Փաստ ինֆո

Ազգային ժողովի փոխնախագահ Հերմինե Նաղդալյանը մանրամասներ է ներկայացրել հունիսի 2-3-ը տեղի ունեցած հայ-ռուսական միջխորհրդարանական հանձնաժողովի նիստից: Ազգային ժողովում լրագրողների հետ հանդիպմանը Հերմինե Նաղդալյանն ասաց, որ այն հանձնաժողովի 27-րդ նիստն էր, որի առաջին մասը տեղի է ունեցել Մոսկվայում, իսկ շարունակությունը՝ Կազանում:

«Օրակարգում ունեցել ենք մի քանի կարևոր հարց, որոնցից էին Հայաստանի և Ռուսաստանի միջև սոցիալ-տնտեսական և մշակութային համագործակցության ընդլայնման հնարավորությունները, ԵԱՏՄ համագործակցության իրավիճակը, անդրադարձ է կատարվել նաև Լեռնային Ղարաբաղում տիրող իրավիճակին: Չկար օրակարգային որևէ խնդիր, այդ թվում՝ ռազմաքաղաքական, դիվանագիտական, որոնց մասին մեր գործընկերները չխոսեին: Մեր պատվիրակությունը, ինչպես միշտ է լինում, դրսում աշխատում է միասնական և համախմբված»,-
«Արմենպրես»-ի հաղորդմամբ՝ ասաց նա:

Նաղդալյանը հայտնեց, որ քաղաքագետ Սերգեյ Մինասյանը հանձնաժողովի նիստի ընթացքում մասնագիտորեն ներկայացրել է ապրիլյան քառօրյա պատերազմի պատճառները, նպատակները, այն միջազգային նորմերը և ստանձնած պարտավորությունները, որոնք խախտել է Ադրբեջանը:

«Դրանից հետո քննարկմանը համազեկուցող Ռուսաստանի արտաքին գործերի նախարարության ներկայացուցիչը ելույթ ունեցավ, ով ընդգծեց, որ խիստ մտահոգություն կա Ադրբեջանի կողմից սանձազերծած այդ հրադադարի ռեժիմի խախտումների վերաբերյալ, վերահաստատեց ռուսական կողմի այն մոտեցումը, որ 1994 թվականի հրադադարի պայմանագիրը հանդիսանում է միակ և անժամկետ փաստաթուղթը, որը բոլոր զարգացումների հիմքում է»,-ասաց Հերմինե Նաղդալյանը:

Հերմինե Նաղդալյանը հայտնեց, որ միջխորհրդարանական հանձնաժողովը վերջում հանդես է եկել արձանագրությամբ, որտեղ, առաջին անգամ այլ երկրի կառույցի մասնակցությամբ, արձանագրվել է, որ Ադրբեջանի կողմից սանձազերծվել է հրադադարի ռեժիﬕ խախտում և հրադադարի խախտուﬓերը տեղի են ունեցել ԼՂ սահմանների ամբողջ երկայնքով, ինչպես նաև հայ-ադրբեջանական սահմանում:

«Վերահաստատվել են նաև ռուսական կողմի պնդումներն այն մասին, որ հրադադարի ռեժիմի խախտուﬓերն անընդունելի են, և իրենք չեն տեսնում ռազմական ճանապարհով հարցի լուծման հնարավորություն, այլ կարծում են, միակ հնարավորությունը խաղաղ ճանապարհով է՝ Մինսկի խմբի համանախագահների մանդատի ներքո»,- ասաց նա:

Հերմինե Նաղդալյանը, եզրափակելով խոսքը, ավելացրեց, որ հայ- ռուսական հարաբերությունները կան և մնում են դաշնակցային և ապագայում էլ քայլեր են ձեռնարկվելու կենսական նշանակության հարցերին լուծում տալու համար:

Աղբյուր` Փաստինֆո