Փաստ ինֆո

Էրեբունի և Նուբարաշեն վարչական շրջանների ընդհանուր իրավասության դատարանում այսօր շարունակվեց Երրորդմասցի Լյովիկի ու նրա ընկերների սպանության գործով դատական նիստը: Հարցաքննվեց վկա Վահագն Մնացականյանը, ով դեպքից հետո ամբաստանյաներին իր մեքենայով տեղափոխել է մայրաքաղաքի մեկ այլ վարչական շրջան:

Վկայի խոսքով՝ ինքն ամբաստանյալներին չի ճանաչում և նրանց տեսել է դեպքից հետո հեռուստացույցով՝ լուրերի ժամանակ:

Ըստ վկայի՝ տվյալ ժամանակահատվածում աշխատել է «Նուբարաշեն» ՔԿՀ-ից ոչ շատ հեռու գտնվող ավտովերանորոգման կետում, երբ 3 անձ մոտեցել են և խնդրել իրենց հիվանդանոց տեղափոխել, քանի որ նրանցից մեկն իրեն լավ չի զգացել: Վկան չի մերժել, նստել են մեքենան և ուղևորվել «Էրեբունի» ԲԿ, սակայն մինչև ԲԿ հասնելը իրեն խնդրել են այլ ուղղությամբ գնալ. ուղևորվել են դեպի Մասիվ, որտեղ «Մերսեդեսի» սրահի մոտ խնդրել են կանգնել, իջել են, շնորհակալություն հայտնել և մեքենայի մեջ որպես վճար թողել 10 000 ՀՀ դրամ:

Վկան պատմեց նաև, որ երբ վերադարձել է իր աշխատավայր, այնտեղ են գտնվել իրավապահները, իսկ նախաքննության ընթացքում ցուցմունք տալու ժամանակ իրեն բազմաթիվ նկարներ են ցույց տվել՝ պարզելու համար արդյոք լուսանկարներում պատկերված անձի՞նք են եղել իր ավտոմեքենան նստողները, թե՝ ոչ, ինչպես նաև ճանաչման գործընթաց է կազմակերպվել: Վկան մեկ անձի ճանաչել է:

Վկայի ցուցմունքներում առկա էական հակասությունների պատճառով մեղադրող դատախազ Արամյանի միջնորդությամբ հրապարկվեց նրա նախաքննական ցուցմունքները:

Մասնավորապես, ըստ վայի նախաքննական ցուցմունքի՝ 3 անձինք մոտեցել են իր աշխատավայր և հարցրել, թե ում ավտոմեքենան է դրսում կանգնած, ապա խնդրել են իրենց տեղափոխել տվյալ վայրից քիչ հեռու՝ ասելով, որ իրենց ընկերոջ սիրտը վատ է, «մեռնում է»: Ցուցմունքից պարզ դարձավ, որ «մեռնող» անձը Գաստիկ մականվամբ Վահան Հակոբյանն է եղել:

Վկան նաև նշել էր, որ նրանք բոլորը գունատ են եղել, դեմքները՝ քրտինքով պատված, սակայն հիվանդանոց գնալու փոխարեն ճանապարհին այդ անձինք նրան խնդրել են այլ ուղղությամբ գնալ: Այդ ժամանակ, ըստ վկայի նախաքննական ցուցմունքի, ինքը հասկացել է, որ «մի բան էն չի»:

Մեքենայից իջնելուց էլ՝ նշված անձինք եղել են «խառնված»: Դատարանում վկան որևէ տեղեկություն չհայտնեց այն մասին, որ այդ անձանց տեղափոխելու ժամանակ, նրանցից մեկն իրեն ասել է, որ հեռախոսով չխոսի: Այնինչ նախաքննական մարմնին հայտնել էր, որ մեքենան վարելու ժամանակ իր հեռախոսին զանգ է եկել, սակայն այդ 3 անձանցից մեկն իրեն ասել է՝ մի՛ պատասխանիր: Վկան պատասխանել է զանգին, որից հետո այդ անձանցից մեկն ասել է. «Տեղդ մի՛ ասա, ասա քիչ հետո կգամ»:

Միջադեպ՝ Երրորդմասցի Լյովիկի սպանության գործով դատական նիստի ժամանակ

Վկան նաև նշել է, որ ողջ ճանապարհին իրեն որևէ մեկը չի սպառնացել, և ինքը ստիպողաբար չի վարել ավտոմեքենան, քանի որ ինքը կամովին նրանց իր օգնությունն է ցուցաբերել, տարել է այնտեղ, որտեղ անհրաժեշտ է եղել:

Նախաքննական ցուցմունքում վկան նաև հայտնել է, որ վերադառնալու ճանապարհին տեղեկացել է՝ «Նուբարաշեն» ՔԿՀ-ի մոտ սպանություն է եղել, իսկ թե տվյալ անձինք որևէ կապ ունեցե՞լ են այդ սպանություն հետ, ինքը չգիտի:

Նշենք նաև, որ հակասություններից մեկն էլ այն է, որ դատարանում ցուցմունք տալիս վկան ասաց, որ ամբաստանյալներից ոչ մեկին չի ճանաչում, հեռուստացույցով է տեսել, իսկ նախաքննական մարմնին ցուցմունք տալիս մանրամասն նկարագրել էր նրանց արտաքինը, անգամ նշել էր մականունները:

Վկայի ցուցմունքը կշարունակվի հաջորդ նիստում, քանի որ, ինչպես ավելի վաղ տեղեկացրել էինք, նրա հարցաքննության ընթացքում միջադեպ էր գրանցվել դատական նիստերի դահլիճում:

Ըստ մեղադրանքի՝ 2015թ. մարտի 4-ին՝ ժամը 13:50-ի սահմաններում Վահան Հակոբյանը, Սարգիս Հախանումյանը և Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նշենք նաև, որ բոլոր երեք ամբաստանյալները «Գաստիկ»-ը՝ Վահան Հակոբյանը, «Տլե»-ն՝ Սարգիս Հախանումյանն ու «Ծգլ»-ը՝ Սարգիս Գրիգորյանը առաջադրված մեղադրանքում իրենց մեղավոր չեն ճանաչում:

Աղբյուր` Փաստինֆո