Փաստ ինֆո

Եվրոպայի 2016թ. առաջնության F խմբի առաջին տուրում Պորտուգալիայի ընտրանին «Ժեֆրուա-Գիշար» մարզադաշտում ընդունեց Իսլանդիայի հավաքականին:

Հանդիպումը մեկնարկեց կողմերի լարված պայքարով: 4-րդ րոպեին Գիլֆի Սիգուրդսոնը խլեց գնդակը պորտուգալացիներից եւ վտանգավոր հարված կատարեց դեպի մրցակցի դարպասը:

21-րդ րոպեին Նանին փայլուն հարվածով անակնկալի բերեց իսլանդացիների դարպասապահ Հանես Հալդորսոնին, սակայն վերջինս կարողացավ փրկել իրավիճակը:

Հանդիպման հաշիվը բացվեց 31-րդ րոպեին: Անդրե Գոմեշի հրաշալի փոխանցումից հետո գնդակն իսլանդացիների դարպասն ուղարկեց Նանին:

Խաղի հաշիվը հավասարվեց երկրորդ խաղակեսի սկզբնամասում: 50-րդ րոպեին Յոհան Գուդմունդսոնը գնդակն ուղարկեց մրցակցի տուգանային հրապարակ, որտեղ պորտուգալացիների պաշտպանների սխալի շնորհիվ դարպասապահի դիմաց մեն-մենակ դուրս եկած Բիրկիր Բյարնասոնը գնդակը մխրճեց Ռուի Պատրիսիուի պաշտպանած դարպասը:

Հանդիպման ընթացքում այլեւս գոլեր չգրանցվեցին եւ խաղն ավարտվեց ոչ-ոքի՝ 1:1 հաշվով:

Թիմերը հանդիպումը սկսեցին հետեւյալ մեկնարկային կազմերով.

Պորտուգալիա - Պատրիսիու, Գերեյրո, Պեպե, Կարվալյու, Վիեյրինյա, Դանիլու, Մարիու, Մոուտինյո, Անդրե Գոմեշ, Նանի, Ռոնալդու

Իսլանդիա - Հալդորսոն, Սեվարսոն, Ռ. Սիգուրդսոն, Արնասոն, Սկուլասոն, Գ. Սիգուրդսոն, Գունարսոն, Գուդմունդսոն, Բ. Բյարնասոն, Սիգտորսոն, Բոդվարսոն

Հավելենք, որ վաղը՝ հունիսի 15-ին տեղի կունենան Ռուսաստան - Սլովակիա (Խումբ B, Երեւանի ժամանակով՝ 17:00-ին), Ռումինիա - Շվեյցարիա (Խումբ A, 20:00) եւ Ֆրանսիա - Ալբանիա (Խումբ A, 23:00) հանդիպումները:

Պորտուգալիա - Իսլանդիա՝ 1:1

Գոլերը՝ Նանի (31) - Բյարնասոն (50)

Աղբյուր` Փաստինֆո