Փաստ ինֆո

Հիմնադիր խորհրդարանի անդամ Գևորգ Սաֆարյանի գործով այսօր սկսվեց դատաքննությունը: Ըստ մեղադրական եզրակացության եզրափակիչ մասի՝ նա 2016թ. հունվարի 1-ի կեսգիշերին Երևանի Ազատության հրապարակում հավաքի մասնակից մի շարք քաղաքացիների հրահրած վիճաբանության ու քաշքշուկի ժամանակ ոչ վտանգավոր բռնություն է գործադրել իր ծառայողական պարտականությունները կատարող ոստիկանի հանդեպ՝ բռունցքով ու ոտքով նրան հարվածելով:

Գևորգ Սաֆարյանը հայտարարեց, որ մեղադրանքի էությունն իրեն պարզ չէ: Մասնավորապես, պարզ չէ, թե ի՞նչ ասել է «քաղաքացիների կողմից հրահրված», ի՞նչ և ինչպե՞ս է ծառայողական պարտականություններ կատարել ոստիկանը և արդյոք նա դուրս չի՞ եկել իր ծառայողական լիազորությունների շրջանակից: Ըստ ամբաստանյալի, իր համար պարզ չեն նաև մեղադրանքի մեջ շարադրված մի շարք հանգամանքներ:

Գ.Սաֆարյանը նաև հայտարարեց, որ իրեն մեղավոր չի ճանաչում առաջադրված մեղադրանքում, համարում է, որ դա քաղաքական հետապնդում է իր հանդեպ:

Գ.Սաֆարյանի պաշտպան, փաստաբան Տիգրան Հայրապետյանն ևս հայտարարեց, որ պարզ չէ, թե ինչպիսի՞ ծառայողական գործողությունների ժամանակ ի՞նչ օրինական կարգադրության չի ենթարկվել Գևորգ Սաֆարյանը և ի՞նչ էր տեղի ունենում, որ նա կատարել է ենթադրյալ իրեն մեղսագրվող ձեռքով ու ոտքով հարվածները: Առանց այդ ամենի պարզաբանման, ըստ պաշտպանի, իրենք չեն կարող արդյունավետ պաշտպանություն իրականացնել:

Մեղադրողը միջնորդեց սահմանել ապացույցների հետազոտման հետևալ հաջորդականությունը՝ նախ հարցաքննել տուժողին, վկաներին, ամբաստանյալին, հետազոտել գործի գրավոր նյութերը, վերջում հետազոտել ապացույց ճանաչված տեսանյութը: Պաշտպանական կողմը տեսակետ հայտնեց, որ գործի արդյունավետ, բազմակողմանի, օբյեկտիվ քննության համար անհրաժեշտ է նախ հետազոտել երկու տեսագրությունները:

Դատարանը բավարարեց պաշտպանական կողմի միջնորդությունը և որոշում կայացրեց նախ զննել տեսանյութը, հարցաքննել տուժողին, մեղադրանքի կողմից դատակոչված 13 վկաներին, հետազոտել գործի մյուս ապացույցներն ու փաստաթղթերը: Դրանից հետո դատարանում կհարցաքննվեն պաշտպանական կողմի միջնորդած ևս 13 վկաներ, ապա կքննարկվի նաև այլ ապացույցներ ներգրավելու հարցը:

Մինչ այդ պաշտպանական կողմը հայտարարել էր, որ մեղադրանքի կողմը դատակոչի ցուցակում ընդգրկել է 13 վկաների, որոնցից 10-ը ոստիկաններ են և 3-ը ստորգետնյա կայանատեղիի աշխատակիցներ, վերջիններս մոտավոր ցուցմունքներ են տվել: Մինչդեռ ականատես քաղաքացիներ չեն ընդգրկվել դատակոչի ցուցակում՝ պաշտպանական կողմի ներկայացրած վկաների թվում են, մասնավորապես, Գարեգին Չուգասզյանը և Կարո Եղնուկյանը, ընդհանուր առմամբ՝ 13 քաղաքացիներ: Գ.Սաֆարյանի պաշտպանը միջնորդել էր նրանց դատարան հրավիրել ու հարցաքննել:

Մեղադրողը առարկել էր միջնորդության դեմ՝ հայտարարելով, որ նրանց մեծ մասը հարցաքննվել է և նրանց ցուցմունքներին գնահատական է տրվել, մրցակցության սկզբունքը չի խախտվում և որ դատակոչում ընդգրկված վկաները բավարար են մեղադրանքը հաստատելու համար:

Դատարանը, սակայն, հաշվի առնելով, որ անձն իրավունք ունի հարցաքննել իր դեմ ցուցմունքներ տված անձանց, ինչպես նաև ներկայացնել իր վկաներին, բավարարել էր պաշտպանական կողմի միջնորդությունը:

Գևորգ Սաֆարյանը ևս մեկ հայտարարությամբ հանդես եկավ՝ ըստ նրա, մեղադրողն ամեն կերպ փորձում է կոծկել այն ամենը, ինչ տեղի է ունեցել: Նա ընդգծեց նաև, որ ըստ մեղադրողի, իրենց ներկայացրած վկաները գործի ելքի համար ոչ էական փաստեր են ներկայացրել, մինչդեռ նրանք ներկայացրել են շատ կարևոր փաստեր: Այդուհանդերձ, վկաներին ֆիլտրել են ու դատակոչի ցուցակում ընդգրկել ոստիկաններին: Դա ապացուցում է, որ սա քաղաքական գործ է և իրավաբանության հետ կապ չունի:

Իսկ ամբաստանյալի պաշտպան Տիգրան Հայրապետյանը հավելեց, որ մեղադրանքը արհեստածին, անհիմն է ու նպատակ ունի սահմանափակել իր պաշտպանյալի քաղաքական գործունեությունը:

Դատական նիստը հետաձգվեց` հաջորդ դատական նիստին տեսանյութի զննության համար կապահովվեն անհրաժեշտ տեխնիկական միջոցներ:

Աղբյուր` Փաստինֆո