Փաստ ինֆո

Պաշտպանության նախարարությունից շուրջ կես միլիոն դոլարի հափշտակության գործով սայլը տեղից չի շարժվում:

2015թ. նոյեմբերի 20-ին Արարատի և Վայոց Ձորի մարզի ընդհանուր իրավասության դատարանի՝ դատավոր Լևոն Արազյանին մակագրված՝ ՀՀ զինված ուժերի օպերատիվ կառավարման կենտրոնի հեռուստակոնֆերանս համակարգի ստեղծման գործընթացում ՀՀ ՊՆ-ից առանձնապես խոշոր չափերի հափշտակություն կատարելու գործով մինչ այս պահը՝ շուրջ 6 ամսվա ընթացքում կայացվել է 7 դատական նիստ:

Վերջին՝ մայիսի 30-ին նշանակված դատական նիստի վերաբերյալ էլ Դատական տեղեկատվական համակարգում որևէ գրառում չկա. ասել է, թե չի հասկացվում կայացել է նիստը, թե ոչ:

Անվերջ պնդումներ այն մասին, թե դատական գործերը պետք է քննվեն ողջամիտ ժամանակահատվածում թերևս այս գործին կարծես չի վերաբերում:

Նշենք, որ Քրեական դատավարության 17-րդ հոդվածի համաձայն՝  յուրաքանչյուր ոք ունի արդարության բոլոր պահանջների պահպանմամբ, անկախ և անկողմնակալ դատարանի կողմից ողջամիտ ժամկետում իր շահերին առնչվող քրեական գործի քննության իրավունք:

Հոդվածի դիսպոզիցիան իհարկե չենք վիճարկում, սակայն ըստ երևույթին գործով մեղադրվող Աշոտ Սարգսյանի մոտ բավականին լավ է ստացվում «հիվանդի» կերպար կերտելը, իսկ դատարանին կարծես թե չի մտահոգում գործը ողջամիտ ժամկետում քննելու քր.դատ. պահանջը:

Հատկանշական է, որ գործով նախնական քննության ընթացքում եւս Աշոտ Սարգսյանը հաճախակի էր «հիվանդանում» հատկապես խափանման միջոցի հարցի քննարկման ժամանակ եւ քրեակատարողական վարչությանը, առողջապահության նախարարությանն ուղղված միջնորդագրերի արդյունքում ի վերջո հաջողվել քաշքշուկների դեմն առնել։ Հիմա նույնը շարունակվում է դատարանում։ Ի վերջո կես միլիոն դոլարը կատակ չէ։

Դատական տեղեկատվական համակարգից տեղեկացանք նաև, որ գործով նիստերից մեկն էլ կայացել է «Դատապարտյալների հիվանդանոց» ՔԿՀ-ում:

Ավելի վաղ տեղեկացրել ենք, որ գործը քննվել է ՀՀ ՔԿ զինվորական քննչական գլխավոր վարչության վարույթում եւ մի քանի այլ երկրների իրավապահ մարմինների հետ համագործակցության արդյունքում  քննչական կոմիտեին հաջողվել էր ձեռք բերել փաստաթղթերի բնօրինակները, որոնց համաձայն՝ տեսակոնֆերանս համակարգի ստեղծման համար սարքավորումների ձեռքբերման ընթացքում ներկայացվել են ուռճացված գներ, հաշիվ-ապրանքագրերում ներառվել են կեղծ տեղեկություններ, ինչիարդյունքում՝ նախնական տվյալներով հափշտակվել է շուրջ 455 հազար ԱՄՆ դոլարին համարժեք ՀՀ դրամ։

Այսպես՝  2013 թվականի օգոստոսի 21-ին «Էյ Ար-Այ Սի Թի» ՍՊ ընկերությունը ՀՀ ՊՆ-ի հետ ստորագրել է թիվ ԲԸԱՀԱՊՊՁԲ-1-3 պայմանագիրը՝ ՀՀ ԶՈՒ օպերատիվ կառավարման և իրավիճակների վերահսկման կենտրոնի տեսակոնֆերանս համակարգի ստեղծման համար անհրաժեշտ սարքավորումների ձեռքբերման վերաբերյալ։ Պայմանագրի արժեքը կազմել է 485.831.189 ՀՀ դրամ։

