Փաստ ինֆո

Նախկին կնոջ սպանության մեջ մեղադրվող Արտակ Առաքելյանը այսօր իր դատաքննական ցուցմունքում ընդունեց, որ սպանել է կնոջը, սակայն չընդունեց, որ սպանությունն եղել է նախօրոք ծրագրված: Ըստ նրա, սպանությունը տեղի է ունեցել խանդի ու դավաճանության հողի վրա:

Ամբաստանյալը նշեց, որ երբ ցանկացել է պարզաբանում ստանալ նախկին կնոջից, վերջինս ասել է՝ «լավ եմ արել, բաշարել եմ՝ արել եմ»: Ըստ Ա.Առաքելյանի, ինքը աֆեկտի մեջ է եղել, իր իսկ բացատրությամբ՝ չի գիտակցել ինչ է արել:

Ըստ ամբաստանյալի, դեպքից մեկ շաբաթ առաջ, երբ համոզվել է, որ նախկին կինն իրեն թուրքի հետ դավաճանում է, շատ վատ վիճակում է եղել: Ըստ ամբաստանյալի, կինը սկայփ ծրագրով իր հետ խոսակցությունը հոգնածության պատճառաբանությամբ ընդհատել է, սակայն նույն օրվա գիշերը բազմաթիվ խոսակցություններ է ունեցել թուրքի հետ:

Ամբաստանյալը հայտնեց, որ իր մոտ երկու դանակ է եղել՝ իր ապահովության համար: Ըստ նրա, իրեն սպառնում ու հետապնդում էին:

Ամբաստանյալն, ով մեղադրվում է նաև սառը զենք պահելու մեջ, ասաց, որ սառը զենքը տասը տարեկանից իր մոտ է:

Ի դեպ, տուժողի իրավահաջորդի ներկայացուցիչ, փաստաբան Սեդա Սաֆարյանը փորձեց հարցեր ուղղել ամբաստանյալին: Վերջինս հայտարարեց, որ չի պատասխանելու նրա հարցերին, դատարանն էլ թույլ չտվեց տուժող կողմի ներկայացուցչին անգամ հնչեցնել հարցերը:

Տուժողի իրավահաջորդի ներկայացուցիչ Սեդա Սաֆարյանը լրագրողների հետ զրույցում նշեց, որ ամբաստանյալը դավաճանության մասին իր այս հայտարարությունների ապացույցները չունի: Տուժող կողմի ներկայացուցիչը բացառում է նաև աֆեկտի հնարավորությունը:

Փաստաբանը կարծիք հայտնեց, որ դատահոգեբանը փորձաքննությունն էապես թերի է անցկացվել: Դատահոգեբանն արձանագրել է, որ ամբաստանյալն ընչաքաղցությամբ չի տառապում, մինչդեռ, ըստ ներկայացուցչի, քրեական գործով բազմաթիվ ապացույցներ կան, որ ինքը դրանով տառապում է:

«Պատահական չէ, որ շահադիտական դրդումների հետ կապված ես հարցադրումներ ուղղեցի, որովհետև ամբողջ քննության ընթացքում ինքն այնքան չի մտածել իր երեխաների ճակատագրի և սպանվածի, գործուն զղջալու մասին, որքան որ գույքի կռիվ է անում»,- ասաց Ս.Սաֆարյանը:

Փաստաբանն արձանագրեց, որ ամբաստանյալին ինչ-որ բան դուր չի եկել, որ ինքը՝ Ս.Սաֆարյանը, որպես կողմի ներկայացուցիչ, մասնակցել է գույքի բաժանման գործընթացին ու օրենքի տեսանկյունից կարծիք հայտնել, թե ինչպես պետք է կնոջ ու երեխաների գույքը տնօրինվի:

«Շահադիտական դրդումներն իր ամբողջ գործելակերպում նկատելի են, բայց նախաքննական մարմինը դրան կարևորություն չի տվել, ու նաև այդ նյութերը չեն տրամադրել դատահոգեբանին, որպեսզի դրանցից նա կատարեր համաչափ հետևություն: Հակառակ դեպքում նման հետևության չէր գա: Չէ, տառապո՛ւմ է ընչաքաղցությամբ»,- հայտարարեց Սեդա Սաֆարյանը:

Տուժող կողմի ներկայացուցիչը նշեց, որ թուրքի հետ հարաբերությունները եղել են գործնական, նրան ամուսինները պարտք են ունեցել, ինչն ամբաստանյալը շրջանցում է: «Պարտքի թեման ինքը չի ուզում զարգացնել, որովհետև պարտքի թեման հաստատելու է՝ նրանց կապն իրականում գործնական է եղել, սիրային կապեր չէին էլ կարող լինել».- ասաց ներկայացուցիչը՝ ինքն իր հերթին հարց բարձրացնելով՝ ինչո՞ւ պարտքը չի տվել, անընդհատ կնոջն է սկայփի մոտ նստեցրել ու ասել՝ խաբիր, մի բան հորինիր:

«Ես կարծում եմ, որ շահադիտական դրդումներ կան, խանդի հողի վրա սպանություն կատարելու հարց չի եղել, որովհետև նա ընդամենը մի հարց է պարզել՝ կինն իր հետ ապրելո՞ւ է, թե՞ ոչ, կինը վերջնական ասել է՝ չեմ ապրելու, և դրանից հետո ինքը կատարել է այդ արարքը»,- նշեց Ս.Սաֆարյանը՝ ընդգծելով, որ եղել է տաղավարի, տաղավարում գտնվող գույքի, մեքենաների կռիվ:

Հաջորդ դատական նիստում դատաքննական ցուցմունքների հետ էական հակասությունների պատճառով կհրապարակվեն ամբաստանյալի նախաքննական ցուցմունքները և դրանց շուրջ նրան հարցեր կուղղվեն:

Լուսանկարը՝ Shamshyan.com-ի

Աղբյուր` Փաստինֆո