Փաստ ինֆո

2015թ. հունվարի 29-ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության ժամանակ նույն ննջարանում քնող կուրսանտ Տիգրան Դեմիրճյանն սպանության ժամանակ արթուն է եղել, բայց չի կարողացել միջամտել. «շատ էի վախեցել»,- ասաց նա:

Երևանի Ավան և Նոր-Նորք վարչական շրջանների ընդհանուր իրավասության դատարանում հարցաքննվեց տուժող Տիգրան Դեմիրճյանը, ով ինչպես սպանված Հայկազ Բարսեղյանին, այնպես էլ բոլոր ամբաստանյալներին ճանաչում է, նրանց հետ սովորել է ռազմական ինստիտուտում և նորմալ փոխհարաբերությունների մեջ են գտնվել:

Տուժողի խոսքով՝ դեպքից 2 օր առաջ ինքը և Մովսես Ազարյանը նստած հեռուստացույց են դիտել. «Այդ ժամանակ Մովսեսը կատակ էր ուզում անել ինձ հետ և տետրով հարվածել է իմ քունքին, որի հետևանքով կապտուկ է առաջացել, իսկ այդ դեպքից երկու օր անց, երբ Հայկազ Բարսեղյանը և մյուսները ճաշարանում ճաշելիս են եղել, Հայկազ Բարսեղյանին մոտեցել է Վաչեն ու ասել, որ «էդ խոսակցությունը ստեղ պետք ա չլինի, վերևը կխոսենք»:

Ըստ տուժողի՝ ավելի ուշ, երբ գնացել են քնելու, Հայկազին ննջարանից դուրս են կանչել, վերջինս 20-25 րոպե անց վերադարձել է ու հայհոյանքներ տվել, ապա պառկել է քնելու, իսկ կարճ ժամանակ անց ննջարան են եկել Գնել Թևոսյանը, Նորիկ Սահակյանը, Վաչե Սահակյանը և Մովսես Ազարյանը:

Նկարագրելով, թե ինքը ինչ է տեսել և լսել՝ տուժողը պատմեց, որ իր մահճակալը գտնվել է սպանված կուրսանտ Հայկազ Բարսեղյանի մահճակալի դեմ դիմաց, իսկ ինքը քանի որ մեջքի վրա է պառկած է եղե,լ տեսել է գործով 4 ամբաստանյալներին Հայկազ Բարսեղյանի մահճակալի մոտ կանգնած: Ըստ նրա՝ Հայկազ Բարսեղյանի գլխի հատվածում կանգնած են եղել Նորայր Սահակյանը և Գնել Թևոսյանը, իսկ ոտքերի մոտ՝ Վաչե Սահակյանը և Մովսես Ազարյանը:

Մեղադրողի հարցին, թե ի՞նչ էին անում նրանք, տուժողը պատասխանեց, որ չգիտի, միևնույն ժամանակ հավելեց, որ Հայկազն անկանոն շարժումներ է կատարել. «Մովսեսն ու Վաչեն պահել են Հայկազի ոտքերը, Նորիկը ոնց որ Հայկազի բերանը փակել, իսկ Գնելը չեմ հիշում, թե ինչ է արել»,- ասաց տուժողն ու հավելեց, որ ավելի ուշ իմացել է, որ Գնելը գործիքով հարվածել է Հայկազին:

Ըստ տուժողի՝ ինքը նաև լսել է, որ Նորայր Սահակյանը ցանկացել է ինչ որ քուղեր պոկել զինվորական բաճկոնների միջից, ապա հնչել է 2 առաջարկություն՝ դիակը կախելու կամ պատշգամբից վայր գցելու մասին: Ըստ տուժողի՝ դին կախելու առաջարկն արել է Վաչե Սահակյանը, իսկ Նորայրն առաջարկել է պատշգամբից ցած գցել:

Սկզբում տուժողը կարծել է, թե եկել են ծեծելու, բայց երբ լսել է, որ Հայկազը նրանց 4-ին հայհոյել է՝ ասելով՝ «ինչ եք անում … տղերք», ապա նաև լսել է սրտխառնոցի ձայն իր աչքերի դիմաց սևացել է և հասկացել, որ ինչ որ բան այն չի, որ եկել են ուրիշ նպատակներով:

