Փաստ ինֆո

Ոստիկանի նկատմամբ ոչ վտանգավոր բռնություն գործադրելու մեջ մեղադրվող, Հիմնադիր խորհրդարանի անդամ Գևորգ Սաֆարյանի գործով այսօր ավարտվեց տուժող Գեղամ Խաչատրյանի հարցաքննությունը: Ի պատասխան պաշտպանական կողմի հարցերի՝ Գեղամ Խաչատրյանը, մասնավորապես, հայտարարեց, որ ինքը՝ որպես ոստիկան, կատարել է հասարակական կարգի պահպանմանն ուղղված իր վերադասի հրահանգները, և որ ինքն օրինական է համարում այդ հրահանգները:

Մինչ հարցաքննությունը դատարանում քննության առնվեց դատաքննական ցուցմունքներին էապես հակասող տուժողի նախաքննական ութ ցուցմունքները հրապարակելու ու տուժողին այդ հակասությունների շուրջ հարցաքննելու մասին պաշտպանական կողմի միջնորդությունը:

Դատարանն ընդգծեց, որ ցուցմունքները հրապարակվում են էական և ոչ թե պարզապես հակասությունների առկայության պարագայում, տվյալ դեպքում դատարանն էական հակասություններ չարձանագրեց: Նշվեց, որ տուժողը պարզապես տարբեր ցուցմունքներում ու բացատրություններում տարբեր ձևերով է նկարագրել դեպքը:

Պաշտպանական կողմը նորից հերքեց ծառայողական պարտականությունների կատարման ընթացքում ոստիկանի նկատմամբ բռնություն գործադրելու մեղադրանքը: Ըստ ամբաստանյալի պաշտպան, փաստաբան Տիգրան Հայրապետյանի, միջադեպի ժամանակ ոստիկանների կողմից կատարվել են անօրինական հրամաններ և քաղաքացիների նկատմամբ չհիմնավորված բռնություն գործադրվել:

Ըստ պաշտպանի՝ այլ 7-8 քաղաքացիներ հարվածներ են հասցրել, սակայն մեղադրանք առաջադրվել է միայն Գևորգ Սաֆարյանին: Դա, ըստ պաշտպանի, վկայում է այն մասին, որ Գևորգ Սաֆարյանը հալածյալ է, և նրա նկատմամբ քրեական հետապնդումը նպատակ ունի սահմանափակել նրա խոսքի ու հավաքների ազատության իրավունքները, ինչպես նաև նրա քաղաքական գործունեությունը:

Գևորգ Սաֆարյանը նորից բարձրացրեց առնվազն 4 ոստիկան օպերատորների կողմից նկարահանված, սակայն գործի նյութերում չհայտնված տեսանյութերի հարցը: «Որտե՞ղ են այդ տեսագրությունները»,- հարցրեց նա:

Ամբաստանյալը նորից դատարանի ուշադրությունը հրավիրեց այն հանգամանքի վրա, որ ոստիկանության կողմից տրամադրված տեսանյութն ու ոստիկանների ցուցմունքները հակասում են իրար: Մասնավորապես, տեսանյութում չի երևում, որ տուժողի աջ հոնքից արյուն է հոսում և աջ աչքն էլ այտուցված է, ինչպես նշվում է ցուցմունքներում: Մեղադրանքի կողմը, սակայն, նորից պնդեց, որ դա չի երևում տեսանյութի վատ որակի պատճառով:

Գ.Սաֆարյանը հայտարարեց, որ անօրինական է եղել ոստիկանների կողմից ֆիզիկական ուժ գործադրելը, քանի որ այն գործադրվում է, երբ սպառված են իրավախախտումը կանխելու բոլոր այլ միջոցները: Մինչդեռ տվյալ դեպքում մինչ ֆիզիկական ուժ գործադրելը ոստիկանը իրավախախտման կանխմանն ուղղված պահանջ չի ներկայացրել քաղաքացիներին և չի զգուշացրել դա չկատարելու դեպքում հետևանքների մասին:

Այսօրվա դատական նիստում սկսվեց վկաների հարցաքննությունը: Առաջին՝ ոստիկան վկայի հարցաքննությունը չավարտվեց, Գևորգ Սաֆարյանը խնդրեց իր պաշտպանի հետ խորհրդակցելու հնարավորություն տալ՝ վկային հարցեր ուղղելու համար: Դատարանը բավարարեց միջնորդությունը:

Լուսանկարը՝ Ֆոտոլուրի

Աղբյուր` Փաստինֆո