Փաստ ինֆո

Քաղաքագետ Ալեքսանդր Իսկանդարյանը հավանականություն տեսնում է, որ Գերմանիայի Բունդեսթագը հունիսի 2-ին կընդունի Հայոց ցեղասպանությունը ճանաչող և դատապարտող բանաձևը:

Հունիսի 2-ին լրագրողների հետ հանդիպմանը քաղաքագետը նշեց, սակայն, որ այդ հավանականությունը 100-տոկոսանոց չէ: «Ես տեսնում եմ հավանականություն, որ այսօր այդ բանաձևն ընդունվի, սակայն չեմ կաող ասել, որ դա 100-տոկոսանոց է: Համաձայն չեմ այն չափազանց լավատեսական գնահատականների հետ, թե գերմանացիներն անպաման կընդունեն այդ բանաձևը»,- «Արմենպրես»-ի հաղորդմամբ՝ նշեց քաղաքագետը:

Նրա խոսքով՝ թեմայի վերաբերյալ ավելի մանրամասն խոսելու համար հարկավոր է շատ լավ տեղյակ լինել Գերմանիայի ներքին քաղաքականությանը, քաղաքական ուժերի դիրքորոշումներին, զարգացումներին՝ հասկանալու համար, թե որքանով է հավանական Բունդեսթագի կողմից Հայոց ցեղասպանության դատապարտումը:

«Դրա համար ես զերծ կմնամ ավելորդ գնահատականներից և կանխատեսումներից: Ինձ համար միայն հասկանալի է, որ կա հավանականություն, որը 100-տոկոսանոց չէ»,- եզրափակեց Իսկանդարյանը:

Այսօր Գերմանիայի Բունդեսթագում քննարկվում է Հայոց ցեղասպանության մասին բանաձևի նախագիծը: Բանաձևն ունի «1915 և 1916 թվականներին հայերի և մյուս քրիստոնյա փոքրամասնությունների ցեղասպանության և հիշատակի մասին» անվանումը:

Բունդեսթագում Հայոց ցեղասպանության բանաձևի ընդունման շուրջ 2016 թվականի փետրվարի 25-ին ծավալված բուռն քննարկումները քվեարկության չհանգեցրին: Իշխող կոալիցիայի և բանաձևի ընդունումը նախաձեռնած «Դաշինք 90/ Կանաչներ» կուսակցության ներկայացուցիչների իրարաﬔրժ դիրքորոշման ու գնահատականների արդյունքում որոշվեց բանաձևը հետ կանչել լրացուցիչ մշակման համար:

Գերմանիայի խորհրդարանը դեռևս 2005 թվականին ընդունել է 1915 թվականին Օսմանյան կայսրությունում հայերի զանգվածային բնաջնջման, էթնիկ զտուﬓերի և աքսորի մասին
բանաձև, որում, սակայն, նշված չի եղել «ցեղասպանություն» եզրույթը:

Գերմանիայի դիրքորոշման մեջ շրջադարձ տեղի ունեցավ 2015թ. ապրիլի 20-ին` Գերմանիայի Դաշնության արտաքին գործերի նախարար Ֆրանկ-Վալտեր Շտայնմայերի և կանցլեր Անգելա
Մերկելի խոսնակ Շտեֆան Զայբերթի հայտարարություններից հետո: Իսկ Գերմանիայի Դաշնության նախագահ Յոահիմ Գաուկն ապրիլի 23-ին Բեռլինի Մայր տաճարում կայացած Հայոց ցեղասպանության հիշատակի արարողությանն իր ելույթում հայերի կոտորածները «ցեղասպանություն» որակեց:

2015 թվականի ապրիլի 24-ին Բունդեսթագում քննարկման դրվեց 1915 թվականին Օսմանյան կայսրությունում հայերի Ցեղասպանությունը ճանաչող նոր բանաձև:

Նիստը բացեց Բունդեսթագի նախագահ Նորբերթ Լամերթը, ով 1915 թվականի Օսմանյան կայսրությունում տեղի ունեցած պատմական դեպքերն անվանեց ցեղասպանություն:

Նիստի ընթացքում տարբեր կուսակցական խմբակցությունների ղեկավարներ ևս հայանպաստ հայտարարություններ արեցին՝ ընդունելով կատարվածը: Սակայն բանաձևի քվերակությունը հետաձգվեց անորոշ ժամանակով:

Լուսանկարը՝ Ֆոտոլուրի

Աղբյուր` Փաստինֆո