Նախքան ՀՀ պաշտպանության նախարարության հետ պայմանագրի կնքումը նշված ընկերության տնօրենը մասնակցել է բանակցային գործընթացին։  Նկատի ունենալով, որ ՀՀ-ում նմանատիպ համակարգ չկա, և համակարգի ստեղծման համար առաջադրված խնդիրները բարդ ու մեծածավալ են, որոնք պահանջում են նոր տեղեկատվական տեխնոլոգիայի կիրառում, և անհրաժեշտ կլինի մի շարք երկրներից ձեռք բերել տարբեր տեսակի ու քանակի սարքավորումներ, որոնք ՀՀ շուկայում չկան, ինչի պարագայում  ՀՀ պաշտպանության նախարարության համապատասխան պաշտոնատար անձինք հնարավորություն չեն ունենա ներկայացված գնային առաջարկն ուսումնասիրել և համեմատել շուկայական արժեքների հետ, բացի այդ,  արտերկրից ձեռք բերված ապրանքները հասցեագրվելու են ՀՀ պաշտպանության նախարարության անունով, և դրանք ենթակա չեն հայտարարագրման՝ արտերկրից ձեռք բերվող ապրանքների գնային առաջարկում ներկայացրել է դրանց իրական արժեքներից տարբերվող, ուռճացված գներ:

Անհրաժեշտ սարքավորումները ձեռք են բերվել  տարբեր երկրներից:

Քննչական կոմիտեն ավելի վաղ տեղեկացրել էր, որ գործով քննության բազմակողմանիությունը, լրիվությունն ու օբյեկտիվությունն ապահովելու նպատակով իրավական օգնություն ցույց տալու մասին միջնորդություններ են ուղարկվել մի քանի այլ երկրների իրավապահ մարմիններին և համագործակցության արդյունքում ԱՄՆ-ից և Վրաստանից ստացվել էին տվյալ երկրներում գործող տարբեր ընկերություններից սարքավորումներ ձեռք բերելու վերաբերյալ «Էյ Ար-Այ Սի Թի» ՍՊ ընկերության գործարքների արժեքների մասին փաստական տվյալներ, պարզվել կատարված հափշտակության մեխանիզմը։

Կատարված խարդախությունը թաքցնելու նպատակով ձեռք են բերվել պայմանագրի տեխնիկական տվյալներին համապատասխան ապրանքներ, սակայն նշված ընկերության տնօրենի կողմից դրանց վերաբերյալ պատրաստվել են կեղծ տեղեկություններ պարունակող փաստաթղթեր. մուծվել է պայմանագրով նախատեսված հարկային պարտավորությունների ողջ գումարը, իսկ հափշտակված գումարներն ընկերության  հաշվապահական հաշվառման փաստաթղթերում ձևակերպվել են որպես կրեդիտորական պարտքեր:

Այսպիսով, ՀՀ պաշտպանության նախարարությունից առանձնապես խոշոր չափերի գումար՝ 454.916,65 ԱՄՆ դոլարին համարժեք 186.136.612 մլն ՀՀ դրամ հափշտակելու համար Աշոտ Սարգսյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով:

Նրա նկատմամբ որպես  խափանման միջոց է ընտրվել կալանավորումը:

Հիշեցնենք, որ վերջին օրերին ՊՆ-ից հափշտակություն կատարելու փաստով ձերբակալվել են 3 բարձրաստիճան զինվորականներ: Սա այն դեպքում երբ երկիրը գտնվում է պատերազմական իրավիճակում, և բանակին օգնելու՝ քաղաքացիների անկեղծ մղումներին զուգահեռ հայտնվում անձինք, ովքեր փորձում են հարստանալ երկրի պաշտպանությունն ապահովվող կառույցի հաշվին:

Աղբյուր` Փաստինֆո