Փաստ ինֆո

doctors.am-ը ներկայացնում է աշխարհի ամենաթանկ 9 վիրահատությունների տեսակները

9. Երիկամների փոխպատվաստում. արժեքը՝ 262.900 ԱՄՆ դոլար

Ըստ վիճակագրության՝ տասը ամերիկացիներից մեկը տառապում է երիկամների այս կամ այն հիվանդությամբ, իսկ հիվանդացությունների թիվն օրեցօր աճում է:

Հատկանշական է, որ վերը նշված արժեքը չի ներառում երիկամի դոնոր գտնելու և օրգանի արժեքը, այն ընդամենը փոխպատվաստման վիրահատության գինն է:

Երիկամի փոխպատվաստումը ծավալուն և բարդ վիրաբուժական միջամտություն է, սակայն հարցը, իհարկե, չի սահմանափակվում միայն վիրահատությամբ: Բացի այն, որ օրգանի համար դոնոր գտնելն ինքնին դժվար գործընթաց է, փոխպատվաստումից հետո ևս անձը ստիպված է լինում ընդունել լրացուցիչ դեղորայք՝ նոր օրգանի աշխատանքը խթանելու համար: Այս գործընթացը կարող է տևել անգամ տարիներ:

8. Ենթաստամոքսային գեղձի փոխպատվաստում. արժեքը՝ 289.400 ԱՄՆ դոլար

Ենթաստամոքսային գեղձը կենսական անհրաժեշտության մարսողական օրգան է, որն իրականացնում է ճարպերի, ածխաջրերի և սպիտակուցների յուրացման գործառույթը:

Այն արտադրում է օրգանիզմի համար անհրաժեշտ հորմոններ, ինչպիսիք են ինսուլինը և գլյուկագոնը:

Ենթաստամոքսային գեղձի փոխպատվաստումը բարդ և ռիսկային վիրահատություն է՝ պայմանավորված ինչպես դրա տեղակայմամբ (ստամոքսի հետնամասում), այնպես էլ այն հանգամանքով, որ ենթաստամոքսային գեղձի փոխպատվաստում, որպես կանոն, ցուցվում է միայն դրա քաղցկեղով տառապող հիվանդներին, իսկ հիվանդության ընթացքն այնքան է հյուծում մարդուն, որ նա կարող է պարզապես չհաղթահարել վիրահատությունը:

7. Սրտի բաց վիրահատություն. արժեքը՝ 324.000 ԱՄՆ դոլար

Հաշվի առնելով այն, որ սրտային հիվանդություններից մահացությունն առաջին տեղում է ԱՄՆ-ում, սրտի բաց վիրահատությունն այդ երկրում ամենապահանջված բժշկական միջամտությունն է:

Սրտի բաց վիրահատությունը ցուցված է այն դեպքերում, երբ բուժական այլ մեթոդներն անարդյունավետ են եղել կամ տվյալ դեպքում կիրառելի չեն: Սա վիրահատության բավական մեծ տարածում ունեցող տեսակ է, սակայն մեծ է նաև ռիսկերի հավանականությունը՝ արյունահոսություն, ինֆեկցիաներ, սրտի անկանոն աշխատանք, ընդհուպ՝ կաթված: Հետվիրահատական ընթացքը ևս դյուրին չէ: Սրտի բաց վիրահատությանը պետք է հետևեն հիվանդի հետևողական այցերը բժշկի, նշանակված թանկարժեք դեղորայքի կանոնավոր և տևական ընդունումը:

6. Լյարդի փոխպատվաստման վիրահատություն. արժեքը՝ 577.100 ԱՄՆ դոլար

Սա մեծ ռիսկեր հետապնդող վիրաբուժական միջամտություն է, իսկական փորձություն հիվանդի համար:

Լյարդը մարդու կենսագործունեության համար կարևորագույն օրգաններից է, որը խթանում է մարսողությունը, վնասազերծում տարատեսակ օտարածին գործոններ՝ ալերգեններ, տոքսիններ և այլն, ապահովում օրգանիզմին անհրաժեշտ գլյուկոզայի քանակը, ունի արյունաստեղծ գործառույթ:

Այսպիսով, լյարդի փոխպատվաստումը, թերևս, կարելի է համարել ամենառիսկային վիրահատությունը բոլոր թվարկվածներից:

