Փաստ ինֆո

Էրեբունի և Նուբարաշեն վարչական շրջանների ընդհանուր իրավասության դատարանի ներկայումս պաշտոնաթող դատավոր Վլադիմիր Գրիգորյանի օգնական Արմինե Կարապետյանը, ով մեղադրվում էր խոշոր չափերով խարդախության փորձի մեջ, նույն դատարանի դատավոր Արտուշ Գաբրիելյանի նախագահությամբ, անպարտ է ճանաչվել և արդարացվել՝ արարքում հանցակազմի բացակայության հիմքերով:

Դատավորի օգնական՝ Արմինե Կարապետյանը մեղադրվում էր խոշոր չափերով ուրիշի գույքը հափշտակելու դիտավորությամբ, նույն դատարանի վարույթում քննվող ԵԷԴ/0047/01/14 քրեական գործով ամբաստանյալ Գ.Եսայանի նկատմամբ ազատազրկման հետ չկապված պատժատեսակը նշանակելու համար դատավորին կաշառք տալու պատրվակով` խաբեությամբ ամբաստանյալի մորից 1500 ԱՄՆ դոլար պահանջելու մեջ:

Նախաքննական մարմնի գնահատմամբ՝ դատավորի օգնականը փորձել է խաբեությամբ կնոջից հափշտակել 619 935 ՀՀ դրամին համարժեք 1500 ԱՄՆ դոլար, սակայն հանցագործությունն ավարտին չի հասցրել` իր կամքից անկախ հանգամանքներով:

Գործով նախաքննության նախնական փուլում Արմինե Կարապետյանին մեղադրանք էր առաջադրվել ՀՀ քրեական օրենսգրքի 313-րդ հոդվածի 2-րդ մասի 2-րդ կետով՝ կաշառքի միջնորդության մեջ, սակայն մինչ գործը դատարան գնալը՝ առաջադրված մեղադրանքը վերաորակվեց՝ 34-178-րդ հոդվածի 2-ին մասի 2-րդ կետի:

Հիշեցնենք նաև, որ դատավորի օգնականի նկատմամբ որպես խափանման միջոց ընտրված նախնական 2 ամիս ժամկետով կալանավորումը, վերաքննիչ բողոքարկվելուց հետո, բեկանել էր և վերացվել կալանքը՝ նրա նկատմամբ որպես խափանման միջոց ընտրվելով չհեռանալու մասին ստորագրությունը:

Այսպիսով, դատարանն իր իրավական վերլուծություններում նշել է, որ հիշյալ քրեական գործով դատական նիստերի արձանագրությունները պարունակող լազերային կրիչի վերարտադրությամբ հաստատվել է, որ նախագահող դատավոր՝ Վլադիմիր Գրիգորյանի կողմից դատավճռի եզրափակիչ մասը հրապարակման ավարտից հետո լսվում է, թե մի կնոջ կողմից՝ «պարոն դատավոր, եթե իմ էրեխու հետ մի հատ բան էղավ, բոլոր անձնակազմով պատասխան կտաք, ապա մի քանի րոպե անց նույն կինը այս անգամ բղավելով ասում է՝ «փաստորեն փող չտվեցի, դատապարտում եք...»:

Դատարանը հաստատված է համարել նաև, որ տուժող Ալինա Հովհաննիսյանը դատավորի օգնական՝ Արմինե Կարապետյանին գումար չի տվել։

Իսկ գործով ձեռք բերված և ենթադրյալ արարքում Արմինե Կարապետյանի մեղքը հիմնավորող միակ և ուղղակի ապացույցը է հանդիսանում տուժող Ալինա Հովհաննիսյանի ցուցմունքները, որոնք նախաքննության ընթացքում բազմակի հակասական փոփոխությունների են ենթարկվել, իսկ գործում առկա նյութերը, գործով ձեռք բերված փաստական տվյալներն ու դատաքննության ընթացքում տուժողի արտահայտած դիրքորոշումները, դատարանին` վերջինիս կողմից տված ցուցմունքների արժանահավատությունը կասկածի տակ դնելու հիմքեր են տալիս։

Մասնավորապես, դատարանը գտել է, որ վարույթն իրականացնող մարմինը քրեադատավարական օրենսդրության խնդիրներներից ելնելով պարտավոր էր քրեաիրավական որակման ենթարկել տուժող Ալինա Հովհաննիսյանի գործողություններն, ինչն անհասկանալիորեն չի իրականացրել։

Ինչ վերաբերում է ամբաստանյալ Արմինե Կարապետյանի կողմից նախաքննության և դատաքննության ընթացքում տված ցուցմունքների արժանահավատությանը, ապա դատարանն արձանագրել է, որ դատաքննությամբ որևէ ապացույց կամ փաստարկ ձեռք չի բերվել, որը կարող էր կասկածի տակ դնել Արմինե Կարապետյանի ցուցմունքների արժանահավատությունը։

Այսպես, դատաքննությամբ ապացույցների բազմակողմանի, լրիվ և օբյեկտիվ հետազոտության վրա հիմնված ներքին համոզմամբ և բոլոր ապացույցների` միմյանց հետ համադրելու և դրանք վերաբերելիության և թույլատրելիության սահմաններում գնահատելու արդյունքում, դատարանը հանգել է հետևության, որ դրանք բավարար չեն ամբաստանյալ Արմինե Կարապետյանի անմեղության կանխավարկածը հաղթահարելու համար, նաև հիմնավոր կասկածից վեր ապացուցողական չափանիշին համապատասխան հաստատված համարելու, որ նա կատարել է ՀՀ Քրեական օրենսգրքի 34-178 հոդվածի 2-րդ մասի 2-րդ կետով նախատեսված հանցագործությունը։

Դատարանը հաշվի առնելով, որ քրեական գործով ձեռք բերված ապացույցները բավարար չեն հաստատված համարելու ամբաստանյալ Արմինե Կարապետյանի կողմից Ալինա Հովհաննիսյանից խաբեության եղանակով 1.500 ԱՄՆ դոլար հափշտակելու փորձ կատարելը, գտնել է, որ պետք է ճանաչել և հռչակել Արմինե Կարապետյանի անմեղությունը առաջադրված մեղադրանքում արարքում հանցակազմի բացակայության հիմքերով։

Աղբյուր` Փաստինֆո