստանի սոցիալական և տնտեսական կյանքի պատմությունը չտիրապետելուց»: «Չի կարելի երկու կոպեկի համար բռնել համայնք վերացնել, եթե անգամ գյուղը դրա հետ համաձայն է, գյւողը չի հասկանում, գյուղն այնքան նեղ է, որ մտածում է, թե եթե խոշորանա, իրեն լավ կլինի»,-ընդգծեց նա:

Այս հայտարարություններին անմիջապես արձագանքեց ԱԺ տնտեսական հարցերի մշտական հանձնաժողովի նախագահ Վարդան Այվազյանը. «Ցավոք սրտի, կխոսեն ամեն ինչից, բացի բուն օրենքի բովանդակությունից»: Այստեղ արդեն տեղից բորքոցվեց Հրանտ Բագրատյանը՝ տեղից բղավելով:

«Հանգիստ նստիր տեղդ, վունդերկինդ, հանգիստ նստիր տեղդ»,-վրովված բղավեց Այվազյանը, ապա հորդորեց, թե «այս ազվերին կերածներին հանգստացրեք, թե չէ ես կհանգստացնեմ»: Կրքերը դահլիճում բորբոքվեցին, ԱԺ նախագահ Գալուստ Սահակյանի՝ հանգստանալու հորդորներն էլ վիճակը չփոխեցին, պատգամավորների մի մասն էլ փորձում էր հանդարտեցնել վիճողներին: ԱԺ-ն արդեն անցել էր հաջորդ հարցի քննարկմանը, սակայն կրքերը չէին հանդարտվում: «Կամ ազատեք նիստերի դահլիճը, կամ ձեզ պահեք պատգամավորի պես»,-հորդորեց ԱԺ նախագահը:

Լուսանկարը՝ Ֆոտոլուրի

Աղբյուր` Փաստինֆո