5. Ոսկրածուծի փոխպատվաստում. արժեքը՝ 676.800 ԱՄՆ դոլար

Ոսկրածուծի փոխպատվաստման վիրահատությունը կարող է իրականացվել 2 եղանակով: Առաջին տարբերակում մարդու օրգանիզմից առանձնացվում և սառեցվում են ցողունային բջիջները: Դրանից հետո պացիենտը ստանում է բուժման արագացված, ուժեղացված կուրս (որպես կանոն՝ այս գործողությունն իրականացվում է քաղցկեղի դեպքում): Բուժման հաջող ընթացքից հետո նախապես սառեցված բջիջները տեղափոխում են օրգանիզմ՝ արյան առողջ բջիջները վերականգնելու նպատակով: Այս միջամտությունն արժե շուրջ 300.000 դոլար:

Մյուս՝ առավել թանկարժեք տարբերակում ներառված է նաև ոսկրածուծի դոնոր գտնելը: Փոխպատվաստման այս տեսակն անվանում են ալլոգեն: Այն կարող է արժենալ մինչև 676.800 դոլար:

4. Թոքերի փոխպատվաստում. 797.200՝ երկու թոքերի, 561.200 դոլար՝ մեկ թոքի դեպքում

Թոքերի փոխպատվաստումը համարվում է թոքային ծանր հիվանդություններ ունեցող մարդկանց բուժման վերջին տարբերակ: Ցուցված է միայն այն դեպքում, երբ արդեն փորձվել են բուժման բոլոր մյուս եղանակները, ընդ որում՝ անօգուտ:

Կարևոր է իմանալ, որ ԱՄՆ-ում թոքերի փոխպատվաստման վիրահատությունների գերակշիռ մասն ամեն տարի կատարվում է ծխախոտի չարաշահման հետևանքով առաջացած հիվանդություններից մարդու կյանքը փրկելու համար:

3. Սրտի փոխպատվաստում. արժեքը՝ 997.000 ԱՄՆ դոլար

Սրտի փոխպատվաստման վիրահատությունն աշխարհում համարվում է բժշկական ամենառիսկային միջամտություններից մեկը՝ հետապնդելով բազմաթիվ մահացու բարդություններ:

Այս վիրահատությունը գրեթե կրկնակի գերազանցում է սրտի բաց վիրահատության արժեքը, և սա արդարացված է: Չէ՞ որ այս դեպքում վիրաբույժները ոչ միայն աշխատում են պացիենտի հիվանդ սրտի հետ, այլ նաև հեռացնում են այն և փոխարինում դոնորի առողջ սրտով:

Միջին տվյալներով, սրտի փոխպատվաստումից հետո մարդու կյանքի տևողությունը կազմում է 15 տարի՝ կախված նրա տարիքից:

2. Սրտի և թոքերի միաժամանակյա փոխպատվաստում. արժեքը՝ 1.148.400 ԱՄՆ դոլար

Այս երկու խիստ ռիսկային վիրաբուժական գործողությունների համատեղումն առաջին հայացքից անհնարին է թվում, սակայն փաստերը վկայում են, որ ամեն տարի իրականացվում է 100 նման վիրահատություն:

Համապատասխան դոնոր գտնելը, վիրահատության ինքնին բարդագույն ընթացքը և հետվիրահատական աննկարագրելի ծախսերն էլ հենց այս միջամտությունը դարձնում են այսքան թանկարժեք:

1. Աղիքի (աղիների) փոխպատվաստում. արժեքը՝ 1.206.000 ԱՄՆ դոլար

Նույնիսկ թոքերի և սրտի միաժամանակյա փոխպատվաստումն ավելի հեշտ է թվում այս վիրահատության համեմատությամբ: Բարդության նման աստիճանը պայմանավորված է այն հանգամանքով, որ այս դեպքում գործ ունենք մարդու օրգանիզմի ամենախոշոր և ամենաերկար օրգանի հետ: Որպես կանոն, այս միջամտությունն իրականացվում է միայն մահվան շեմին գտնվող պացիենտների դեպքում:

Աղիքի փոխպատվաստման վիրահատությունը տևում է մինչև 12 ժամ: Որոշ դեպքերում, միաժամանակ իրականացվում է նաև լյարդի փոխպատվաստում, ինչն առավել զարմանահրաշ, բարդ և երկարատև է դարձնում վիրաբուժական այս միջամտությունը:

Աղբյուր` doctors.am