Փաստ ինֆո

Այսօր կեսօրին կմեկնարկի ՀՀ կառավարության նախաձեռնությամբ հրավիրված Ազգային ժողովի արտահերթ նստաշրջանը: 

Օրակարգում շուրջ 5 տասնյակ հարցեր են: Դրանցից երեքը, այդ թվում՝ 2015 թ.-ի պետական բյուջեի կատարման տարեկան հաշվետվությունը, քննարկվել են հունիսի 10-ին ավարտված ԱԺ հերթական նստաշրջանի վերջին քառօրյայում և ենթակա են միայն քվեարկության:

Եվս մեկ հարցի՝ նոր Հարկային օրենսգրքի նախագծի քննարկումը մնացել է անավարտ, ուստի խորհրդարանն իր աշխատանքը կսկսի հենց դրանից:

Ի դեպ՝ արտահերթ նստաշրջանի օրակարգային հարցերից 13-ը միջազգային պայմանագրեր են, որոնց մի մասը՝ վարկային:

Կառավարության սահմանած օրակարգում թեև չկա «Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը, այդուհարդերձ այս պահին ԱԺ դարպասների մոտ փոքրաթիվ հավաք է ընթանում՝ ընդդեմ վերոհիշյալ պայմանագրի վավերացման:

Նախապես տարածած հայտարարությամբ «Մենք ենք տերը մեր երկրի» նախաձեռնությունը կոչ էր արել հունիսի 13-ին, առավոտյան ժամը 10-ին, հավաքվել Ազգային ժողովի՝ Բաղրամյան փողոցի մուտքի մոտ, որ «կանխենք Ազգային ժողովի կողմից այդ օրը «Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագրի վավերացումը»:

«Ըստ այդ համաձայնագրի, ստեղծվելու է Հայկական հակաօդային պաշտպանությունը կարգավորող մի մարմին, որը կառավարվելու է Ռուսաստանի կողմից, խաղաղ կամ պատերազմական իրավիճակում Հայաստանի հակաօդային պաշտպանության հարցերում որոշումների կայացման ժամանակ Ռուսաստանն է կառավարելու Հայաստանի և Արցախի հակաօդային պաշտպանությունը (Հայաստանի և Արցախի ՀՕՊ-երը կազմում եմ մեկ ընդհանուր համակարգ):

Ներկայիս իրավիճակում, երբ մեծ են պատերազմական սպառնալիքները, իսկ Ռուսաստանը իրեն դրսևորել է որպես թշնամական երկիր կամ ոչ վստահելի դաշնակից և շարունակում է զենքի մատակարարումը Ադրբեջանին, նման համաձայնագրի վավերացումը պետական դավաճանություն է, որով Բ26-ը և Ազգային ժողովում կոճակ սեղմող հանցագործները Հայաստանի և Արցախի հակաօդային պաշտպանությունը հանձնում են օտարին:

Սա նաև ռազմական ծանր հանցագործություն է, քանի որ պատերազմական իրավիճակում հենց հակաօդային պաշտպանությունն է որոշում պատերազմի ընթացքը, իսկ Ադրբեջանին զենք վաճառող Ռուսաստանը հնարավորություն կստանա իր շահերից ելնելով, պաշտպանել կամ չպաշտպանել Հայաստանի և Արցախի օդային տարածքը:

Արդեն այսօր ռուս փորձագետները կարծիք են հայտնում, որ հակաօդային պաշտպանության միջոցների օգտագործման որոշումները կայացնելու են ռուս հրամանատարները: Ակնհայտ է, որ սա Արցախի հայկական հողերի հանձնման ընդհանուր նախագծի հերթական բաղկացուցիչ մասն է և Ապրիլյան քառօրյա պատերազմի տրամաբանական շարունակությունը:

Մեր նպատակն է ամեն գնով թույլ չտալ այս համաձայնագրի վավերացումը՝ Ազգային ժողովի և Բ26 դիմաց զանգվածային բողոքի ակցիաներ կազմակերպելով այնքան ժամանակ, քանի դեռ մենք բոլորս չգիտակցենք ստեղծված վիճակի օրհասական բնույթը և լրջությունը»,-մասնավորապես ասված է «Մենք ենք տերը մեր երկրի» նախաձեռնության հայտարարության մեջ:

Աղբյուր` Փաստինֆո