Այդուհանդերձ, տուժողը չկարողացավ նկարագրել, թե ինչ է կատարվել իր հետ: Այդ ամենից հետո Վաչեն ու Մովսեսը դուրս են եկել ննջարանից, իսկ Գնելն ու Նորայրը, Հայկազի թևերն ընկած, դուրս են տարել նրան: Ըստ տուժողի՝ ինքն այդ ժամանակ էլ հասկացել է, որ Հայկազը մահացել է:

Նա նաև նշեց, որ ննջարանն այդ ժամանակ լուսավորված է եղել կանաչ լույսով, և սենյակ է թափանցել նաև միջանցքի լույսը, և այդ լուսավորության ներքո իր համար նկատելի է եղել, որ Մովսես Ազարյանը նստած ինչ որ բան է գրել, հարցին թե՝ ի՞նչ, տուժողը պատասխանեց, որ ուզում էին որպես ինքնասպանության փորձ ձևակերպել:

Թե ինչպե՞ս են հագցրել Հայկազի հագուստները, տուժողը չի տեսել. աչքերը փակ են եղել, չի ցանկացել, որ տեսնեն՝ ինքն արթուն է. վախեցել է, որ նույնն իր հետ կկատարվի:

Պաշտպանական կողմի հարցին, թե ինչո՞ւ որևէ միջոց չի ձեռնարկել՝ տեսնելով, որ իր ընկերոջը ծեծում են, տուժողը պատասխանեց, որ չի կարողացել, վախեցել է: Նա նաև հավելեց, որ իմացել է, թե այդ ամբողջ ընթացքում միայն ինքն է արթուն:

Երբ Հայկազին ննջարանից դուրս են տարել, որոշ ժամանակ անց Գնելն ու Վաչեն հետ են վերադարձել, տուժողը ինչ որ ձայներ է լսել, սակայն չգիտի, թե ինչ են արել: Միևնույն ժամանակ նա նշեց, որ վերադառնալով՝ նրանք որևէ մեկին չեն դիմել, ոչ մեկի հետ չեն խոսել:

Սպանության գիշերը թե երբ է քնել և ինչքան, տուժողը դժվարացավ պատասխանել, սակայն նշեց, որ երբ հաջորդ օրն առավոտյան արթնացել են կուրսանտ Սամվել Սերոբյանը Հայկազի անկողնուն է ձեռք տվել՝ իմանալով թե պառկած մարդ կա, սակայն պարզվել է, որ սպորտային հագուստ է դրված՝ իբրև մարդ է քնած, իսկ երբ նա ձեռքով հրել է անկողինը բացվել է ու ամբողջն արնաշաղախ վիճակում է եղել, որից հետո զեկուցել են գումարտակի պատասխանատուին և գնացել են Հայկազին փնտրելու:

Տուժողը նշեց նաև, որևէ անձի կողմից իր վրա ճնշում չի գործադրել ցուցմունք տալիս, որևէ մեկն իրեն չի սպառնացել դեպքից հետո, սակայն իր անվտանգությունից ելնելով՝ խնդրել է իր նկատմամբ պաշտպանություն կիրառեն:

Նիստը նախագահող դատավոր Դավիթ Հարությունյանի հարցին, թե ի վերջո ի՞նչ է տեղի ունեցել տվյալ գիշեր, տուժողը պատասխանեց՝ սպանություն:

Սպանությունից հետո տուժողն առողջական խնդիրներ է ունեցել, շոկային վիճակում է եղել, կակազել է, իսկ մեկ ամիս առաջ էլ հաճախել է հոգեբանի մոտ, վերջինիս ցուցումով ինքը դեղորայք է ընդունել, սակայն, ըստ նրա, դեռևս այդ վախի զգացողությունն իր մոտ առկա է:

Բնութագրելով ամբաստանյալներ Վաչե և Նորայր Սահակյաններին՝ տուժողն ասաց, որ նրանք ընկերասեր, հասնող են եղել, իսկ Մովսես Ազարյանը և Գնել Թևոսյանը՝ «կպնող էին»:
Այդուհանդերձ տուժողն ամբաստանյալներից բողոք, պահանջ չունի:

Տուժողի հարցաքննության ավարտին մեղադրող դատախազները գտան, որ նրա նախաքննական և դատաքննական ցուցմունքներում առկա են էական հակասություններ և միջնորդեցին հրապարակել նրա նախաքննական ցուցմունքները, դատարանը ևս գտավ, որ առկա են էական հակասություններ:

Հաջորդ դատական նիստում կհրապարակվի նրա նախաքննական ցուցմունքները:

Աղբյուր` Փաստինֆո