Փաստ ինֆո

Ռուսաստանի նախագահ Վլադիմիր Պուտինը հունիսի 20-ին Սանկտ Պետերբուրգում Հայաստանի ու Ադրբեջանի նախագահներ Սերժ Սարգսյանի և Իլհամ Ալիևի հետ կքննարկի Լեռնային Ղարաբաղի հակամարտության կարգավորման հարցը: Այս մասին, ըստ ТАСС-ի, լրագրողներին հայտնել է ՌԴ նախագահի օգնական Յուրի Ուշակովը:

«Հունիսի 20-ին, երկուշաբթի օրը, ծրագրվում են Ռուսաստանի, Հայաստանի ու Ադրբեջանի եռակողմ բանակցությունները Լեռնային Ղարաբաղի հակամարտության կարգավորման խնդրի շուրջ: Ենթադրվում է, որ սկզբից Պուտինը Սարգսյանի ու Ալիևի հետ կհանդիպի առանձին-առանձին, ապա արդեն երեք նախագահները կանցկացնեն բանակցությունները միասին»,- ասել է Ուշակովը: Նա ընդգծել է, որ ռուսաստանյան կողմից «ակտիվ քայլեր կնախաձեռնվեն՝ հակամարտության կարգավորման հարցում կողմերին աջակցելուն ուղղված»՝ հիշեցնելով, որ Ռուսաստանն արդեն իսկ որոշիչ դեր է խաղացել 2016թ. ապրիլի սկզբին հակամարտության գոտում մարտական գործողությունների դադարեցման հարցում:

Ուշակովը, մասնավորապես, նշել է, որ ավելի վաղ տեղի են ունեցել Պուտինի մի քանի հեռախոսազրույցները երկու այդ երկրների առաջնորդների հետ, պաշտպանության ու արտաքին գործերի նախարարների այցեր, Մոսկվա են հրավիրվել Հայաստանի ու Ադրբեջանի գլխավոր շտաբների պետերը, ապրիլի սկզբին Երևան ու Բաքու է այցելել Ռուսաստանի վարչապետ Դմիտրի Մեդվեդևը:

«Այժմ մենք մեր միջնորդական առաքելությունն անց ենք կացնում, բնականաբար,  ԵԱՀԿ Մինսկի խմբի մյուս համանախագահների հետ լիակատար փոխգործակցությամբ՝ 2009-2013թթ. ընթացքում Ռուսաստանի, ԱՄՆ և Ֆրանսիայի նախագահների հայտարարություններին համապատասխան  առաջարկված սկզբունքների հիման վրա: Տեսնենք, ինչպիսի արդյունք կտա այս եռակողմ շփումը: Մեր կողմը կանցկացնի ամենաշահագրգիռ և ակտիվ երկխոսություն»,- եզրափակել է Ուշակովը:

Աղբյուր` Փաստինֆո