Փաստ ինֆո

«Բարգավաճ Հայաստան» խմբակության համար կարևոր է, որ Հարկային օրենսգրքի նախագծի վերաբերյալ իր առաջարկությունները կառավարության համար ընկալելի և ընդունելի լինեն:

Այս մասին Ազգային ժողովում նոր Հարկային օրենսգրքի նախագծի այսօր շարունակվող քննարկման ժամանակ հայտարարեց խմբակցության քարտուղար Վահե Էնֆիաջյանը՝ հարց ուղղելով կառավարությանը. «Մի՞թե ընկալելի չէ խմբակցության ասածը, էդքան մեծ քիթ ունեք, քթածակ չունե՞ք, որ հասկանաք»:

ԲՀԿ խմբակցության ղեկավար և համանուն կուսակցության նախագահ Նաիրա Զոհրաբյանն էլ կարծիք հայտնեց, որ եթե այս նախագիծն այս կերպ ընդունվեց, նշանակում է, որ «մենք մի հատ գրանիտից տապանաքար պիտի պատվիրենք ու դնենք ՀՀ տնտեսության վրա և գրենք՝ վախճանվեց անփառունակ»: Ըստ նրա՝ հարկային մուտքերն ավելացնելու երկու տարբերակ կա, մեկը՝ կոռուպցիայի, ստվերի դեմ պայքարն է, մյուսը՝ կառավարության կողմից այս տարբերակը, որով նախատեսվում է «հարկաքամ անել փոքր ու միջին ձեռնարկատերերին»: Նա կոչ արեց կառավարությանը պայքարել կոռուպցիայի, ստվերի դեմ, «ՀՀ տնտեսությունը կոռոզիայի ենթարկող խայտառակ մենաշնորհների դեմ»:

ԲՀԿ խմբակցության անդամ, Միավորված աշխատանքային կուսակցության նախագահ Գուրգեն Արսենյանն էլ հայտարարեց, թե կուսակցությունը կտրականապես դեմ է նմանատիպ փոփոխություններին և Հայաստանի տնտեսվարող հատվածի նկատմամբ այսպիսի ոտնձգությանը: «Ես կարծում եմ, որ դուք իրականացնում ենք երևի դրսում մշակված մի ծրագիր՝ ո՞նց անել, որ Հայաստանը վերջնականապես թաղել, որ Հայաստանը ո՛չ տնտեսություն ունենա, ո՛չ էլ այդ տնտեսությունը հնարավորություն ունենա մրցակից լինի որևէ մեկին»,-հայտարարեց նա՝ ընդգծելով, թե «սա դիվերսիա է մեր երկրի նկատմամբ»:

Անկախ պատգամավոր, «Լուսավոր Հայաստան» կուսակցության նախագահ Էդմոն Մարուքյանն էլ իր հերթին հայտարարեց, թե այլևս «ներվեր չեն մնացել», և խոստացավ կառավարության ներկայացուցչին՝ «մենք մարդկանց դուրս ենք հանելու փողոց և այս Հարկային օրենսգիրքը տապալելու ենք»:

Աղբյուր` Փաստինֆո