Փաստ ինֆո

Եվրոպայի 2016թ. առաջնության B խմբի առաջին տուրում Անգլիայի հավաքականը հունիսի 11-ին ֆրանսիական Մարսել քաղաքի «Վելոդրոմ» մարզադաշտում ընդունեց Ռուսաստանի ընտրանուն:

«Armsport.am»-ի հաղորդմամբ` առաջին խաղակեսում անգլիացիները հսկայական առավելություն ունեին: Գոլային հնարավորություններ ունեին հարձակվողներ Ռահիմ Ստերլինգը, Հարի Քեյնը եւ կիսապաշտպան Ադամ Լալանան:

Երկրորդ խաղակեսի միջնամասում որակական փոփոխություն նկատվեց ռուսների խաղում: Փայլուն խաղով աչքի էր ընկնում Ռուսաստանի ընտրանու դարպասապահ Իգոր Ակինֆեեւը: 70-րդ րոպեին Ուեյն Ռունիի հարվածից հետո Ակինֆեեւը հրաշալի ցատկով հեռացրեց գնդակը:

Խաղի հաշիվը բացվեց 74-րդ րոպեին: Ռուսների պաշտպան Գեորգի Շչենիկովը խախտեց կանոնները մրցակցի կիսապաշտպան Դելե Ալիի հանդեպ, որի պատճառով գլխավոր մրցավար Նիկոլա Ռիցոլին նշանակեց տուգանային հարված, որն էլ փայլուն իրացրեց Անգլիայի ընտրանու կիսապաշտպան Էրիկ Դայերը:

Հանդիպման հաշիվը հավասարեցվեց ավելացված ժամանակի առաջին րոպեին: Գոլի հեղինակ դարձավ Վասիլի Բերեզուցկին, ով գլխի հարվածով գնդակն ուղարկեց Ջո Հարթի պաշտպանած դարպասը:

Այսպիսով, խաղի ավարտից րոպեներ առաջ Ռուսաստանի հավաքականը կարողացավ փրկվել պարտությունից՝ հանդիպումն ավարտելով ոչ-ոքի՝ 1:1 հաշվով:

Թիմերը խաղը սկսեցին հետևյալ մեկնարկային կազմերով.

Անգլիա - Հարթ, Ուոլքեր, Ռոուզ, Կեյհիլ, Սմոլինգ, Ստերլինգ, Լալանա, Քեյն, Ռունի, Դայեր, Ալի

Ռուսաստան - Ակինֆեեւ, Սմոլնիկով, Իգնաշեւիչ, Նոյշտադտեր, Կոկորին, Սմոլով, Գոլովին, Վ. Բերեզուցկի, Շատով, Շչենիկով, Ձյուբա

Անգլիա - Ռուսաստան՝ 1:1

Գոլը՝ Դայեր (74) - Բերեզուցկի (90+1)

Հավելենք, որ հունիսի 12-ին տեղի կունենան Թուրքիա - Խորվաթիա (Խումբ D, Երեւանի ժամանակով՝ 17:00), Լեհաստան - Հյուսիսային Իռլանդիա (Խումբ C, 20:00) եւ Գերմանիա - Ուկրաինա (Խումբ C, 23:00) հանդիպումները:

Աղբյուր` Փաստինֆո