Փաստ ինֆո

Լիլիթ Մուսեյանը դեռևս այս տարվա հունվարի 15-ին դիմել է Սահմանադրական դատարան՝ խնդրելով ՀՀ սահմանադրության մի շարք հոդվածներին հակասող և անվավեր ճանաչել ՀՀ վարչական դատավարության օրենսգրքի 185-րդ հոդվածի 1-ին մասը՝ «ի հայտ գալուց հետո» բառակապակցության մասով:

Վիճարկվող հոդվածն սահմանում է, որ նոր երևան եկած կամ նոր հանգամանքներով դատական ակտի վերանայման դիմումը կարող է ներկայացվել համապատասխան հիմքն ի հայտ գալուց հետո՝ 3 ամսվա ընթացքում։

Ըստ դիմողի՝ ՀՀ վարչական դատավարության օրենսգրքի 185-րդ հոդվածի 1-ին մասը հակասում է Սահմանադրության 3-րդ, 61-րդ և 63-րդ հոդվածներին, Մարդու իրավունքների եվրոպական կոնվենցիայի 6-րդ և 13-րդ հոդվածներին, քանի որ խոչընդոտում է անձի դատավարական սկզբունքների իրացմանը, ինչպես նաև խախտում արդարադատության մատչելիության և հասանելիության սկզբունքները:

Դիմողի հիմնավորմամբ՝ Սահմանադրական դատարանի եզրակացություններն ու որոշումներն օբյեկտիվորեն հանրությանը հայտնի են դառնում պաշտոնական հրապարակումից հետո, հետևաբար՝ անձը ՍԴ-ի որոշմանը ծանոթանալու, վերանայման դիմում ներկայացնելու համար պետք է ունենա ողջամիտ ժամկետ՝ սկսած այն պահից, երբ փաստացի հնարավորություն է ունեցել ՍԴ որոշումը ձեռք բերելու և ՍԴ-ի որոշմամբ ղեկավարվելու համար:

Նշենք, որ հիշյալ գործի դատաքննությունը պետք է կայանար մայիսի 24-ին, սակայն ՍԴ-ի մայիսի 16-ի աշխատակարգային որոշմամբ դատաքննությունը փոխադրվել է մայիսի 31-ին՝ «ելնելով ՍԴ-ի ծանրաբեռնվածությունից»:

Աղբյուր` Փաստինֆո