Փաստ ինֆո

2013թ. հուլիսի 31-ին զինծառայող Մանուչար Մանուչարյանին ինքնասպանության հասցնելու գործով պաշտպանական կողմը միջնորդում է նշանակել կրկնակի ամբուլատոր դատահոգեբանական-դատահոգեբուժական փորձաքննություն:

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում այսօր շարունակվեց գործի քննությունը և ամբաստանյալ  Արման Ստեփանյանի պաշտպան Նորայր Նորիկյանը դատաքննությունը լրացնող միջնորդությամբ հանդես եկավ:

Պաշտպանը գտնում է, որ նախաքննության ընթացքում դատահոգեբանական-դատահոգեբուժական փորձաքննությունը կատարվել է թերի, մակերեսորեն, եզրակացությունը պատճառաբանված չէ և կառուցված է հայեցողական և որ ամենակարևորն է բացակայում է պատճառահետևանքային կապը, ինչն էլ  դարձել է գործիք իր պաշտպանյալին քավության նոխազ դարձնելու և պատասխանատվության ենթարկելու համար:

Ըստ նախաքննության ընթացքում կատարված փորձաքննության եզրակացության՝ Մանուչար Մանուչարյանը կյանքի ընթացքում որևէ հոգեկան հիվանդությամբ չի տառապել,  եղել է հոգեպես առողջ անձ, բնավորության փսիխասթենիկ գծերի առկայությամբ:

Փորձագետները հիմնվելով զինծառայողներ Լիբիկ Մկրտչյանի, Արման Սահակյանի և մասամբ նաև Կարինե Պետրոսյանի ցուցմունքների վրա, եկել են այն եզրակացության, որ ծառայության վերջին 40 օրերի ընթացքում  գործով ամբաստանյալներ Բաբկեն Գաբոյանի և Արման Ստեփանյանի կողմից սիստեմատիկորեն ծեծի, ստորացումների, նվաստացումների, ծաղրի և շահագործման ենթարկվելու հետևանքով Մ. Մանուչարյանի մոտ վերջին ժամանակահատվածում զարգացել է սուր դեպրեսիվ հակազդում, որն արտահայտվել է տրամադրության դիսթիմիկ ֆոնով, ընկճվածությամբ, հուսահատվածությամբ, ստեղծված իրավիճակից որպես անելանելի ընկալման զգացողությունով, ինչը և ամենայն հավանականությամբ բերել է նրա կողմից ինքնասպանության իրագործմանը: Ինքնասպանություն կատարելու պահին, գտնվելով խիստ հուզված, ընկճված վիճակում, գիտակցության աֆեկտիվ նեղացման ֆոնի վրա, Մ. Մանուչարյանը չէր կարող լրիվ չափով իրեն հաշիվ տալ իր գործողությունների համար և ղեկավարել դրանք:

Նորայր Նորիկյանի խոսքով՝ իր պաշտպանյալին մեղսագրվող արարքը հիմնված է բացառապես մեկ վկայի` Լիբիկ Մկրտչյանի նախաքննական ցուցմունքի հիման վրա, սակայն վերջինս դատաքննության ընթացքում հայտնել է, որ նախաքննության ընթացքում չի նշել, որ Արման Ստեփանյանը 5 րոպե տևողությամբ ոտքերով հարվածել է Մ. Մանուչարյանին, այլ հայտնել է, որ ընդամենը հրել է։ Ավելին՝ նշել է, որ երբեք չի տեսել Մ. Մանուչարյանին շոր լվանալուց, դեպքին նախորդող 40 օրերի ընթացքում երբեք չի տեսել Արման Ստեփանյանին հանգուցյալ Մ. Մանուչարյանին նվաստացնելուց, վիրավորելուց, ճնշելուց:

