Փաստ ինֆո

2013թ. հուլիսի 31-ին զինծառայող Մանուչար Մանուչարյանին ինքնասպանության հասցնելու մեջ մեղադրվող 22-ամյա Արման Ստեփանյանը պնդում է, որ զինակից ընկերոջ՝ Մ.Մանուչարի մահվան հետ որևէ կապ չունի:

Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում շարունակվել է զինծառայող Մ.Մանուչարյանին ինքնասպանության հասցնելու գործով քննությունը և ցուցմունք են տվել ամբաստանյալները:

Շուրջ երկու տարի կալանքի տակ գտնվող սերժանտ Արման Ստեփանյանն իր ցուցմունքում նշել է, որ ծառայության ընթացքում զինակից ընկերների հետ գտնվել է ընկերական հարաբերությունների մեջ և որևէ մեկի հետ լարված փոխհարաբերություններ չեն եղել:

Ինչ վերաբերում է մահացած Մանուչար Մանուչարյանին, ապա, ամբաստանյալի խոսքով, իրենց միջև երբեք կոնֆլիկտային իրավիճակներ չեն եղել, ինքը երբևէ Մանուչարին չի ստիպել կամ ծեծի ենթարկել այն բանի համար, որ նա լվանա իր շորերը:

Ըստ Արման Ստեփանյանի՝ մահացած զինծառայող Մ.Մանուչարյանի հետ ծառայել են շուրջ 10-ն ամիս, գտնվել են նորմալ, ընկերական հարաբերությունների մեջ: Ամբաստանյալի բնութագրմամբ՝ Մանուչարը համեստ, լուրջ, աշխատասեր տղա է եղել, փոքր-ինչ ինքնամփոփ, սակայն՝ ոչ կոնֆլիկտային:

Ամբաստանյալը պնդում է, որ երբեք չի տեսել, որ Մանուչարը որևէ մեկի շորը լվանար:

Մանուչարյանին ծեծի ենթարկելու վերաբերյալ էլ Ստեփանյանը նշել է, որ ինքը դեպքից առաջ 40 օր անընդմեջ ու պարբերաբար չի ծեծել ու նվաստացրել Մանուչարին: Դեպքից օրեր առաջ էլ նրան չի ստիպել իր շորերը լվանալ:

Դեպքի օրն էլ շարժվել է ըստ օրվա կարգացուցակի`մարզվել էիրենց ջոկատի մոտ գտնվող մարզասարքերի վրա, ապա պատրաստվել անվանականչին, ինչն ավարտվել է ժամը 22:10-ին, որից հետո տրվել է քուն հրամանը:

Իսկ դեպքի օրը առավոտյան արթնանալուց հետո մասնակցել է մարմնամարզության, ապա լվացվել, կարգի բերել իրեն, ու գնացել ճաշարան նախաճաշի:

Ըստ Ստեփանյանի՝ ճաշարանում եղել է նաև գործով մյուս ամբաստանյալ Բաբկեն Գաբոյանը:

Վկայի դատաքննական ցուցմունքները պետք է իրավական հետևանքներ առաջացնեն. Նորայր Նորիկյան

Իսկ ավելի ուշ, երբ զինծառայողների հետ եղել է ջոկատի լսարանում, այդ ժամանակ լսվել են կրակոցներ, տեղեկացել են, որ Մ.Մանուչարն ինքնասպան է եղել:

Ամբաստանյալի համար անհասկանալի է, թե գործով տուժող Լիբիկ Մկրտչյանն ինչու՞ է նախաքննության ընթացքում իր անձի վերաբերյալ հակասական ցուցմունքներ տվել, վերջինս, ինչպես նախաքննության ընթացքում առերեսման ժամանակ այնպես էլ դատարանում, հայտնել է, որ 40 օր անընդմեջ Ստեփանյանը չի նվաստացրել ու վիրավորել Մանուչարին:

Իսկ ամբաստանյալ Բաբկեն Գաբոյանի համար անհասկանալի է, թե ինչի հիման վրա են իրեն մեղադրանք առաջադրել՝ ՀՀ քրեական օրենսգրքի 358.1-րդ հոդվածի 4-րդ մասով այլ ոչ թե 360-րդ հոդվածով:

Մասնավորապես, Գաբոյանի պաշտպան Հրանտ Անանյանը մեզ հետ զրույցում նշեց, որ իր պաշտպանյալը չի ընդունում իրեն առաջադրված մեղադրանքը և ցուցմունք տալով նշել է, որ նախաքննական մարմինն իրեն մեղադրանք է առաջադրել մի դեպքում գործով տուժող Լիբիկ Մկրտչյանին ապտակելու և այդ կերպ նրան վիրավորանք հասցնելու համար, ինչը ստորացրել է նրա պատիվն ու արժանապատվությունը, իսկ գործով հանգուցյալ տուժողին ձեռքերով և ոտքերով հարվածներ հասցնելը որակվել է բռնություն տուժողի նկատմամբ, որն առաջացրել է ծանր հետևանք. արտահայտվել է տրամադրության դիսթիմիկ ֆոնով և ինքնասպանության է հասցրել Մանուչար Մանուչարյանին:

Բաբկեն Գաբոյանի համար անհասկանալի է նախաքննական մարմնի այս մոտեցումը:

Ըստ մեղադրանքի՝ Բաբկեն Գաբոյանը սեփական անձի վարկանիշը բարձրացնելու, համածառայողների շրջանում ենթադրյալ առավելությունը ցույց տալու, գերակայությունն ամրապնդելու նպատակով կատարել է իր լիազորությունների և իրավունքների սահմաններից դուրս դիտավորյալ գործողություններ:

Երեկոյան «քուն» հրամանից հետո զորանոցում զինծառայության պարտականությունները կատարելու հետ կապ չունեցող առիթով՝ իր քաղաքացիական շորերը լվանալու պահանջը չկատարելու համար, Բ.Գաբոյանի, ինչպես նաև նույն զորամասի ժամկետային զինծառայող, սերժանտ Արման Ստեփանյանի կողմից Մ.Մանուչարյանի նկատմամբ բռնություն է գործադրվել:

Նախաքննական մարմնի գնահատմամբ` Մանուչարը պարբերաբար ենթարկվել է ծեծի, ստորացումների, անձնական արժանապատվությունը նվաստացնող գործողությունների ու ծաղրի, որի հետևանքով նրա մոտ զարգացել է «Սուր դեպրեսիվ հակազդում», որն արտահայտվել է տրամադրության դիսթիմիկ ֆոնով, ընկճվածությամբ, հուսահատվածությամբ, ստեղծված իրավիճակից որպես անելանելի ընկալման զգացողությունով: Արդյունքում՝ վերջինս 31.07.2013թ.՝ ժամը 13:00-ի սահմաններում, իրեն ամրակցված ԱԿՍ-74 տեսակի ինքնաձիգով ենթակզակային շրջանում կրակոց արձակելով գործել է ինքնասպանություն, այսինքն՝ անզգուշությամբ պատճառվել է այլ ծանր հետևանք։

Աղբյուր` Փաստինֆո