Փաստ ինֆո

ՀՀ ԱԺ պատգամավոր Գուրգեն Արսենյանի որդու գործով հետախուզման մեջ գտնվող երկու անձինք հայտնաբերվել են ու կալանավորվել: Խոսքը՝ Գ.Գրիգորյանի և Ա.Ներսիսյանի մասին է, ովքեր մայիսի 16-ից գտնվում են հետախուզման մեջ՝  ՀՀ քրեական օրենսգրքի 258-րդ հոդվածի 4-րդ մասով։

«Փաստինֆո»-ի տեղեկություններով՝ պատգամավորի որդու՝ Գուրգեն Արսենյանի խափանման միջոց կալանավորումը դատախազի որոշմամբ փոխարինվել է չհեռանալու մասին ստորագրությամբ: Ի դեպ, նրան ձերբակալելու  գրավոր ցուցումը եւս  քննիչին տվել էր դատախազը։ Հետագայում արդեն քննիչը նրան մեղադրանք էր առաջադրել եւ որպես խափանման միջոց կալանավորումը կիրառելու միջնորդություն ներկայացրել դատարան։

Նշենք նաև, որ առաջին ատյանի դատարանի՝ Արսենյանի կալանավորման որոշման դեմ վերջինիս պաշտպան Հայկ Ալումյանը ներկայացրել էր վերաքննիչ բողոքը, ինչը մերժվել էր:

Պաշտպանը հայտարարել էր Վճռաբեկ բողոք ներկայացնելու մասին:

Հիշեցնենք, որ ապրիլի 17-ին Երևանի գիշերային ակումբներից մեկում տեղի է ունեցել խուլիգանություն, և հենց այս գործի շրջանակներում  պատգամավորի որդուն մեղադրանք է առաջադրվել՝ ՀՀ քրեական օրենսգրքի 258-րդ հոդվածի 4-րդ մասով՝ խուլիգանություն, որը կատարվել է զենքի կամ որպես զենք օգտագործվող առարկաների գործադրմամբ:

Իսկ մայիսի 14-ին առաջին ատյանի դատարանի որոշմամբ  Արսենյանի որդու՝ Գուրգեն Արսենյանի նկատմամբ՝  որպես խափանման միջոց էր ընտրել կալանավորումը:

Աղբյուր` Փաստինֆո