Փաստ ինֆո

Լեռնային Ղարաբաղի Պաշտպանության բանակի նախկին հրամանատար Սամվել Բաբայանի հարցազրույցը Արցախում որևէ առանձնակի աժեոտաժ չի առաջացրել: Այդ մասին Panorama.am-ի թղթակցին տված հարցազրույցում ասել է Արցախի նախագահի մամուլի խոսնակ Դավիթ Բաբայանը՝ մեկնաբանելով «Սիվիլնեթ»-ին տված Սամվել Բաբայանի հարցազրույցը:

«Շատ հանգիստ ենք ընդունել, ճիշտ է կան վիճահարույց բազմաթիվ դրույթներ, բայց ընդհանուր առմամբ այդպիսի հարցազրույցներ և այդպիսի կարծիքների փոխանակում գրեթե ամեն օր լինում են», -հավելել է պարոն Բաբայանը:

Մասնավորապես, ըստ Դավիթ Բաբայանի՝ վիճահարույց է Բաբայանի այն հայտարարությունը, որ Ադրբեջանի ձեռնարկած գործողությունները ապրիլի 2-ին պարզապես դիվերսիա էին:

«Անձամբ ես, բազմաթիվ այլ մասնագետներ, փորձագետներ ևս, կարծում եմ՝ չեն համաձայնի նրա այն գնահատականի հետ, որ չորսօրյա պատերազմը պատերազմ չէր, այլ ուղղակի դիվերսիա, սադրանք: Դա այդպես չէ: Ադրբեջանը իրոք պատրաստել էր խոշոր հարձակում: Այդպիսի վիճահարույց հարցեր կային հարցազրույցում: Բայց ամեն օր բազմաթիվ այնպիսի մեկնաբանություններ տեղի են ունենում և տարածվում են համացանցում», -նկատել է Դավիթ Բաբայանը:

Դիտարկմանը, թե Սամվել Բաբայանը կարծես սովորական մարդ չէ, Արցախի ՊԲ նախկին հրամանատարն է եղել, երկար ժամանակ բացակայել է երկրից ու փորձում է մասնագիտական գնահատական տալ իրավիճակին, Արցախի նախագահի խոսնակը արձագանքել է. «Նամանավանդ որ երկար բացակայել է երկրից: Սա պարզապես հայտ է քաղաքականություն մտնելու»:

Հարցին, թե հարցազրույցում քաղաքական հայտարարություններ չեն արվել, ինչի՞ց է խոսնակը ենթադրում, որ Սամվել Բաբայանը քաղաքականություն մուտք գործելու հայտ է ներկայացնում, Դավիթ Բաբայանը պատասխանել է. «Չէ, այն, որ այնտեղ կային նման գնահատականներ իր դերակատարության մասին, որ այստեղ սխալ է, պետք է սա անել, նա անել: Սա պարզապես քաղաքական հայտի դրվագներ են: Երևում է, որ մարդը ուզում է մտնել քաղաքական դաշտ: Դե մենք ժողովրդավարական երկիր ենք և խնդիրներ որևէ մեկի մոտ չի լինի»:

Մյուս հարցին, թե որտե՞ղ կարող է Սամվել Բաբայանը քաղաքականությամբ զբաղվել՝ Արցախո՞ւմ, թե Հայաստանում, Արցախի նախագահի խոսնակը պատասխանել է. «Դժվար է ասել, հավանաբար, Արցախում: Ժամանակը ցույց կտա: Եթե այդպիսի զարգացում լինի: Հիմա շատ մարդիկ են հայտ ներկայացնում, հետո վերանայում: Բայց կրկնում եմ՝ սովորական հարցազրույց է մանավանդ որ 2016-ի վերջին Հայաստանում, 2017-ին Արցախում ակտիվ քաղաքական շրջան է: Ճիշտ ժամանակին հաշվարկած քայլ է՝ քաղաքական դաշտ մտնելու համար»:

Ինչ վերաբերում է Արցախի պաշտպանական գերատեսչության հետ նրա հնարավոր համագործակցության մասին հարցին՝ հաշվի առնելով նրա մասնագիտական կարողությունները, նախկին փորձը, Դավիթ Բաբայանը արձագանքել է.

«Կարծում եմ՝ մենք ունենք կայացած զինված ուժեր, մենք ունենք շատ հզոր միջին և ստորին կառավարման հրամանատարական օղակներ, բարձր օղակները նույնպես համապատասխանում են իրենց գործունեությանը և անում են հնարավորը: Տեսնենք: Դա արդեն Պաշտպանության բանակի և նախարարի անելիքներն են: Բայց կարծում եմ, որ մենք բարեբախտաբար անձերից կախված չենք, և դա մեր ձեռքբերումն է»:

Լուսանկարում՝ Դավիթ Բաբայանը
Լուսանկարը՝ «Արցախպրես»-ի

Աղբյուր` Փաստինֆո