Փաստ ինֆո

Մովսես Ներսիսյանի կողմից արյան հետքեր թողնելը մտածված է եղել, որպեսզի մարդիկ իմանային, որ Մովսեսը սպանվել է, և նա հանգիստ դուրս գար Հայաստանից:  Քրեական հեղինակություն համարվող Թևոսիկի եղբոր՝ Արթուր Սաֆարյանի, սպանության գործով այսօրվա դատական նիստում հայտարարեց գործով ամբաստանյալ Իսրայել Սարգսյանը:

Վերջինս մեղադրվում է Մովսես Ներսիսյանի կողմից Արթուր Սաֆարյանի սպանությունը կազմակերպելու ու դրան օժանդակելու մեջ, ապա այդ հանցանքը թաքցնելու նպատակով նաև Մովսես Ներսիսյանին սպանելու մեջ՝ վերջինիս դիակը չի հայտնաբերվել:

Դատարանում այսօր ավարտվեց 26 հատոր կազմող գործի 25-րդ հատորի հետազոտումը:

Մասնավորապես, հետազոտվեց Մովսես Ներսիսյանի և Իսրայել Սարգսյանի նկատմամբ իրականացված «արտաքին դիտում» օպերատիվ-հետախուզական միջոցառմանն առնչվող  մի շարք հարցադրումների շուրջ Ազգային անվտանգության ծառայությանն ուղղված ոստիկանության պատասխան գրությունը: Ըստ այդմ, հիշյալ երկու անձինք ոստիկանության ծառայողների կողմից դիտվել են որպես Արթուր Սաֆարյանի սպանությանը հնարավոր առնչություն ունեցող անձինք:

Մովսեսն ու Իսրայելը նորմալ շփվել են իրար հետ, և նրանց երկուսի հյուրանոց գնալը դիտվել է որպես նրանց հերթական հանդիպում (ըստ գործի տվյալների, Մովսեսը հյուրանոցում է սպանվել):

Ըստ ոստիկանության գրության, մինչև արնանման հետքերի հայտնաբերումն ու դրանք փորձաքննության ենթարկելը  իրենք կասկածելու հիմքեր չեն ունեցել առ այն, որ Մովսեսը սպանվել է Իսրայելի կողմից, որպեսզի կանխարգելեին ու կանխեին Մ.Ներսիսյանի սպանությունը:

Այսօրվա դատական նիստում հարցաքննվեցին  նաև Արթուր Սաֆարյանի հետ նույն շենքում բնակվող երկու վկաներ: Նրանցից մեկը Արթուր Սաֆարյանի սպանության օրը աղմուկից՝ հրավառության նման երեք զարկից, արթնացել է, մոտեցել է պատուհանին, տեսել է՝ շատ մարդիկ են հավաքվել: Հետագայում վկան իմացել է, որ ինչ-որ շենքի բնակիչ է սպանվել:

Երկրորդ վկան շփոթում էր սպանության ժամանակը՝  վկան իր հերթին հարց ուղղեց՝ առավոտյա՞ն չի եղել (մինչդեռ դեպքը տեղի է ունեցել կեսգիշերն անց):

Աղբյուր` Փաստինֆո