Ըստ պաշտպանի՝ տարակուսելի է, որ ինչպես նախաքննության, այնպես էլ դատաքննության ընթացքում վկաներից ընդամենը երկուսն են նշել, որ Մանուչարը եղել է տխուր, ընկճված, իսկ   մնացած բոլոր վկաները ընդգծել են, որ Մանուչարն ունեցել է նորմալ տրամադրություն, անգամ ցուցմունք կա, որ դեպքից շուրջ մեկ ժամ առաջ Մանուչարը պահակատանը անեկդոտ է պատմել:

Պաշտպանը, կասկածի տակ դնելով եզրակացության օբյեկտիվությունը, նշեց, որ փորձագետները խտրական վերաբերմունք են դրսևորել վկաների ցուցմունքների նկատմամբ. եզրակացությունը կազմելիս, ունենալով 6 վկայի և մեկ տուժողի իրավահաջորդի հարցաքննություն, հիմքում դրվել է ընդամենը 2 վկայի ցուցմունք՝  չանդրադառնալով մյուս վկաների ցուցմունքներում մատնանշված հանգամանքներին:

Պաշտպանը պնդեց, որ կատարված փորձաքննության համար հիմք հանդիսացած ելակետային տվյալներն առնվազն Արման Ստեփանյանի մասով սխալ է, որի հետևանքով սխալ, չպատճառաբանված և չհիմնավորված եզրակացություն է տրվել:

Ուստիև Նորայր Նորիկյանը միջնորդեց նշանակել կրկնակի ամբուլատոր դատահոգեբանական-դատահոգեբուժական փորձաքննություն, իսկ միջնորդությունը բավարարելու դեպքում՝ փորձաքննության կատարումը հանձնարարել ՀՀ գիտությունների ազգային ակադեմիայի Փորձաքննությունների ազգային բյուրո» ՊՈԱԿ-ին:

Մեղադրող դատախազ  Արամ Ամիրյանի գնահատմամբ՝ պաշտպանի միջնորդությունը անհիմն է և ենթակա մերժման:

Մասնավորապես, դատախազը նշեց նաև, որ երբ դատարանում հրապարակվել է  Լիբիկ Մկրտչյանի նախաքննական ցուցմունքները,  վերջինս պնդել է, որ նախաքննական մարմնի կողմից իր նկատմամբ որևէ բռնություն չի գործադրվել,  ցուցմունքները գրել է իր ձեռքով,  իր կամքով:

Դատախազը նշեց  նաև, որ քրեական գործն ամբողջությամբ է տրամադրվել փորձագետներին, կատարվել է համապատասխան փորձաքննություն և փորձագետները, ուսումնասիրելով ինչպես Լիբիկ Մկրտչյանի, այնպես էլ մյուս վկաների և ամբաստանյալների ցուցմունքները, գտել են, որ քրեական գործով ձեռքբերված ապացույցները բավարար են համապատասխան եզրակացություն տալու համար՝ առ այն, որ Բաբկեն Գաբոյանի և Արման Ստեփանյանի գործողությունների հետևանքով առաջացել են ծանր հետևանքներ, որոնք բերել են Մ Մանուչարյանի ինքնասպանության:

Ինչպես գործով մյուս ամբաստանյալ Բաբկեն Գաբոյանի պաշտպան Հրանտ Անանյանը, այնպես էլ տուժողի իրավահաջորդի ներկայացուցիչներ Մարտիրոսյանը և Շուշանյանը միացան պաշտպան Նորիկյանի միջնորդությանը՝ գտնելով, որ այն ենթակա է բավարարման:

Դատարանը՝ նախագահությամբ Արթուր Մկրտչյանի, պաշտպանի միջնորդության լուծումը հետաձգեց հնարավորություն տալով կողմերին  միասնական հարցադրումներով  հանդես գալ:

Փորձաքննությունը լրացուցիչ, թե կրկնակի նշանակելու վերաբերյալ պաշտպան Նորիկյանը վերջնական դիրքորոշում կհայտնի հաջորդ դատական նիստում:

Աղբյուր` Փաստինֆո