Փաստ ինֆո

ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով այսօր մեղադրանքի կողմը դատարանին ներկայացրեց թվով 3 փաթեթ, որոնցում սպանված կուրսանտի կիսաճտքավոր կոշիկներն էին և մի պոլիէթիլենային շիշ՝ վերցված դեպքի վայրից:

Հիշեցնենք, որ նախորդ դատական նիստում հետազոտվեցին գործով իրեղեն ապացույցները, և պաշտպանական կողմը, մասնավորապես՝ ամբաստանյալ Գնել Թևոսյանի պաշտպան Արա Զաքարյանը, դատարանի ուշադրությունը հրավիրեց այն հանգամանքի վրա, որ հետազոտված իրեղեն ապացույցների մեջ չեն և դատարանում չհետազոտվեցին Հայկազ Բարսեղյանի կոշիկներն ու այդ շիշը:

Մեղադրանքի կողմից ներկայացված այդ փաթեթները դատարանը կպահի իրեղեն ապացույցների համար նախատեսված սենյակում, և դատաքննության ընթացքում կորոշվի դրանց հետազոտման և իրեղեն ապացույց ճանաչելու հարցը:

Նշենք նաև, որ տուժողի իրավահաջորդը ցանկություն էր հայտնել, որպեսզի իր շահերը ներկայացնի մեկ այլ փաստաբան ևս՝ Անի Թորոսյանը: Վերջինս սակայն այսօր դատարան չէր ներկայացել. տուժողի իրավահաջորդի խոսքով՝ նա հանրապետությունից բացակայում է և հաջորդ նիստին կներկայանա:

Իսկ թե տուժողի իրավահաջորդի ներկայիս ներկայացուցիչ Գարիկ Գալիկյանը կշարունակի՞ ներկայացնել նրա շահերը հարցին փաստաբանը խնդրեց այս փուլում չանդրադառնալ՝ հավելելով, որ որոշակի հանգամանքներ կան պարզելու, և Անի Թորոսյանը գործով պետք է ներգրավվի հասարակական կազմակերպության հետ կնքված պայմանագրի արդյուքնում:

Գալիկյանը նշեց նաև, որ ըստ իրեն հասած տեղեկությունների՝ Անի Թորոսյանը խնդրել է, որ դատական նիստը հետաձգվի և առանց իրեն որևէ գործողություն չկատարվի, ի պատասխան որ՝ի նիստը նախագահող դատավոր Դավիթ Հարությունյանը նշեց, որ գործով չներգրաված որևէ փաստաբան, դատավարության մասնակից չհանդիսացող անձ, նման միջնորդության ներկայացնելու իրավասության չունի:

Դատական նիստը շարունակվեց. տուժողի իրավահաջորդը չառարկեց նիստը շարունակել առանց իր մյուս ներկայացուցչի, ով դեռևս ներգրավված չէ գործին:

Լուսանկարը՝ Armtimes.com-ի

Աղբյուր` Փաստինֆո