Փաստ ինֆո

ՀՀ փաստաբանների պալատի նախագահ Արա Զոհրաբյանն ու ՀՀ մարդու իրավունքների պաշտպան Արման Թաթոյանն այսօր համագործակցության հուշագիր ստորագրեցին: Հուշագրի շրջանակներում կողմերը կհամագործակցեն մի շարք ուղղություններով ու եղանակներով:

Մասնավորապես, հուշագիրը նախատեսում է, որ իր գործունեության ընթացքում մարդու իրավունքների խախտումների դեպքերի վերաբերյալ փաստաբանի տրամադրած տեղեկությունների հիման վրա Պաշտպանն իր լիազորությունների շրջանակում համապատասխան միջոցներ է ձեռնարկում, այդ թվում՝ արագ արձագանքման, ինչպես նաև որպես խոշտանգումների և այլ դաժան, անմարդկային կամ արժանապատվությունը նվաստացնող վերաբերմունքի կամ պատժի կանխարգելման ազգային անկախ մեխանիզմ՝ համապատասխան հաստատություններ մոնիթորինգային այցերի իրականացման միջոցով: Փաստաբանների տրամադրած տեղեկությունների հիման վրա իրականացված միջոցառումների արդյունքների վերաբերյալ Պաշտպանի կողմից հաղորդում է ներկայացվում ՓՊ:

Հուշագրի շրջանակում մարդու իրավունքների պաշտպանության ոլորտում օրենսդրական և իրավակիրառման հարցերում միջազգային իրավական չափանիշների, հատկապես՝ Մարդու իրավունքների եվրոպական դատարանի նախադեպային իրավունքի հետ անհամապատասխանությունների հայտնաբերման դեպքերում կողմերը համապատասխան տեղեկություններ են հաղորդում միմյանց՝ իրենց իրավասությունների շրջանակում այդ խնդիրների լուծմանն ուղղված գործուն քայլեր ձեռնարկելու նպատակով:
Փաստաբանների գործունեության շրջանակում մարդու իրավունքներին առնչվող խնդիրների վերհանման և ամփոփման հիման վրա ՓՊ-ն Պաշտպանին ներկայացնում է օրենսդրական փոփոխությունների առաջարկություններ, իսկ Պաշտպանն էլ իր լիազորությունների շրջանակում նախաձեռնում է համապատասխան փոփոխությունները, ապա այդ մասին տեղեկություններ են ներկայացվում ՓՊ:

Հուշագրի շրջանակում նախատեսվում է, որ Փաստաբանական դպրոցում ունկնդիրների համար նախատեսված ծրագրերում կներառվեն դասընթացներ ՀՀ մարդու իրավունքների պաշտպանի ինստիտուտի վերաբերյալ, այդ ծրագրերը կազմելիս հաշվի կառնվեն նաև Պաշտպանի տարեկան հաղորդումներն ու արտահերթ զեկույցները: ՀՀ փաստաբանական դպրոցում մարդու իրավունքների պաշտպանությանը վերաբերող հատուկ թեմաներով դասախոսություններ կանցկացվեն Պաշտպանի աշխատակազմից հրավիրված մասնագետների կողմից:

Ըստ Հուշագրի, Պալատի խորհրդի առաջարկի հիման վրա Պաշտպանը քննարկում է Սահմանադրական դատարանի դիմելու հարցը:

Փաստաթղթի ստորագրումից հետո լրագրողների հետ ճեպազրույցում ՀՀ փաստաբանների պալատի նախագահ Արա Զոհրաբյանը նշեց, որ, իհարկե, նախկինում էլ կառույցները համագործակցել են, սակայն Հուշագրի ստորագրմամբ համագործակցությունն որակապես նոր հարթություն է տեղափոխվում: «Ուզում եմ շնորհավորել մեր երկու կառույցներին և հուսով եմ, որ այս համագործակցության շահառուն կլինի մեր քաղաքացին»,- ասաց Ա.Զոհրաբյանը:

ՀՀ մարդու իրավունքների պաշտպան Արման Թաթոյանն ևս կարևորեց հուշագրի ստորագրումը: «Այդ հուշագիրը՝ ի տարբերություն սովորական հուշագրերի, ոչ թե ընդամենը բարի ցանկությունների ամբողջություն է, այլ սրանով մենք ներդնում ենք համագործակցության կոնկրետ մեխանիզմ»,- ասաց Պաշտպանը՝ կարևորելով նաև հուշագրի ստորագրումը ՄԻՊ հաստատության համար:

Պաշտպանն ընդգծեց, որ Հուշագրում ամրագրված համագործակցության ուղղությունները թույլ են տալիս շատ ավելի ակտիվ և լիարժեք ինտեգրվել իրավապաշտպան հանրության ոլորտին:

Աղբյուր` Փաստինֆո